Jeremias 23 - Ing Mayap a Balita Biblia

Ing Kapanayan king Aldo Bukas

¹ Makalunus ing mangapalyari potang dugpa na ing kayatulan na ning Ginu karetang pamuntuk a makamate at maniambulat karing taung pinili na!

² Iti ya ing sasabian na ning Ginu, ing Dios ning Israel, tungkul karing pamuntuk a sukat mo sanang miningat karing taung pinili na. E yu la iningat ding taung pinili ku; simbulat yu la at penabi. Inya ngeni parusan da kayu uli na ning depat yung e mayap.

³ Tipunan ku la ding mitagan karing taung pinili ku manibat karing bansa nung nu ku la kinalat, at ibalik ku lang pasibayu king bansang karelang tibuan. Mikayanak lang dakal at dakal ing bilang da.

⁴ Tuldu kung pamuntuk a manibala karela. E na la pasibayung mitakutan ding taung kanakung pinili o galgal man at e ku na la pasibayung parusan. Aku, ing Ginu, ing migsalita.

⁵ Ngana ning Ginu, Datang mu rin ing aldo nung kapilan mamili kung metung a ari a ibat king lahi nang David at maging ari yang kalupa na. Manibala yang mitmung kabiasnan at daptan na ing mayap at ing matulid king kabilugan a kayarian.

⁶ Potang ya na ing ari, mipanatag la bili ding memalen na ning kabilugan a Juda at mibiebie la ding memalen na ning Israel king kapayapan. Mayaus yang Ing Ginu ya ing Talapagligtas tamu.

⁷ Datang mu rin ing aldo, nganang sasabi ning Ginu, nung kapilan ding memalen e na la kapilan man sumpa kanaku bilang mabie Dios a milual karing memalen na ning Israel king bansang Ehipto.

⁸ Bagkus sumpa la kanaku bilang mabie Dios a milual karing memalen na ning Israel ibat king bansa king dane norti at karing aliwa pang bansa nung nu ku la kinalat. Kanita manuknangan na la king mismung sarili dang bansa.

Ing Mensahi nang Jeremias tungkul karing Propeta

⁹ Masaspak ya ing pusu ku, at gagalgal ing mabilug kung katawan. Uli ning Ginu, uli ding banal nang amanu, meging anti ku king taung malasing, king lalaking mipalalung minum alak.

¹⁰ Mitmu ya ing bansa karing taung migtaksil king Ginu; mibiebie la king e mayap at abusuan ing karelang upaya. Uli ning sumpa ning Ginu magpaldas ya ing bansa, at melangi lang pipagpastulan.

¹¹ Ngana ning Ginu, Ala lang Dios ding propeta at ding pari; arakap ku lang darapat e ustu king mismung Templo.

¹² Ding dalan a karelang tutuntunan maging matalusad la at madalumdum; mitalusad la at miragsa. Iparala ku karela ing kasakitan; daratang na ing oras ning karelang pangaparusan. Aku, ing Ginu, ing migsalita.

¹³ Ikit ku na ing kasalanan da ring propeta ning Samaria: migsalita la king lagyu nang Baal, at linili da la ring kakung memalen.

¹⁴ Oneng ikit ku ing lalung e mayap karing propeta ning Jerusalem: darapat lang pamakipangalugud at magsalitang kalaraman; sasaupan da lang darapat e ustu ding tau, inya alang tuknang ing pamaniapat dang e mayap. Para kaku, e la ngan mayap anti ding tau Sodoma, at e la mayap anti ding memalen ning Gomorra.

¹⁵ Inya, aku ing Ginung Mayupaya, sasabian ku ing bage tungkul karing propeta na ning Jerusalem: Ibie ku la karela ding mapait diling tanaman bilang karelang pamangan, at danum a maki lasun bilang karelang inuman, uling kinalat da ing e mayap king mabilug a bansa.

¹⁶ Ngana ning Ginung Mayupaya karing memalen na ning Jerusalem, E yu la pakiramdaman ding propeta king karelang pamaniabian; e tutu ing sasalita da kekayu. Sasabian da kekayu itang bunga na ning sariling kaisipan da at aliwa ing kanakung sinabi karela.

¹⁷ Alang patugut dang sasabian karing taung e bisang makiramdam kanaku king ing sabla muling mayap para karela ngan. At king balang metung at metung a masias a buntuk sasabian da king e ne bitasang dasnan ning kasakitan.

