Isaias 30 - Ing Mayap a Balita Biblia

Ing Alang Kwentang Pamakipagkasundu king Ehipto

¹ Nganang migsalita ning Ginu: Makalunus na la ding manimuna na ning Juda uling mig-rebeldi la kanaku. Tutukian da la ring pamalak a e ku gewa at makikasundu la laban king kaburian ku; mipatung-patung na ing karelang pamikasala.

² King alang kapaintulutan kanaku, pupunta la Ehipto ban maniawad saup. Buri da king ing Ehipto ya ing magdipensa karela; inya bibili ra ing kapanaligan da king ari na ning Ehipto.

³ Oneng ala yang akarapat ing ari na ning Ehipto para asaupan na la at miyangganan mu ing pamagdipensa na king kamarinayan.

⁴ Agyang miras na la ding karelang pekakatawan karing siudad na ning Zoan at Hanes ning Ehipto,

⁵ sumisi la ding memalen na ning Juda ba't menalig la king bansang e ra apanaligan, ing bansang e makaibie king saup a panenayan da.

⁶ Iti ya ing mensahi na ning Dios tungkul karing animal king disyerto ning mauli: Maglakbe la ding pekakatawan libutad na ning mapanganib a lugal nung nu la manuknangan ding leon at nung nukarin ating kamandagan a ubingan at sulasulapo dragon. Sasakenan da lang mangamal a regalu ding karelang asno at kamelyu ban ibie king bansang e naman makaibie nanumang saup karela.

⁷ Alang ulaga ing saup a ibie na ning Ehipto. Inya pemalagyuan keng Ing Dragon a alang Akarapat ing Ehipto.

Ing Balen a E Mapamintu

⁸ Sinabi na kanaku ning Dios king isulat ku king libru nung nanu lang uri ding tau ban iti magsilbing katunayan kapilan man tungkul king dapat dang e mayap.

⁹ Parati lang lalaban king Dios, parating maglaram at e makiramdam karing turu na ning Ginu.

¹⁰ Patuknangan da lang magsalita ding propeta. Ngara, Tuknang kayung magsalita kekami tungkul king matulid. Ing isalita yu kekami ya itang kapad ming daramdaman. Paburen yung mibiebie kami karing mali ming kapamalakan.

¹¹ Mabating kayu at patugut kayung babie pangabala king lakad mi. E mi ya buring daramdaman ing tungkul king kekayung banal a Dios ning Israel.

¹² Oneng ini ya ing sasabian na ning banal a Dios ning Israel: Pikakasaman yu ing kanakung sasabian kekayu oneng ing katampalasanan at kapamiraitnan ya ing kekong panaligan.

¹³ Uli na niti, mikasala kayu. Mengari kayu ngeni king matas a pader a ating abtak a makaba; kabud na kayu mibagsak.

¹⁴ Mangabalbal kayung mangalati anti ing kuran; uli na ning milalu ya pangasira ala kang akuang kapirasu mumang kapsa a malyaring gamitan king pamanguang mapaling baya o apanialuk mumang danum king talaga.

¹⁵ Ing Ginung Dios, ing Banal ning Israel, sasabian na karing tau, Magbalik kayu at manalig kayung pasibayu kanaku. Kanita maging masikan kayu at maging panatag. Oneng e yu buring daptan iti!

¹⁶ Bagkus ing daraptan yu ya ing isipan yu ing tumakas kayu karing kalaban yu kapamilatan na ning pamaniake yu karing mabilis a kabayu. Wa, matulid pin ing tumakas kayu! Isipan yu king mabilis la ding kekayung kabayu, oneng mas mabilis la ding tagal kekayu!

¹⁷ Mulayi la ding libu kekayu kabud akit ye ing metung mung kalaban at managyu na la ding limang kalaban ban mamulayi kayu ngang tumakas. Alang mitagan kekayu subali mu ing tulus ning bandera a makatasak babo ning bunduk-bundukan!

¹⁸ Makanyan man manenaya yang maging malam a lub kekayu ing Ginu. Makasadia yang malunus kekayu uling parati yang darapat king matulid. Mapalad la detang manalig king Ginu.

Bendisyunan ne ning Dios ing Balen Na

¹⁹ E na kayu pasibayung tumangis, ikayung memalen a manuknangan king Jerusalem. Mapaglunus ya at saupan na kayu, nung pasaup kayu king Ginu.

²⁰ Ipaintulut na ning Ginu ing dumalan kayung kasakitan, oneng atyu ya mismu karin ban turuanan na kayu at e yu ne kailangan pang panintunan uling e na sasalikut ing sarili na.

²¹ Nung malili kayu king dalan, king banda yu mang wanan o kayli, damdaman yu ing siwala na kagulutan yu. Sabian na, Oyni ing dalan. Keni kayu dumalan.

²² Kuanan yu la kanita ding kekayung idolo a tilbug king pilak at gintu at iyugse yu lang anting basura. Ngayung sumabi, Mabating kayu king arapan ku!

²³ Paratang yang uran ing Ginu kapilan mang mananaman kayu ban paragulan na la at dinan na kayung dakal a pupul at mika malabung lang pastulan ding kekayung baka.

²⁴ Mangan la king masanting diling dikut ding baka at asno a gagamitan yu king pamaniarul king marangle.

²⁵ King aldo a mabihag la ding kuta da ring kalaban yu at mate ding memalen da, magus la ding dakal a batis manibat king balang bunduk at bunduk-bundukan.

²⁶ Maging masala ya ing bulan anti ing aldo; maging pitu ne mang besis kasala ing aldo king sadia nang sala, anti la mong piyabe ing sala da ring pitung aldo king patingapun! Iti ngan mapalyari king aldo ing Ginu bendahan na la at pakayapan ding sugat a pepasari na karing taung pinili na.

Parusan ne ning Dios ing Asiria

²⁷ Mayakit king makarayu ing upaya na at ligaya ning Dios. Papakit na ning api at ning asuk ing mua na. Magsalita ya at milalablab lang anting api ding amanu na.

²⁸ Parala ne ing angin arapan na anting albug a papaniud king sablang bage. Malalasak la ding balang dalanan nang bansa at angganan na ing e mayap dang tangka.

²⁹ Oneng ika o bansang pinili na ning Dios, maging maligaya ka at magkanta ka antimo ing daraptan mu king kabengian na ning metung a sagradung selebrasyun. Maging masaya kang anti detang lalakad kabang babagayan na la ning plauta ngening papunta la king Templo ning Ginu, ing talaingat na ning Israel.

³⁰ Ipaintulut na ning Ginu king balang metung ing damdaman na ing makamal nang siwala at iparamdam na ing upaya na ning mua na. Mika ating malablab a api, matuling a lulam, makapal a uran-batu at uran a masikan.

³¹ Mitakutan la ding tau Asiria kabud damdaman de ing siwala na ning Ginu at panamdaman da ing bigsikan na ning pamamarusa na.

³² At kabang babarugan na lang ulit-ulit ning Ginu ding tau Asiria, bagayan na ne man ning balen a pinili na king musika da ring tambul at alpa. Ing Dios mismu ya ing lumaban karing tau Asiria.

³³ Maluat neng makasadia ing metung a lugal nung nu ya silaban ing ari na ning Asiria libutad ning maragul a api. Malalam ya at malualas at makatambak ing dakal a dutung; labulan na ning Ginu king pangisnawa nang mikakalukung api at mitau ing dutung.