Isaias 27 - Ing Mayap a Balita Biblia

¹ King aldong ita gamitan ne ning Ginung Mayupaya ing mataram nang espada ban parusan ne ing Leviatan, ing mabilis at liko-likong dragon. Paten ne iting lasip a manuknangan king dagat.

² King aldong ita sabian na ning Ginu ing anti kaniti tungkul king makayama nang mulahan ubas:

³ Banten ke at parati keng paranuman. Banten ke aldo at bengi ban e ne ananu balang ning ninuman.

⁴ E na ku mua king mulahan ubas. Nung ating dikut at tanaman a masuksuk a sukat labanan, lubus ku la ngan silaban.

⁵ Nung buri da ring kalaban na ning kanakung balen ing kanakung pamagdipensa, sukat lang makikasundu kanaku. Wa, sukat lang makikasundu kanaku.

⁶ Karing aldo datang, ding memalen na ning Israel, ding lahi nang Jacob, magyamut lang anti ing tanaman; manyampaga la at mamunga. Mikatmuan ya ing yatu karing bunga da.

⁷ Perusan ne waring mabayat ning Ginu ing Israel antimo itang miras karing kalaban na? Kematen ya waring lalaking kasing dakal da ring kalaban na?

⁸ Perusan na la ning Ginu ding memalen na king kapamilatan na ning pangaugse ra king aliwang bansa. Inugse na la king kapamilatan na ning mabagsik a angin a ibat king aslagan.

⁹ Oneng mipatawaran mu ing kasalanan na ning Israel potang medunut lang mapinu ding sablang batu karing altar a paganu, at anggang e la magisan milako ding sagradung tulus a simbolo na ning diosang i Asera at ding altar a pidurulukan insenso.

¹⁰ Melasak ne ing siudad a mipadurutnan kuta. Ala neng bitasang tau; mengari ya king ilang a lugal. Meging pastulan nia mu para karing baka; pipagpaynawan da at pipanyibsiban.

¹¹ Melangi la at mepakli ding sanga da ring tanaman at titipunan da ring babai ban panangab. Uling ala lang aintindian nanuman ding tau, e na la lunusan ning Dios a karela Miglalang ni pakitanan man king lugud na.

¹² King aldong ita ing Ginu mismu tipunan na lang tunggal-tunggal ding Israelita a pinili na, manibat king Eufrates angga king angganan na ning Ehipto, antimo nung makananu rang kakawani ing trigu king sepu neng panaun na ning pamandara.

¹³ Potang datang ne ing aldong ita, tumiup ya ing trumpeta ban ausan lang muli ding Israelitang miyugse king Asiria at Ehipto. Datang la at samba king Ginu karin Jerusalem, king banal nang bunduk.