¹⁸ Sinabi ku, Ala metung man kareting propeta ing mekabalu karing lihim nang isipan ning Ginu. Ala metung man karela ing mekaramdam na o mekaintindi king mensahi na o mekiramdam man o minie pansin king sinabi na.

¹⁹ Ing mua na mangaring bagyu a dugpa karing buntuk da ring darapat e mayap,

²⁰ at e tuknang iti anggang e na atuparan itang sablang buri nang daptan. Karing aldo a datang, kanita ra akuang aintindian iti ding taung pinili na.

²¹ Nganang sinabi ning Ginu, E ku la tinubud deting propeta, makanyan man linual la. Ala kung binie nanumang amanu ku karela, oneng migsalita la mu rin king lagyu ku.

²² Nung balu da la mu sana ding lihim a isipan ku, sana ikua da nang apanaral ing mensahi ku karing taung kanakung pinili, at ikua da lang apabalik a lub at apalakuan king dapat dang e mayap.

²³ Aku ing Dios a atyu nukarin man at e mu bukud king metung a lugal.

²⁴ Ala metung mang taung makasalikut king lugal a e ku mo sana akit. E yu wari balu king atyu ku nukarin mang lugal karin banua at keti king yatu?

²⁵ Dimdam ku ing e mayap a sinabi ra detang propetang migsalitang kalaraman king kapamilatan ning lagyu ku, at sasabi king binie ku kanu karela ing mensahi ku king kapamilatan da ring paninap da.

²⁶ Angga pa kaya kapilan king deting propeta ilili da la ring taung kanakung pinili king kapamilatan na ning kalaraman a gagawan da?

²⁷ Isipan da king ding paninap a sasalita ra maging dalan la ban kalinguan da ku ring taung kanakung pinili a antimo ing pamangalinguan da kaku ding makatua rang sinamba kang Baal.

²⁸ Ing propetang meninap sukat neng sabian iti antimong paninap mu, oneng ing propetang mekaramdam king mensahi ku sukat nang ipanaral iti king mitmung katapatan. Nanu ing ulaga na ning are nung ipakilupa me king binutil a trigu?

²⁹ Mengari yang api ing mensahi ku at anti ya king mantilyu a babalbal mangalati karing batu.

³⁰ Laban ku kareting propeta a mipapanandam king amanu na ning metung at metung, at kaybat ibabalita dang aku ing minie kaniti karela.

³¹ Laban ku naman karetang propetang magsalita karing sarili dang amanu at kaybat sasabian dang ibat kaku.

³² Aku, ing Ginu, makiramdam ka king kakung sabian! Laban ku karing propetang magsalita karing apaninap da at lilili ding taung kanakung pinili, at pati ding karelang kalaraman at pamagmayabang. E ku la tinubud ni inutusan lumual at ala no mang bitasang silbi karing tau. Aku, ing Ginu, ing migsalita.

Ing Mabayat a Pupusanan na ning Ginu

³³ Ngana ning Ginu kanaku, Jeremias, neng ing metung karing taung pinili ku o ing metung a propeta o pari kutnan na ka, Nanu ing mensahi na ning Ginu? sabian mu, Metung kang mabayat a pupusanan na ning Ginu, inya iyugse na ka.

³⁴ Nung ing metung a propeta o pari o ing metung kareting memalen gagamitan na la ding amanung, Ing mabayat a pupusanan na ning Ginu, parusan ke at ing pamilya na.

³⁵ Ing sukat marapat ya iti: Sukat nang ikutang ning balang metung karing kakaluguran na at kamaganak, Nanu ing binie nang pakibat ning Ginu? Nanu ing sinabi na ning Ginu?

³⁶ Inya e yu la sukat gamitan ding amanung, Ing mabayat a pupusanan na ning Ginu uling nung daptan na ning ninuman yan, gawan keng tune mabayat ing mensahi ku keting tau. Pemaluktut da la ring tau ding amanu na ning karelang Dios, ing mabie Dios, ing Ginung Mayupaya.

³⁷ Jeremias, kutnan mu la ding propeta, Nanu ing pakibat a binie na ning Ginu kekayu? Nanu ing sinabi na ning Ginu?

³⁸ At nung e ra tuparan ing utus ku at gagamitan da la ring amanung, Ing mabayat a pupusanan na ning Ginu, kanita sabian mu karela king

³⁹ siguradu ku lang daklutan at ibasibas king marayu, ila at ing siudad a binie ku karing makatua da.

⁴⁰ Iparala ku karela ing alang anggang kamarinayan at ing keyalan dangalan a e na makalinguan kapilan man.