Isaias 14 - Ing Mayap a Balita Biblia

Ing Pamagbalik ding Taung Miyugse karing Aliwang Bansa

¹ Pasibayu yang malunus ing Ginu karing memalen na ning Israel at pilinan na la pa mu rin maging memalen na. Pasibayu na lang ibalik king sarili dang bansa at datangan da la ring dayuan at manuknangan lang kayabe ra.

² Dakal lang bansa ding sumaup karing memalen na ning Israel ban makapagbalik la king bansang binie na ning Ginu karela, at karin la sumuyu ding aliwang bansa bilang ipus king Israel. Detang kanitang misan memihag king Israel, ila naman ngeni ding bihagan na ning Israel at ding memalen na ning Israel ilang sumakup karing taung menggipit karela kanitang misan a panaun.

Ing Ari na ning Babilonia king Tuknangan da ring Mete

³ Dinan na lang kapasnon ning Ginu ding memalen na ning Israel king karelang kalungkutan ampon kasakitan at king kapagalan king mabayat a obrang sapilitan dang pepaobra karela.

⁴ Potang daptan na ning Ginu iti, insultuan de ring memalen na ning Israel ing ari ning Babilonia. Sabian da: Mibagsak ne ing mabagsik a ari! E ne kapilan man makapanggipit pa!

⁵ Inangganan na na ning Ginu ing upaya da ring taung e mayap a manimuna

⁶ at king maragul a mua menalipusta karing tau, at e pepatugut liligalig karing bansang simbut da.

⁷ Ngeni mika atin ya ring kapasnon at kapayapan ing mabilug a yatu, at magkanta ya ing balang metung uli na ning tula na.

⁸ Magsaya la ding tanaman a sipres at ding sedro na ning Lebanon king pangabagsak ning ari uling ala nang mangutud karela uling ala ne ing ari!

⁹ Magsadia ya ing tuknangan da ring mete ban salubungan ne ing ari na ning Babilonia. Mililingat na la ding kaladua da ring meging mayupaya keti king yatu. Mibabangun la ding kaladua da ring aring ibat karing karelang tronu.

¹⁰ Ngara king ari na ning Babilonia, Ngeni kalupa da na kang maina! Metung na ka kekami!

¹¹ Kanitang misan a panaun peparangalan da ka ding tau karing musika da ring karelang alpa, oneng ngeni atyu na ka king tuknangan da ring mete! Ulad la ding pagkeran mu at mibalut ka karing bulati!

¹² Ari na ning Babilonia, masalang tala ning abak, misaldak kang ibat king banua! Kanitang milabas sekupan mu la ding dakal a bansa, oneng ngeni makapase ka king gabun.

¹³ Sinabi mu king ukiatan me ing banua at ibili me ing tronu mu babo da ring batuin, at lukluk ka bilang ari king bunduk na ning norti nung nu la mititipun ding kikilalanan dang dios.

¹⁴ Sinabi mu king ukiatan mu la ding matas a biga at mangari ka king Mayupaya.

¹⁵ Lugal king dasnan mu yan, menakbag ka king pekamalalam nang dake ning tuknangan da ring mete.

¹⁶ Lawan da ka at pagumasdan ding mete. Ngara kanitang mangutang, Aliwa wari ing taung iti ing menugun king yatu at pepagalgal karing kayarian?

¹⁷ Aliwa wari ya ing linasak karing siudad at gewang anting disyerto ing yatu? Aliwa wari ya ing e bisang mibulus karing bihag at e na la buring paulian?

¹⁸ Pakakera la ding sablang ari keti king yatu karing maragul at malagung pantiun;

¹⁹ oneng ika ala kang pantiun at miyugse ya at muluk ing bangke mu. Mitakpan ya karing bangke da ring sundalus a mete king labanan, at kayabe reng miyugse king mabatung kulkul at medamusak ya.

²⁰ E ka mikutkut a kalupa da ring aliwang ari, uling sinira me ing sarili mung bansa at pete mu la ding mismung kabalen mu. Alang mitagan karing miembru na ning e mayap mung pamilya.

²¹ Pagumpisan na ing pamakamate! Mate la ding anak nang lalaki niting ari uli da ring kasalanan ding makatua ra. Ala nang makasakup metung man karela king yatu, at e ra ne alaganasan karing siudad da.

Lasakan ne ning Dios ing Babilonia

²² Nganang sasabi ning Ginung Mayupaya, Lusuban ke ing Babilonia at paten ding memalen na. Ala kung itagan; alang miligtas maging ding anak. Aku, ing Ginu, ing migsalita.

²³ Gawan keng pinak ing Babilonia at karin la manuknangan ding kulayu. Palisan ke ing Babilonia king palis a mitapus king sablang bage atyu keting bansa. Aku, ing Ginung Mayupaya, ing migsalita.

Paten na la ning Dios ding Tau Asiria

²⁴ Nganang matimid sinabi ning Ginung Mayupaya, Nung nanu ing inisip ku, ita ya ing mapalyari. Ing birian kung marapat ya ing marapat.

²⁵ Paten ku la ding tau Asiria a manuknangan king bansa kung Israel at damusakan ku la karing kanakung bunduk. Ilako ke ing paud at ing karga a papusan da ring tau Asiria king balen kung pinili.

²⁶ Iti ya ing planu ku para king yatu at makatas ya ing gamat ku ban parusan ku la ding bansa.

²⁷ Wa, iti ya ing inari na nang daptan ning Ginung Mayupaya; makatas ne ing gamat na ban mamarusa at ala nang makapigil pa.

Paten na la ning Dios ding Tau Filistia

²⁸ Iti ya ing mensahi a mipasiag kanitang banuang mete ya i Aring Ahaz.

²⁹ Memalen ning Filistia, mepakli ne ing pamarug a pemarug da keka, oneng ala ka pang matulid ban magsaya. Potang mate ya ing metung a ubingan, atin namang lunto a lalung mabagsik. Miyayapsa ya king ebun na ning ubingan ing metung a dragon a susulapo.

³⁰ Maging metung yang pastul ing Ginu para karing pakakalulu na ning balen na at paburen na lang mibiebie payapa. Oneng kekayung tau Filistia, parala yang danup ing Ginu at alang mitagan mabie metung man kekayu.

³¹ Ikayung sablang siudad na ning Filistia, ngulangul kayu at papiglo maniawad saup! Ikayung sabla, galgal kayu king takut! Uling datang ing makapal a alikabuk a manibat king norti, sundalus la at alang mataloti karela.

³² Makananu ta lang pakibatan ding tubud a daratang kekatamu a ibat Filistia? Sabian tamu karela king telakad na ne ning Ginu ing Zion, at manakit na lang kapasnon karin ding taung pinili na a daralan king kasakitan.