Isaias 45 - Ing Mayap a Balita Biblia

Pinili ne ning Ginu i Ciro

¹ Pinili ne ning Ginu i Ciro ban maging ari. Tilduan ne ning Ginu ban sumakup karing bansa; tiburan ne ban lubasan la ding ari king upaya ra; ibuklat na la ning Ginu ding pasbul dalan ding siudad para king pinili na. Ngana ning Ginu kang Ciro,

² Aku mismu ing misadia king kekang dalanan; patagan ku la ding bunduk at bunduk-bundukan. Ding pasbul dalan a tangsu kaku lang lasakan, at siran ding tarangkang bakal.

³ Ibie ku la keka ding pibandian karing maralumdum dang lihim a pisisinupan. Akilala mu kanita king aku ing Ginu, at king ing Dios ning Israel inaus na ka king lagyu mu.

⁴ Ausan da ka ban saupan me ing Israel a kakung talasuyu, ing balen a pinili ku. Dininan da kang maragul a dangalan, agyamang ala kang balu tungkul kaku.

⁵ Aku ing Ginu; ala nang aliwa pang dios subali kaku. Ibie ku keka ing sikanan a kekang kailangan agyamang kaku ala kang kabaluan.

⁶ Iti kakung daptan ban ing balang tau ning mabilug a yatu akilala na king aku ing Ginu, at king ala nang aliwa pa subali kaku.

⁷ Lalalangan ku ing sala at dalumdum; parala kung kanawan at kapamahakan. Aku, ing Ginu, ing darapat kareti ngan.

⁸ Miparala kung tagumpe anting uran ibat banua; mibuklat ya ing yatu ban iti tanggapan na, at mag-ari ing kalayaan at ing katuliran. Aku, ing Ginu, ing darapat kaniti ngan.

Ing Ginu ning Melalang at ning Istoria

⁹ Ing waring kapsang kuran mangangas yang makitua king ginawa, ing kuran a kalupa da ring aliwa? Ing waring kapsang kuran kutnan ne ing mangawa nung nanung gagawan na? Ing waring kapsang kuran magreklamu ya king ing mangawa kulang ya pangamat?

¹⁰ Atin waring metung mu mang mangangas magsalita karing pengari na, Obat makanyan yu kung gewa?

¹¹ Ing Ginu, ing banal a Dios ning Israel, itang miyuyubug king datang a panaun, sasabian na: Ala kang matulid mangutang tungkul karing kakung anak o sabian kaku itang sukat kung daptan!

¹² Aku itang ginawa king yatu, at linalang karing tau ban karin manuknangan. King kakung upaya lidlad ku la ding banua; ing aldo, bulan, at ding batuin atyu la ngan lalam kung upaya.

¹³ Aku mismu ing misubung kang Ciro ban kimut ya, ban ing kakung parasan tuparan na at itulid ing sabla. Kakung tuliran ing balang dalan a dalanan na. Italakad ne at larinan ing siudad kung Jerusalem, at ibulus ing mebihag kung balen. Ala metung man ing menupa o minie suhul ban iti daptan na. Ing Ginung Mayupaya migsalita ya.

¹⁴ Ngana ning Ginu king Israel, Ing pibandian ning Ehipto at ning Etiopia maging bandi mu at ding maragul nang lalaki ning Seba maging ipus mu la; makatanikala lang tuki keka. Duku la keka at karelang sabian; Ing Dios atyu keka; ya mung bukud ing Dios.

¹⁵ Ing Dios ning Israel a magligtas karing memalen na, Dios yang papampan na ing sarili na.

¹⁶ Detang sablang gagawang idolo mangapakarine la ngan; mibili la ngan king kabiguan.

¹⁷ Oneng linigtas ne ning Ginu ing Israel; ing tagumpe na manatili kapilan man; e na la mibili ding memalen na king alang dangalan.

¹⁸ Lelangan na la ning Ginu ding banua; ya kabud ing Dios! Ya ing miyubug at linalang king yatu; gewa neng matatag at manatili. E ne lelangan alang kabaldugan, nune lugal ya para panuknanganan da ring tau. Ya ing sasabi, Aku ing Ginu at ala nang aliwa pa subali kaku.

¹⁹ E ku migsalita king makalihim o selikut ing kakung parasan. E ku pekiduang karing memalen ning Israel ing panintunan da ku king karinan a alang kabaldugan. Aku ing Ginu at ing katutuan yang kakung sasabian; ibubulalag ku itang makatuliran.

Ing Ginu ning Yatu at ding Idolo ning Babilonia

²⁰ Ngana ning Ginu, Me ko keni, mitipun kayu ikong memalen ning yatu, ikong sablang mitagan king pangabagsak ning kayarian; iyarap yu ing sarili yu para king pamaglitis! Ding taung pidala-dala da la ring idolo rang dutung, at manalangin karing kikilalanan dang dios a e naman makapagligtas karela. Ala lang bitasang balu deting tau!

²¹ Me ko keni at iyarap ing kasu yu king husgadu; paburen lang mikukutnanan ding midimanda. Ninu king milabas a panaun ing sinabi king bage mapalyari? Aliwa wari aku, ing Ginu, ing Dios a magligtas king balen na? Ala nang aliwa pang dios subali kaku.

²² Mibalik na kayu ngeni kaku at miligtas kayu, ikong memalen king mabilug a yatu! Aku mu ing bukud a Dios at ala nang aliwa pa.

²³ Katutuan ing pengaku ku at iti e mibayu. Ing kakung pengaku taimtim kung tuparan. Ing balang metung lumapit ya at duku arapan ku, at isumpa nang maging tapat ya kaku.

²⁴ Karelang sabian king bukud mung king kakung kapamilatan karin mayakit ing tagumpe at sikanan; oneng ding sablang masama kaku karelang tanggapan ing kamarinayan.

²⁵ Aku, ing Ginu, kaku lang iligtas ding sablang lahi nang Israel, at kaybat aku ing purian da.