Isaias 13 - Ing Mayap a Balita Biblia

Parusan ne ning Dios ing Babilonia

¹ Iti ya ing mensahi na ning Dios tungkul king Babilonia a tinggap nang Isaias, ing anak nang Amoz.

² Itas ye ing bandera babo ning malanging bunduk-bundukan! Kulisak kayu karing sundalus at ipepe yu la ding gamat yu bilang senias karela ban lusuban da la ring pasbul dalan na ning siudad a palalu.

³ Inaus na la ning Ginu ding magaling at tapat nang sundalus ban makilaban king metung a banal a gera at parusan la ding kamuan na.

⁴ Pakiramdaman yu ing inge a manibat karing bunduk, ing inge ding dakal a tau, ing inge ding bansa at kayarian a mitipun-tipun. Magsadia ya ing Ginu da ring e mabilang-bilang a sundalus ban iparala na la king labanan ding sundalus na.

⁵ Daratang lang ibat karing marayung bansa at karing wakas na ning yatu. King mua na, daratang ya ing Ginu ban lasakan ne ing mabilug a bansa.

⁶ Ngulangul kayu uling ing aldo ning Ginu malapit ne, ing aldo a magdalang kasiran ning Mayupaya!

⁷ Mangalambut la at mina ya lub ing metung at metung.

⁸ Mitakutan la ngan at misakitan anti ing kasakitan na ning babaing manganak. Milalawayan la at king mitmung takut lare la lupa uli na ning dine ra.

⁹ Daratang ne ing aldo ning Ginu, ing aldo ning pamanablas na at mabagsik a mua. Maging anti ya king disyerto ing yatu at mate ya ing ninumang makasalanan.

¹⁰ Tuknang lang saslag ding batuin na ning banua; kulimlim ya ing aldo potang sunlag ya at e na ibie ning bulan ing sala na.

¹¹ Ngana ning Ginu, Parala kung kapahamakan king yatu at parusan ku la ngan ding taung e mayap uli da ring kasalanan da. Isaldak ke ing ninumang mapagmatas at parusan ke ing ninumang palalu at mabagsik.

¹² Mas ditak la ding miligtas kesa king gintung malagad atagpuan king Ofir.

¹³ Pagalgalan ke ing mabilug a yatu at miyalis ya ing yatu king kabilian na. Mapalyari iti king aldo a aku, ing Ginung Mayupaya, ipakit ku ing kanakung mua.

¹⁴ Mamulayi lang muli ding dayuan a manuknangan king Babilonia karing sarasarili dang bansa; misalbag lang anti ding usang tatakas karing mangasu at mangari lang tupang alang pastul.

¹⁵ Matabak ya at mate ing ninumang mayakit at marakap.

¹⁶ Ala lang akarapat potang king akakit da mapirasu la ding karelang anak a malati, panakawanan da la ring bale ra at salbahian da la ring karelang asawang babai.

¹⁷ Ngana ning Ginu, Susulsulan ku la ding tau na ning Medes ban lusuban de ing Babilonia. E la mahilig deti king pilak ni masisilo king kislap ning gintu.

¹⁸ Paten da la ring kayanakan a lalaki king kapamilatan da ring karelang pana at paslu. E ra la pakitanan lunus ding bingut at ding anak a malati.

¹⁹ Karing sablang kayarian, ing Babilonia ya ing malagung dili; ya ing pagmaragul da ring memalen na. Oneng aku, ing Ginu, ibagsak ke ing Babilonia anti ing depat ku king Sodoma at Gomorra!

²⁰ Ala nang manuknangan pa karin. Ala nang tau Arabia a maglakbe at manalakad tolda at ala nang magpastul pang tupa karin.

²¹ Maging lugal yang pagdatunan da ring malyap a animal at pipanialen da ring kulayu. Manuknangan la naman karin ding ayup a ostrich at mamaglundag la ding malyap a kambing.

²² Maramdam karing tore at palasyu ing bitaul da ring animal a hiyena ampon asung-gubat. Miras na ing oras ning Babilonia! Malapit na lang miwakasan ding aldo na.