Jeremias 19 - Ing Mayap a Balita Biblia

Ing Mebalbal a Banga

¹ Sinabi na kanaku ning Ginu king mako ku at saling metung a banga. Sinabi na naman king mituki kung mapilan karing makatua na ning balen ampon mapilan karing makamatuang pari,

² at dumalan ku king Pasbul dalan ding Magkukuran papunta king Kapatagan ning Hinom. Karin ku ibalita ing mensahing ibie na kanaku.

³ Sinabi na ning Ginu king sabian ku iti: Ikayung ari ning Juda at memalen na ning Jerusalem, aku, ing Ginung Mayupaya, ing Dios ning Israel, makiramdam kayu king kanakung sabian. Parala kung kasiran king lugal a ita at mabigla ya ing ninumang makabalita kaniti.

⁴ Daptan ku ing anti kaniting kasiran king lugal a iti uling likuan da ku ding taung pinili ku, at dinatan de iting lugal king kapamilatan na ning pamamie dang ain-sakripisyu keti para karing aliwang dios a e ra balu o kamalayan ding karelang makatua o ding ari na ning Juda. Pepatulu lang daya keting lugal king daya da ring taung alang kasalanan,

⁵ at menalakad lang altar para kang Baal ban dulukan da la ring anak da bilang ain-sakripisyu. E ku bitasang inutus karela ing daptan da iti; e man bitasang linub iti king isip ku.

⁶ Inya ngeni, ing oras datang nung kapilan iting lugal e ne mayaus Tofet o Kapatagan ning Hinom nune mayaus yang Kapatagan ning Pipatayan.

⁷ Siran ku la keting lugal a iti ding sablang balak da ring memalen na ning Juda at Jerusalem. Paburen ku lang maniambut karela ding kalaban da at paten king labanan. Ibie ku la ding bangke ra karing ayup at karing malyap a animal ban kanan da.

⁸ Iparala ku ing anti kaniting makatakut a kasiran keting siudad; masdan ya at mangapamulala ing ninumang daralan.

⁹ Paligiran de ring kalaban ing siudad at pakikuanan da lang paten ding memalen na. Maging makatakut ing pamanlusub da. Uli na niti, ding memalen a atyu kilub ning siudad kanan da la laman ding kasiping dang bale at pati na ding mismung anak da.

¹⁰ Sinabi na kanita kanaku ning Ginu ing balbalan ke ing banga king akakit da ring lalaki a tinuki kanaku,

¹¹ at sabian karela king ing Ginung Mayupaya sinabi na, Balbalan ku la ding memalen at iting siudad, at maging anti la king mebalbal a banga a e na malyaring malarin pasibayu. Ikutkut da la ring mete ra agyang king Tofet uling ala nang aliwa pang lugal a malyaring pikutkutan da.

¹² Pangaku kung iyapus ke king Tofet ing siudad a iti at ding memalen na.

¹³ Anti ing Tofet maging marinat la ngan ding bale ning Jerusalem at ding bale da ring ari ning Juda at pati na ding babo ding sablang bale nung nu la dinuluk insenso para karing batuin, at nung nu la mitugtug alak bilang ain karing aliwang dios.

¹⁴ Likuan ke ing Tofet nung nukarin na ku tinubud ning Ginu ban ibalita ing mensahi na. Meko ku at tinalakad king patyu ning Templo at sinabi ku karing sablang tau

¹⁵ king ing Ginung Mayupaya, ing Dios ning Israel, sinabi na, Iparala ku king siudad a iti at king balang makasiping a balen ing sablang parusang sinabi kung daptan ku, uling masias kayu buntuk at e bisang makiramdam king sasabian ku.