Isaias 56 - Ing Mayap a Balita Biblia

Miyabe la ding Sablang Bansa karing Taung Pinili na ning Dios

¹ Ngana ning Ginu karing taung pinili na, E na lumuat iligtas da kayu. Inya daptan yu itang mayap at matulid.

² Bendisyunan ku la detang parating mangiling at gagalang king Aldo ning Sabbath. Bendisyunan ku la ding e darapat nanumang e mayap.

³ E na sukat sabian ning taung dayuan a mekianib karing taung pinili na ning Ginu ing anti kaniti, E na buri ning Ginu ing samba kung kayabe ra ding taung pinili na. E na naman sukat isipan ning taung kapun king uling e ya malyaring mikayanak e ne malyaring maging kayanib king balen a pinili ning Dios.

⁴ Sasabian na ning Ginu king taung anti kaniti, Nung gagalangan mu ku king kapamilatan na ning pamagmasusi mu king Aldo ning Sabbath at nung daraptan mu itang babie tula kanaku at tapat kang tutupad king kakung kasunduan,

⁵ e makalinguan ing kekang lagyu king kakung Templo at karing taung pinili ku. Mie yang lalung malambat ing lagyu mu kesa ketang mikayanak kang lalaki at anak a babai. E ka makalinguan.

⁶ At sasabian na ning Ginu karetang taung dayuan a meging dake na ning balen a pinili na a malugud at susuyu ampon mangiling king Aldo ning Sabbath at tapat tutupad king kasunduan:

⁷ Idala da kayu king Zion, king banal kung bunduk; dinan da kayung tula king kanakung bale pipanalanginan at tanggapan ku la ding ain-sakripisyung babie yu king kanakung altar. Mayaus yang bale pipanalanginan ing Templo ku para karing sablang tau.

⁸ Ing Ginung Dios a miyuli king balen nang Israel ibat pangayugse na king marayung lugal, pengaku nang ituki na la ding aliwang tau ban makiabe la karela.

Mekondena la ding Manimuna na ning Israel

⁹ Sinabi na ning Ginu karing aliwang bansa king datang lang anting mabagsik a animal at laklakan da la ring taung pinili na.

¹⁰ Ngana, Bulag la ding sablang manimuna a sukat munie babala karing taung pinili ku! Ala lang kabalu-balu. Mengari lang asung bante a e biasang kaung; kera-kera la mu at mamaninap. Tutu lang matako tudtud!

¹¹ Mengari la karing asung matako a alang pikabsian. Ala lang aintindian deting manimuna. Daraptan na ning balang metung at metung karela itang buri nang daptan at ala lang sisikasuan nune mu ing sarili dang kapakanan.

¹² Ngara deting lasenggu, Tara, kuma tamung alak at inuman ing anggang agyu tamu! Mas masanting ya ing aldo bukas kesa king ngeni!