Jeremias 24 - Ing Mayap a Balita Biblia

Ding Aduang Basket a Ating Bungang Higera

¹ Pepakit na la kanaku ning Ginu ding aduang basket a ating bungang higera. Makabili la deti king arap ning Templo. (Milyari iti kaybat neng binihag at delang Aring Nebucadenesar ning Babilonia i Aring Jeoiakin ning Juda a anak nang Jeoiakim. Kayabe lang mebihag ding manimuna na ning Juda, ding pande, at ding mangagaling a pangamat king obra.)

² Atin yang mayap a bungang higera ing mumunang basket, detang minunang melulut; atin yang e mayap a bungang higera ing kaduang basket, tune e la mayap kanan.

³ Kanita ngana kanaku ning Ginu, Jeremias, nanu ing akakit mu? Pekibat ku, Bungang higera la pu. Tune lang mayap ding mayap a bunga, at detang e mayap tune lang e mayap kanan.

⁴ Inya ngana kanaku ning Ginu,

⁵ Aku, ing Ginu, ing Dios ning Israel, lalawen ku la ding taung mebihag at midala king Babilonia a kalupa da reting mayap a bungang higera at pakiutusan ku lang ating ganaka.

⁶ Ingatan ku la at ibalik keting bansa. Palabungan ku la at e na pasibayung lasakan pa; itanam ku la at e na bagutan pa.

⁷ Ibie ku karela ing kapagnasan a abalu da king aku ing Ginu. Kanita ila ding maging memalen ku, at aku ing maging Dios da, uling magbalik la kanaku king mabilug dang pusu.

⁸ Tungkul naman kang Aring Zedekias ning Juda, ding tauan nang makapadurut king tronu na at ding memalen na ning Jerusalem a menatili keting bansa o linipat king Ehipto, aku, ing Ginu, pakiutusan ku la ngan anti deting bungang higera a e mayap kanan.

⁹ Iparala ku karela ing kasiran a maging pitatakutan da ring sablang bansa na ning yatu. Maging pikaylian da la ring tau, pituya-tuya da la, insultuan da la, at gamitan da la ring lagyu ra anting sumpa king balang lugal nung nu ku la iyugse.

¹⁰ Parala kung gera, danup, at salut karela angga king ala nang mitagan metung man king bansa a binie ku karela at karing makatua da.