Isaias 58 - Ing Mayap a Balita Biblia

Ing Tune Pamag-ayunu

¹ Ngana ning Ginu, Kulisak kang masikan anggang binit mu! Sabian mu karing memalen kung Israelita ing kasalanan da!

² Sasamban da ku aldo-aldo at sasabian da king matula da lang buring abalu ding tuntunan ku at pamintuan ding kanakung kautusan. Aduan da ing dinan ku lang kautusan a makatuliran at matutula lang sasamba kanaku.

³ Ngarang mengutang ding tau, Baket kailangan pa ing mag-ayunu tamu, nung e na katamu mu rin pansin ning Ginu? Baket kailangan pa ing pairanup tamu, nung e na katamu mu rin papansinan? Nganang mekibat karela ning Ginu, King kamatutuanan kabang mag-ayunu kayu, iyagnan yu naman ing pamanintun yu king sarili yung kapakanan at gigipitan yu la ding magobra yu.

⁴ Mumuli mu ing pamag-ayunu yu king pamipatepate at tumbukan. E ku pakiramdaman ing panalangin yu nung makanyan mu ing pamag-ayunu yu.

⁵ Pasakitan yu ing sarili yu neng mag-ayunu kayu; duruku yu la ding buntuk yu anti ing bulung ning tanaman, at miladlad kayung langgotsi ampon mibibiling abu ban pipagkeran yu. Iti ya wari ing ausan yung pamag-ayuno? Isipan yu mo galang king tutula ku king dapat yung yan?

⁶ Oyni ing pamag-ayunung buri ku: Ilako yu la ding tanikala na ning pamanggipit, ipatupad ing hustisia, at gawan malaya ding magigipit.

⁷ Dinan yu la king pamangan yu ding danupan at ibuklat ding pibalebale yu para karing pakakalulung alang tuknangan. Dinan yu lang imalan ding lubas at e yu la tatanggian saupan ding kamaganak yu.

⁸ Kanita sunlag ya kekayu ing lupa ku anti ing aldo neng abak at agad lang kumayap ding sugat yu. Manatili kung atyu kekayu ban iligtas da kayu; ing panga-atyu ku kekayu ya ing mingat king sablang aldo ning bie yu.

⁹ Pakibatan da kayu potang manalangin kayu kanaku. Makibat ku potang maus kayu. Nung tuknang na kayung manggipit, manabusu, at magsalitang e mayap,

¹⁰ nung munie kayung pamangan karing danupan at saupan ding atyu king pamangailangan, kanita ing dalumdum a makapadurut kekayu miyalilan king sala na ning kaugtuan aldo.

¹¹ At manatili kung matnube kekayu at katmuan da kayu king sablang mayap a bage. Pasiknangan da kayu at dinan mayap a pamikakatawan. Mangari kayu karing tanaman king mulahan a parating madidilig at anting batis a e kakati.

¹² Larinan da ring memalen yu ing mesira king minunang panaun; italakad da lang pasibayu karing matuang pundasyun na ning siudad. Maging pikabaluan kayu anting taung miglarin karing pader at karing mesirang tuknangan.

Ing Galal para king Pamangiling king Aldo ning Sabbath

¹³ Ngana ning Ginu, Nung kilalanan yeng banal ing Aldo ning Sabbath at nung tuknangan yung panintunan ing sarili yung kapakanan king aldong iti; nung pakamalan ye ing kanakung banal a aldo at nung galangan ye king kapamilatan na ning e yu pamaglakbe, pamagobra o king pamakipagkwentung alang kapupuntalan,

¹⁴ kanita manakit kayung tula a bunga na ning kekayung pamaniuyu kanaku. Gawan da kayung taung kalang-alangnan king mabilug a yatu; maging tula ye ing bansa a binie ku king makatua yung i Jacob. Aku, ing Ginu, ing migsalita.