Isaias 26 - Ing Mayap a Balita Biblia

Dinan neng Pamagtagumpe ning Dios ing Balen a Pinili Na

¹ Datang ing aldo nung kapilan ikanta re ding tau iting kanta king bansa na ning Juda: Atin keng siudad at matatag ya! Ing Dios mismu ya ing magbante karing pader na!

² Ding pasbul dalan ning siudad kekayu lang ibuklat, at paburen yang lungub ing bansang tapat, ing bansang darapat mayap.

³ Ika, Ginu, ing babie ganap a kapayapan karetang tutupad king kekang kaburian, at keka ibibili ra ing karelang kapanaligan.

⁴ Manalig kayu king Ginu king kapilan pa man; ya ing mimingat parati kekatamu ngan.

⁵ Sildak na la detang palalu; lesak neng matibe rang siudad at digsa ding pader king alikabuk.

⁶ Detang megipit ngeni lalakaran da ne, at daramusakan karing bitis da.

⁷ Ginu, gagawan meng patag ing dalan para karing taung mayap; matulid ya ing dalan a karelang daralanan.

⁸ Pamintuan mi ing kekang kaburian, at keka ibili mi ing kekeng kapanayan; ika mu ing bukud ming pagnasan.

⁹ King bengi ikang pagnasan na ning kakung pusu; ing espiritung atyu kaku taimtim na kang panintunan potang keka yang atulan ing yatu at ding tau, abalu ra kanita ing kabaldugan na ning kekang hustisia.

¹⁰ Agyang maganaka ka karing taung e mayap, makanyan man e la mebiasang dapat katuliran. Agyang king bansa da ring taung kikilala king matulid, e mayap mu rin ing karelang daraptan; e ra buring kilalanan ing kekang kamalan.

¹¹ E ra balu ding kekang kalaban king keka lang parusan. Ginu, ibili mu la king kamarinayan, at paburen lang misakitan; paburen lang magdusa king sidia mung parusa. Ipakit mu karela nung nu anti ing lugud mu karing pinili mung tau.

¹² Ginu, dinan mu keng kanawan; ing sablang kekeng akamtan bunga na ngan ning kekang daraptan.

¹³ O Ginung kekeng Dios, sekupan da ke ding aliwang tau, oneng ika mung bukud ing kekeng kilalang Ginu.

¹⁴ Ngeni mete na la at e na subli pang mie; ding kaladua ra e na la talakad, uling keka lang perusan at lesak. Ala nang makaganaka pa karela.

¹⁵ O Ginu, ing bansa keka yang degul; linapad mu la ding angganan na at iti keka minie dangalan.

¹⁶ O Ginu, ding taung kekang pinili keka lang pepagdusan, at king karelang kasakitan ika ing karelang ausan.

¹⁷ Ika, O Ginu, ing pepasari king kekeng saingsing, anti ke king babaing magkakasakit king pamanganak na.

¹⁸ Mibili kami king sakit at karamdaman, oneng ala keng arapat nanuman. Ala keng ikuang tagumpe para king kekeng balen; nanuman ala keng apala.

¹⁹ Detang kabalen ming mete subli lang mie! Ding katawan da pasibayu lang mika bie! Ding sablang matudtud king karelang kutkutan pasibayu lang migising, at magkanta lang matula. Nung makananu neng gagawan sagiwa ning ambun ing yatu, makanyan na lang biayan ning Ginu detang maluat nang mete.

Ing Kayatulan at Pamagbayu

²⁰ Kakung memalen, lungub na kayu karing kekayung pibalebale at isara ding pasbul kagulutan yu. Salikut kayu king ditak pang panaun kabang ing mua na ning Dios e pa mepawi.

²¹ Lawan yu, datang ya ing Ginu ibat king tuknangan na ban parusan na la ding tau keti king yatu uli na ning karelang pamikasala. Ibulalag na naman ning yatu ing daya nang tinulu, at e na na la isalikut ding mete na.