Jeremias 22 - Ing Mayap a Balita Biblia

Ing Mensahi nang Jeremias para king Pamilya na ning Ari ning Juda

¹ Sinabi na kanaku ning Ginu king munta ku king palasyu na ning ari ning Juda a lahi nang David.

² Karin sabian ku king ari at karing pamuntuk na ampon karing memalen na ning Jerusalem king makiramdam la king pasabi na ning Ginu.

³ Ngana, Aku, ing Ginu, yuyutus ku kekayu king daptan yu ing matulid at ing alang pamangabiran. Idipensa ye ing taung pipiraitnan na ning manalipit. E yu la alipitan, nune pakiutusan yu lang mayap ding dayuan, ding ulila, at ding mebalung babai. E yu la papaten keting banal a lugal a iti ding taung alang kasalanan.

⁴ Nung tune yung tuparan itang inutus ku kekayu, kanita manatili lang maging ari ding lahi nang David. At deti, kayabe da ring karelang pamuntuk at ding memalen, manatili lang lual-lungub karing pasbul dalan na niting palasyu a pakasake karing karelang karwahe at kabayu.

⁵ Nung e yu la pamintuan ding utus ku, sasabian kung matni kekayu king malaso ya iting palasyu. Aku, ing Ginu, ing migsalita.

⁶ Para kanaku, ing marangal nang palasyu ning Juda kasing lagu ne ning lugal ning Gilead at ding Bunduk ning Lebanon; oneng gawan keng disyerto, metung a lugal a alang bitasang manuknangan.

⁷ Mitutubud kung tau ba reng siran. Idala da la ngan ding palakul da; kuturan da la ring malagu nang asias a sedro at silaban da la.

⁸ Kaybat na nita, dumalan la karin ding dakal a dayuan at ikutang da king metung at metung: Ginu, baket depat mu ing makanyan a bage keting marangal a siudad?

⁹ Kanita ipakibat da king iti mepalyari uli na ning ginulut kayu king kasunduan yu kanaku, ing kekayung Dios, at sinamba kayu at sinuyu karing aliwang dios.

Ing Mensahi nang Jeremias tungkul kang Joahaz

¹⁰ Memalen ning Juda, e kayu sa manangis para king Aring Josias; e yu sa pagkalungkutan ing pangamate na. Oneng manangis kayu para kang Joahaz a anak na; idala re king marayu. E ne makapagbalik kapilan man, at e na ne malyaring akit pa ing balen nang tibuan.

¹¹ Ngana ning Ginu tungkul kang Joahaz a anak nang Josias a sinalisi kang tata na bilang ari na ning Juda, Meko ne keti at e ne makapagbalik kapilan man.

¹² Mate ya king bansa nung nu re dela at e na ne akit kapilan man iting bansa na.

Ing Mensahi nang Jeremias tungkul kang Jeoiakim

¹³ Makasumpa ya ing taung manalakad king bale na king kapamilatan ning alang hustisia, at daragul ne king kapamilatan ning keyalan katapatan, at papagobran na lang kalupa nang tau, oneng e no dirinan sueldu.

¹⁴ Makasumpa ya ing taung sasabing, Gawa kung bale maragul a ating malualas a kuartu babo. Inya dininan neng awang ing bale na, pinartisyunan ne karing dutung a sedro, at pininturan neng malutu.

¹⁵ Maging maygit ka waring ari ngening ing bale mu megawa ya karing dutung a sedro, at mas malagu ya kesa karing bale da ring aliwang tao? I tata mu meligaya yang mitmung tula king bie na. Menatili yang matulid at parehu lawe karing tau, at mipala ya king sablang depat na.

¹⁶ Binie na karing kalulu ing katuliran da king husgadu, at ing sabla linto masalese para karela. Iti ya ing kabaldugan na ning balu me ing Ginu.

¹⁷ Oneng ika ala kang aliwang akakit nune mu ing sarili mung kapakanan; pamaten mu lang taung alang kasalanan at alipitan ampon tatampalasan ding kekang memalen. Ing Ginu ya ing migsalita.

¹⁸ Inya iti ya ing sasabian na ning Ginu tungkul kang Jeoiakim a anak nang Josias, ing ari ning Juda, Ala metung mang manangis king pangamate na o sumabing, Ay kasaket, kapatad, ay kasaket! Ala metung mang managulele o kumiak para king ari ning Juda: O ginu ku! O kakung ari!

¹⁹ Potang ikutkut de, anti kang mengutkut asnong mete; iguyud de at iyugse lual ding pasbul dalan ning siudad ning Jerusalem.

Ing Mensahi nang Jeremias tungkul king Kararasan na ning Jerusalem

²⁰ Memalen ning Jerusalem, mukiat na kayu king Bunduk ning Lebanon, at manangis karin; munta na kayu king bansa ning Bashan at manangis kayu; manangis kayu manibat karing bunduk ning Abarim, uling mesambut na la ding sablang kekong kakampi.

²¹ Ing migsalita kekayu ya ing Ginu kanitang manawa kayu pa pamibiebie, oneng e ye pekiramdaman. Iti ing maralas yung daraptan king kekaban ning bie yu; kanita pa e ye buring pamintuan ing Ginu.

²² Ipaid na lang marayu ning angin ding kekong pamuntuk, mabihag la ding kekong kakampi king labanan, milako ya dangalan ing kekong siudad, at mibili ya king kamarinayan, uli ning sablang depat yung e mayap.

²³ Panatag kayu bili karing pibalebale yung megawa karing dutung a sedrong ibat king Lebanon, oneng potang datangan na kayu ning sakit, makalunus ing maging kararasan yu, sakit a kalupa ning babai king oras ning pamanganak na.

Ing Kayatulan na ning Dios kang Jeoiakin

²⁴ Ngana ning Ginu kang Aring Jeoiakin a anak nang Aring Jeoiakim ning Juda, Kabang aku ing mabie Dios, agyang ika pa ing singsing a panatak a susulud ku king wanan kung gamat, makanyan man ilukas da ka

²⁵ at ibie da ka karing taung katakutan mu, ding taung bisang makamate keka. Ibie da ka kang Aring Nebucadenesar ning Babilonia at karing sundalus na.

²⁶ Iyugse da ka at i ima mu king aliwang bansa a e yu parehung kebaitan at parehu kayung mate karin.

²⁷ Pagnasan meng akit pasibayu iting bansa, oneng e na ka makapagbalik kapilan man.

²⁸ Sinabi ku, Meging anti ne wari king bangang mebalbal i Aring Jeoiakin a miyugse at ala nang makibure? Ba't ya at ding anak na mebihag la at miyugse king bansang e ra bitasang balu?

²⁹ O bansa, bansa, bansa! Pakiramdaman mu ing sinabi ning Ginu:

³⁰ Mitakda king taung iti ing e ya mikayanak, at e magtamgumpe kapilan man. E ya mikayanak a mag-ari king Juda, at lukluk bilang kayalili nang Aring David. Aku, ing Ginu, ing migsalita.