Isaias 29 - Ing Mayap a Balita Biblia

Ing Kararasan na ning Jerusalem

¹ Makalunus ya ing Jerusalem, ing mismung altar ning Dios. Makalunus ya ing siudad a pipagkampuan nang David! Paburen yang mika pamagpiesta at pamagsaya kilub ning metung o adua pang banua,

² at kaybat na nita parala neng kasiran ing Dios king siudad a mayayaus Ing altar ning Dios. Mika pamanangis at kalungkutan at maging metung yang balamu altar a mitmung daya ing mabilug a siudad!

³ Lusuban ne ning Dios ing siudad; kubkuban ne at luban.

⁴ Maging anti yang multu ing Jerusalem a pilit bisang magsalita ibat king lalam ning gabun; siwalang mekulub a manibat libutad ning alikabuk.

⁵ Jerusalem, ding sablang dayuan a lumusub keka maging anti lang alikabuk a mipaid at mitange lang anting are ding makatakut dang sundalus. King metung mung saglit at king e asahan

⁶ iligtas na ka ning Ginung Mayupaya. Parala yang matning duldul at masikan a ayun. Paratang yang alisus at mikakalabkab a api.

⁷ Kanita ding sablang sundalung pakasandata da ring bansang lulusub king siudad ning altar ning Ginu, ding sabla rang sandata at miyayaliwang kagamitan, ing sablang iti matdang antimong paninap; mengari mung guniguni busal ning kabengian.

⁸ Mitipun la ding sablang bansa ban lumusub king Jerusalem; mangari la king metung a taung danupan a maninap king mamangan ya, oneng kagising na danupan ya o kaya mangari ya king lalaking mamamate king kau a maninap king miminum ya, oneng kagising na malangi ya asang.

Ala Metung mang Mekiramdam karing Babala

⁹ Sulung at magpakamangmang kayu! Sige, magpakabulag kayu! Magpakalasing kayu agyang alang alak! Lumakad kayung pasepase agyang e kayu minum kapatak mu mang alak!

¹⁰ Gewa na kayung mitutundu ning Ginu at makasadiang matudtud malalam. Ding peka mata na ning balen ila ding propeta, oneng tikpan na la mata ning Dios.

¹¹ Mipampan karing kekayung kamalayan ing kabaldugan da ring vision a ikit yu; mangari kayu king librung makasara. Nung idala ye king metung a biasang mamasa at aduan yu ing basan ne kekayu, sabian na king e ne abasa uling makasara ya.

¹² Nung idala ye king e biasang mamasa at aduan yu king basan ne, sabian na king e ya biasang mamasa.

¹³ Ngana ning Ginu, Sasabian da reting tau king sasamban da ku, oneng ala lang kabaldugan ding amanu ra at marayu la kanaku ding pusu ra. Alang keliwan ing karelang relihiun karing tuntunan at piyuyugalian da ring tau, at makagyu mu ing minemoria da la.

¹⁴ Inya gawa kung bage pagmumulalan king arapan da, pagmumulalan at makapaniglo. Mawala ing kabiasnan da ring mangabiasa at mawalang kabaldugan ing pamanyuri da ring biasang sumuri.

Ing Kapanayan king Daratang a Panaun

¹⁵ Makalunus la detang lilihim da king Ginu ing karelang tatangka. Daraptan da king pasalikut ing karelang pamalak at isipan da king alang manakit o makibalu king daraptan da.

¹⁶ Babaligtad da ing sabla! Isanu wari ing mas maulaga: ing taung gagawang kuran o ing pila? Asabi na wari ning metung a bage a gewa na ning tau ing anti kaniti: E mu na ku man gewa? O asabi na kaya, E mu naman balu ing daraptan mu?

¹⁷ Antimo ing sasabian na ning kasebian, E lumuat maging marangle ya ing makapal a gubat at maging gubat ya ing marangle.

¹⁸ Potang datang ne ing aldong ita damdaman de ring maklak ing librung mabasa at mibuklat la mata at manakit la ding bulag a mabibie king karalumduman.

¹⁹ Pasibayu rang akit ding pakakalulu at taung mapagkumbaba ing tulang babie na ning Ginu, ing banal a Dios ning Israel.

²⁰ Ya na ita ing kawakasan da ring mapanalipit karing aliwa at e kikilala king Dios. Mate ya ing ninumang makasalanan.

²¹ Gisanan na lang paten ning Dios detang mamanyirang dangalan karing aliwa, detang sasabat king pangaparusan da ring kriminal, at detang mamigawang salita ban e la mirinan hustisia ding taung ating katuliran.

²² Inya ngeni, ing Ginu, ing Dios ning Israel a migligtas kang Abraham king kaligaligan na, sasabian na, O memalen ku, e na kayu mibili pa king kamarinayan at e na la mangalare king dine ding lupa yu.

²³ Potang akit yu na la ding anak a ibie ku kekayu, kanita yu kilalanan king aku ing banal a Dios ning Israel; galangan yu ku at dukuan.

²⁴ Mabiasa lang makaintindi ding taung mangmang at tumula la ding parating tututul king pangaturuanan da.