Isaias 44 - Ing Mayap a Balita Biblia

Ing Ginu Ya Mu ing Bukud a Dios

¹ Ngana ning Ginu, Makiramdam ka ngeni, Israel, a kakung talasuyu, ing balen a kakung pinili, ing lahi nang Jacob!

² Aku ing Ginung linalang keka; seupan da na ka manibat na inyang mibait ka. E ka tatakut; ika ing kakung talasuyu, ing balen a pinili ku at kaluguran ku.

³ Munie kung danum king bansang kakau, at kaku lang payagusan ding batis king malanging gabun. Ibie ke ing espiritu ku karing anak mu, at ing bendisyun karing lahi mu.

⁴ Lumabung lang anti ing dikut, mangari la karing tanaman a tutubu lele ning batis a mamagus.

⁵ Ing metung at metung karing tau sabian na, Bandi na ku ning Ginu. Datang la ban makiabe karing memalen ning Israel. Ikintal ne king takde na ning balang metung karela ing lagyu ning Ginu, at sabian na king metung ya karing pinili ning Dios.

⁶ Ing Ginung sasakup at mimingat king Israel, ing Ginung Mayupaya, sasabian na, Aku ing mumuna, ing tauli, ing bukud mung Dios, ala nang aliwang dios subali kaku.

⁷ Atin na kayang mekarapat king depat ko? Ninu mo kaya ing makaula king sablang bage mapalyari manibat king mula angga na king kawakasan ning panaun?

⁸ E kayu tatakut, O memalen ku! Balu yu manibat na king minunang panaun angga na ngeni king sinabi kung makapauna ing sablang bage mapalyari, at ikayu ding kakung testigu! Atin pa waring aliwang dios? Atin pa waring aliwang mayupayang dios subali kako?

Meinsultu ing Pamanyambang Idolo

⁹ Ala lang kabaldugan ding sablang gagawang idolo at ding kikilalanan dang dios a tutu rang pakamalan. Ala lang ulaga! Bulag la at mangmang ding sasamba kareti at mibili la king kamarinayan.

¹⁰ Alang kasilbian ing gawa kang idolo o mipormang larawan.

¹¹ Mangapakarine ya ing ninumang sasamba kareti. Tau la mu ding gagawa kareting idolo. Paburen lang datang at marap king husgadu; mitakutan la at mibili king kamarinayan.

¹² Kakua yang kapirasung bakal ing pande; itangab ne king api at kaybat papandayan ne king gamat nang masikan. Masuan ne ing bakal at saka ne dinan ubug. Daranup ya, kakau, at mapapagal kabang magobra ya.

¹³ Susukdan na ne man ning kalpinteru ing dutung. Gugulis ne ing larawan, at dudukitan ing dutung karing kasangkapan na. Gagawan ne king larawan na ning tau, metung a masanting a larawan ban ibili king pibalebale na.

¹⁴ Mapalyaring kumutud yang tanaman a sedro para gamitan na o kaya mamili yang tanaman a ensina o kaya sipres king kagubatan. Mapalyaring tanam yang tanaman a laurel at manaya ya king uran ban tumubu ya at dagul.

¹⁵ Gagamitan ne ning tau ing kapirasung dutung antimong panangab, gawan neng idolo ing aliwang dake. Gagamitan ne ing aliwang kapirasu ban mikapali ya ing bale na king panaun na ning dimla at ban paglutung tinape. Gagawan neng dios ing aliwa namang kapirasung dutung ban samban na.

¹⁶ Panangab na ing aliwang kapirasung dutung; magnangnang yang karni a kanan na at kumabsi ya. Magsalab ya at ngana, Kasanting! E ku marimla! Kalablab ning api king kalang!

¹⁷ Gagawan neng idolo ing aliwa nang kapirasu ning dutung. Kaybat durukuan ne at sasamban. Manalangin ya king idolo. Ngana, Ika ing kanakung dios; iligtas mu ku!

¹⁸ E ra balu at e ra aintindian ing daraptan da reting tau uling milalu ing karelang kamangmangan. Sasara da la ring mata ra at ing pamisip da king katutuan.

¹⁹ Ala yang beluan o tetagan lub ing gagawa karing idolo ban sabian na, Penangab ku ing mapilan a kapirasu ning dutung. Miglutu kung tinape king uling at mignangnang karni at pengan ku. At gewa keng idolo ing aliwang mitagan king dutung. Ngeni, oyni durukuan ke ing kapirasung dutung!

²⁰ Anti ya mu waring mamangan abu. Tutu na neng lininlang ning kaisipan nang alang kabaldugan angga na king ala neng kapalyarian. E na buring aminan king sarili na king e ya pala dios ing idolong tatalnan na.

Ing Ginu , ing Miglalang at Talapagligtas

²¹ Ngana ning Ginu, Israel, e mu sa kakalinguan king ika ing kakung talasuyu. Lelang da ka ban maging kakung talasuyu, at kapilan man e ra kalinguan.

²² Pinawi ku lang anting lulam ding kekang kasalanan. Magbalik ka kaku, aku ing talapagligtas mu.

²³ Kulisak ka king tula, O matas a banua! Kulisak kayu, ikong lugal a mangalalam ning yatu! Kulisak kayu king tula, ikong bunduk at ing balang tanaman ning kagubatan! Uling linigtas ne ning Ginu ing Israel a keyang balayan, at pepakit nang upaya na.

²⁴ Aku ing Ginu, ing kekang talapagligtas; aku ing linalang keka. Aku ing Ginu, ing Miglalang king sablang bage. Aku mung bukud ing miladlad karing banua; alang sinaup kaku inyang lelangan ke ing yatu.

²⁵ Gagawan ku lang mangmang ding taung mamamanula, at bibiguan ku ing ula da ring magaral karing batuin. Palaraman ku la ding amanu da ring mangabiasa, at papakit ku king ing karelang kabiasnan kamangmangan mu.

²⁶ Oneng potang ing kakung talasuyu yang manula, potang itubud ke ing talasuyu ku ban ibulalag na ding munikala ku, papalyarian ku la deting ula at planu. Sabian ku king Jerusalem king ding tau karin la pasibayung manuknangan, at pasibayu lang malarin ding siudad ning Juda. Ding siudad a deta talakad lang pasibayu ibat king pangasira da.

²⁷ King metung mung amanu papamalan ke ing dagat.

²⁸ Sabian ku kang Ciro, Ika ing sumakup para kaku; daptan mu itang buri kung daptan mu; iyutus mu king ing Jerusalem larinan ya at ding pundasyun ning Templo italakad la.