Isaias 16 - Ing Mayap a Balita Biblia

Ing Keyalan nang Kapanayan ning Moab

¹ Ibat king siudad na ning Sela libutad ning disyerto, parala lang metung a biserung tupa ding memalen na ning Moab bilang regalu ra king pamuntuk na ning Jerusalem.

² Manaya la karing pampang na ning Ilug ning Arnon at pabalik-balik lang alang balung puntalan; mengari lang ayup a meyabuang karing sale ra.

³ Ngara karing memalen na ning Juda, Sabian yu kekami nung nanu ing sukat ming daptan. E yu ke paburen. Mangari kayu sana king tanaman a babie salilung neng kaugtuan aldo; paburen yu keng salilung kekayu. Tinakas kami; isalikut yu kami king lugal a e ra ke akit.

⁴ Paintulut yung manuknangan kami king bansa yu. Iligtas yu kami karetang bisang mamuksa kekami. (Miwakasan na ing pamanalipit ampon pamanyira at mawala la detang manyira king bansa.

⁵ Kanita maging ari ya ing metung karing lahi nang David, at panimunan na la ding tau king mitmung katapatan at lugud. Agad nang daptan itang matulid at lingunan na ing pamag-ari na ning hustisia.)

⁶ Sabian da ring memalen na ning Juda, Abalitan mi ing ketasan dang lub ding memalen na ning Moab. Balu mi king palalu la at ing balu ra ya mu ing sarili da, oneng alang batayan ing karelang pamagmaragul.

⁷ Manangis lang katakut-takut ding memalen na ning Moab, uli na ning daralanan dang kasakitan. Manangis la ngan potang aganaka ra ing maniaman a pamangan a sadia rang kakanan king siudad ning Kir Hareset. E ra balu nung nanu ing sukat dang daptan.

⁸ Masira la ding marangle lele ning Hesbon at ding mulahan ubas king Sibma; detang mulahan ubas a pepasari king pangalasing da ring pamuntuk da ring bansa uli na ning alak da. Kanitang misan a panaun laganap la ding tanaman ubas angga na king siudad na ning Jazer at papunta king dane aslagan angga na king disyerto at papunta king dane albugan angga na king sumangid nang pampang ning Dagat a Mete.

⁹ Ngeni tatangisan ku la ding mulahan ubas na ning Sibma nung makananu keng tatangisan ing Jazer. Tutulu ing lua ku uli na ning Hesbon at Eleale uling ala nang pupul a munie tula karing tau.

¹⁰ Ala na ngening matula karing marangle a mataba. Ala nang kukulisak o magkanta karing mulahan ubas. Ala nang daramusak ubas ban gawang alak; mituknang na ing masayang kulisakan.

¹¹ Sasaingsing kung mitmung lungkut uli na ning Moab; masaspak ya ining salu ku uli na ning Kir Hareset.

¹² Papagalan da ing sarili da ring memalen na ning Moab king pamamunta ra karing santuaryu da karing bunduk at karing templo ra ban manalangin, oneng ala lang mayap a apala kaniti.

¹³ Iti ya ing mensahi a binie nang makapauna ning Ginu tungkul king Moab.

¹⁴ At ngeni, ngana ning Ginu, Kilub ding atlung banua, mawala ing maragul nang pibandian ning Moab. Ditak la mu ding miligtas karing dakal nang memalen at maging maina la deti.