Jeremias 14 - Ing Mayap a Balita Biblia

Ing Makatakut A Lawi

¹ Nganang migsalita ning Ginu kanaku tungkul king lawi,

² Manangis ya ing Juda, mamamate la ding siudad na; pakapase la king gabun ding memalen na uli ning lungkut da, at kukulisak yang maniawad saup ing Jerusalem.

³ Tutuburan da la ring mabandi ding karelang ipus ban kumang danum; pupunta la reti karing talaga, oneng danum ala lang akua; magbalik lang alang laman ding karelang banga. Mimina la lub at e ra balu ing daptan da, at tatakpan da lang lupa ra.

⁴ E la mipaindatun ding ortelanu; tatakpan da lang karelang lupa, uling alang uran a mananabu at ing gabun mengabtak na.

⁵ King marangle ing gaindung usa lalakuan ne ing bayung bait a biseru na, uling alang dikut king lugal a ita.

⁶ Pakatalakad la karing taluktuk ding bunduk-bundukan ding malyap a asno, anti la karing animal a jackal a abut-abut pangisnawa; pupula la ring mata ra, uling ala lang akit a pamangan da.

⁷ Mamaus la kaku ding taung kakung pinili. Ngara, Agyang ing kasalanan mi tetestigu laban kekami, makanyan man, Ginu, saupan mu kami antimo ing pengaku mu. Gilutan da kang e mu misan; mikasala kami keka.

⁸ Ika mung bukud ing kapanayan ning Israel, ika ing magligtas kekami king kapahamakan. Baket mengari kang dayuan king kekeng kakarinan, obat anti kang maglakbe a manatili mung misan a bengi?

⁹ Baket mengari ka king lalaking misdan, anti ing sundalung alang sikanan sumaup? Makanyan man, Ginu, atyu ka libutad mi, ikami ding taung kekang pinili; e mu ke lalakuan magdili-dili.

¹⁰ Nganang sasabi ning Ginu tungkul kareting tau, Aburi da ing tatakasan da ku at e la mebisang mamigil king karelang sarili. Inya e ku la katulan. E ku kalinguan ing depat dang kamalian at parusan ku la uli da ring karelang kasalanan.

¹¹ Ngana kanaku ning Ginu, E mu na aduan pa kanaku ing saupan ku la deting tau.

¹² E ku pakiramdaman ing pamaniawad dang kasaupan agyang mag-ayunu la pa; e ku mu rin tumula karela agyang dinan da ku pang durulukan a sakripisyu at ain-a-binutil. Bagkus, paten ku la king gera, king danup, at king sakit.

¹³ Kaybat na nita sinabi ku, Ginung Dios, balu mu king ding propeta sasabian da karing tau king e mika gera o danup uling ita ya ing pengaku mu. Sasabian da pa king bukud mung ing kapayapan ya ing mag-ari king bansa.

¹⁴ Oneng ngana ning Ginu, King lagyu ku magsalita lang kalaraman deting propeta; e ku la tinubud ni dininan nanumang kautusan a magsalita agyang metung mu mang amanu. E la ibat kanaku ding vision a amanuan da, ding karelang pamamanula; bage lang alang ulaga a bunga namu ning karelang kaisipan.

¹⁵ Aku, ing Ginu, sasabian ku keka ing daptan ku kareting propetang e ku naman tinubud, oneng magsalita la king kapamilatan na ning lagyu ku at sasabi king ing gera at danup e miras keting bansa: ila ding paten ku king gera at danup.

¹⁶ Makanyan la namang mate ding taung selitanan da kareting bage. Miyugse la ding karelang bangke karing dalan na ning Jerusalem at ala metung mang mangutkut karela. Iti ing mapalyari karela ngan pati na karing karelang asawa at anak. Papamayaran ku la king depat dang e mayap.

¹⁷ Inutus na kanaku ning Ginu king sabian ku karing tau ing tungkul king kanakung kalungkutan at sabian ku: Mananu sanang ing lua karing kakung mata tumulu aldo't bengi, mananu na sanang e tutuknang mamagus, uling malalam la pangasugat ding kakung kabalen, at lubus lang misakitan.

¹⁸ Neng lulual kung pupunta karing marangle, kaku lang akakit ding bangke ra ding lalaking mete king gera; potang pupunta ku karing balen, kaku lang akakit ding taung mamamate king danup. Susundu da ring propeta at ding pari ing obra da, oneng e ra balu ing daraptan da.

Ing Pamakisabi rang Mayap ding Tau king Dios

¹⁹ Ginu, lubus mu ne waring tinggian ing Juda? Kasaman mu la wari ding memalen ning Zion? Baket penasakit mu keng masolu angga king e na ke malyaring maulu? Menintun keng kapayapan, oneng iti alang binungang mayap; manaya keng maulu, oneng kaligaligan ing dinatang.

²⁰ Mikasala kami keka, O Ginu; tatanggapan mi ing kekeng sariling pamikasala at ding kasalanan ding kekeng makatua.

²¹ Ganakan mu la sa ding pangaku mu; e mu ke sa lalakuan, e me sa bibili king kamarinayan ing Jerusalem, ing karinan ning marangal mung tronu. E me sa sisiran ing kasunduan a gewa mung kayabe mi.

²² Ala metung man karing idolo ding bansa a makaparatang uran; ing banua king sarili na e makabaldug uran ditak man. Binili mi ing kapanayan mi keka, O Ginung kekeng Dios, uling ika mu ing makarapat kareting bage.