Isaias 22 - Ing Mayap a Balita Biblia

Ing Mensahi tungkul king Jerusalem

¹ Iti ya ing mensahi tungkul king Kapatagan ning Vision. Nanu ing malilyari? Obat magpiesta la ding sablang memalen ning siudad karing asotea babo ding bale ra?

² Obat magugulu ya ing kabilugan a siudad, mainge ya at malisuas? E la mete makilaban ding kekang lalaking mete king gera!

³ Memulandit la ding sabla mung manimuna at mebihag la bayu re ikuang abugnus ing metung a paslu.

⁴ Ngeni, lakuan yu kung dili-dili ban manangis kapait-paitan uli da ring mete kung memalen. E yu na ku sana aruan.

⁵ Oras na ngeni ning kalingasngasan, ning pangasambut at kagutgutan king Kapatagan ning Vision, at ing Ginung Dios a Mayupaya ya ing peparala kaniti kekatamu. Abagsak da la ring pader na ning kekaming siudad at kakablas ing saingsing yu karing bunduk-bundukan.

⁶ Pakakabayu la at pakakarung panggera ding sundalus na ning bansang Elam; pakasandata lang pana at paslu. Pakasadia na la naman ding kalasag da ring sundalus na ning bansang Kir.

⁷ Mitmu la ding mataba nang kapatagan ning Juda karing karung panggera, at atyu la ding sundalus a pakakabayu king arap da ring pasbul dalan na ning Jerusalem.

⁸ Mibagsak na la ngan ding sablang dipensa na ning Juda. Kaniting mepalyari, lege mu la ding armas king lugal nung nu la makasinup.

^9-10 Ikit mu la ding lugal nung nu la kailangan malarin ding pader ning Jerusalem. Siniasat mu la ding sablang bale na ning Jerusalem at pepalasak mu la ding mapilan ban manikua kang batung paglarin karing pader na ning siudad.

¹¹ Ban makatipun kang danum kilub ning Jerusalem, ginawa kang depositung danum kilub da ring pader ban sumalud king danum a mamagus ibat king matuang depositung danum. Oneng e me dininan pansin ing Dios a mibalak kaniti king maluat nang panaun at pepasari kaniting mepalyari.

¹² Mamaus ya kanita keka ing Ginung Dios a Mayupaya ban manangis kayu at magpaldas, ban kalbuan la ding buntuk yu at ban misulud imalan a magaspang.

¹³ Lugal king daptan yu yan, meyli kayu at migsaya. Mekamate kayung tupa at baka ban kanan at mininum kayung alak. Ngayung sinabi, Mayap pa ing mangan tamu at minum uling bukas mate ta na!

¹⁴ Ing mismung Ginung Dios a Mayupaya ing migsalita kanaku. Ngana, E ku malyaring patawaran ing e ustung dapat kabang mabibie la. Aku, ing Ginung Dios a Mayupaya, ing migsalita.

Ing Babala kang Sebna

¹⁵ Sinabi na kanaku ning Ginung Dios a Mayupaya king munta ku kang Sebna, ing talapangasiwa na ning pibalebale ning ari, ban sabian ing anti kaniti:

¹⁶ Sebna, ninu wari ika? Nanu ing matulid mung dumukit pantiun karing mabatung libis ning bunduk-bundukan?

¹⁷ Mapalyaring maulaga kang tau, oneng daklutan na ka ning Ginu at ibalugse.

¹⁸ Gawan na kang anting bola at ibasibas king mas maragul a bansa. Karin ka mate lele da ring karung panggera a pagmaragul mu. Meging kamarinayan ka king pamilya na ning kekang panginuan.

¹⁹ Ilako na ka ning Ginu king kekang katungkulan, at ibaba na ka king matas mung kabilian.

²⁰ Nganang sinabi ning Ginu kang Sebna, Potang iti mapalyari na, payaus ke ing kanakung talasuyung i Eliakim a anak nang Hilkia.

²¹ Pasulud ke kang Eliakim ing balabal mu at ing sinturun mu at ilipat ku ing sablang upayang sadiang keka. Mangari ya kanitang anting pengari karing memalen na ning Jerusalem at Juda.

²² Itumpak ku la king pago na ding susi na ning pibalebale nang David; alang makasara king ibuklat na at alang makabuklat king isara na.

²³ Ipilmi ke king lugal na anti ing tulus at ya ing maging panibatan na ning dangalan para king mabilug nang pamilya.

²⁴ Oneng maging pabayat la ding sablang kamaganak na at ding manalig kang Eliakim. Sumabit la kang Eliakim antimong kuran at tasa a pakasabit king tulus.

²⁵ Potang mapalyari na iti lubak ya ing tulus a mapilmi pangabili; mabagut ya at mibagsak. At iti ya ing maging kawakasan da ring sablang pakasabit kang Eliakim. Ing Ginu ya ing migsalita.