Isaias 52 - Ing Mayap a Balita Biblia

Iligtas ne ning Ginu ing Jerusalem

¹ Jerusalem, magpakasikan ka at magpakarangal pasibayu! Banal a siudad ning Dios, miblas kang mitmung leguan! E na la pasibayung lungub karing siudad mu ding paganu.

² Jerusalem, malaya na ka king panga-ipus mu! Mibangun ka ibat king alikabuk at lukluk na ka king kekang tronu! Kalagan mu la ding tanikala a gagapus keka, O mebihag nang balen ning Zion!

³ Ngana ning Ginung Dios karing memalen na, Alang salaping mebayad para kekayu kanitang meging ipus kayu; makanyan munaman alang salaping mabayad para maging malaya kayu.

⁴ Kanitang misan atyu kayu Ehipto anting dayuan, oneng kusa yung lub minta karin. Makanyan man kinua na kayung sapilitan ning Asiria at alang mebayad salapi para kekayu.

⁵ At ngeni makanyan munaman ing milyari kekayu king Babilonia; meging bihag kayu karin at alang salaping mebayad para kekayu. Magmaragul la at magmayabang detang sasakup kekayu at ala lang patugut lalapastangan kanaku.

⁶ Oneng king panaun a datang kilalanan yu king aku ing Dios at migsalita ku kekayu.

⁷ Makayama yang lalawan itang talapagbalitang daratang daralan karing kabundukan; magdalang mayap a balita, ing balita ning kapayapan! Ipabalu na ing tagumpe at sabian na king Zion, Ing kekang Dios ya ing mag-ari!

⁸ Detang magbante king siudad kukulisak la, kukulisak lang miyabe-abe king tula ra! Akakit da karing sarili rang mata ing pamagbalik na ning Ginu king Zion!

⁹ Kulisak kayu king tula; miyabe-abe kayung magkanta, ikong lugal a melasak ning Jerusalem! Paligayan na ne ning Ginu ing balen na; linigtas na ne ing siudad na.

¹⁰ Gamitan ning Ginu ing banal nang upaya; iligtas na la ding memalen na at mabilug a yatu iti akit na.

¹¹ Lakuan yu ne ing Babilonia, ikong karing kasangkapan ning Templo magdala. Karing bawal a bage e kayu tatagin; ingatan yung malinis ing sarili yu at lakuan yu ne ing siudad.

¹² Ngeni e na kailangan ing mako kayung mirarapal; e na kayu balamu tatakas! Ing Ginung kekong Dios ya ing kekayu tumaid, at ingatan na kayu misusumangid.

Ing Magkakasakit a Talasuyu

¹³ Ngana ning Ginu, Magtagumpe ya ing talasuyu ku king obra na; mirangal yang alang kalupa.

¹⁴ Mebigla la ding dakal kanitang ikit de; uling ing lupa na medisporma ya, halus e ne itsurang tau.

¹⁵ Oneng ngeni mangapamulala la ding dakal a bansa, at e la makapagsalita ding ari king pangapamulala ra. Akit da at aintindian itang bage a ngeni ra pa dimdam.