Hosea 6 - Ing Mayap a Balita Biblia

Ing E Laus lub a Pamanisi da ring Israelita

¹ Ngara ding tau, Tara, magbalik ta na king Ginu! Penasakit na katamu, oneng siguradung uluan na katamu; sinugat na katamu, oneng bendahan na la ding sugat tamu.

² Biayan na katamu kaybat ding adua o atlung aldo at mibiebie tamu arapan na.

³ Magkapilit tamung abalu ta ya. Siguradu yang datang kekatamu antimo nung makananu yang daratang ing abak. Datang ya kekatamu anti ing uran a didilig king yatu king panaun ning kauran.

⁴ Nganang sasabi ning Ginu, Israel at Juda, nanu ing daptan ku kekayu? Agad mawawala ing lugud yu kanaku, kalupa na ning ulap neng abak, at lalbug anting ambun ning abak a maranun.

⁵ Inya tinubud ku la ding kanakung propeta kekayu a magdala king kanakung amanung kayatulan at kasiran laban kekayu. Ing parapat ku kekayu malino at mayan daptan.

⁶ Ing buri ku ya ing lugud yung e kukupas, aliwa ding animal a iyain yu kanaku. Mas buri ku ing abalu da ku ring taung kanakung pinili kesa king duluk lang ain para kanaku.

⁷ Oneng lebagan de ing kasunduan kalub da reting tau king bansang Adan.

⁸ Mitmu ya ing siudad ning Gilead karing taung e mayap at karing taung makamate kalupang tau.

⁹ Mengari no man ding pari karing tulisan a manenayang maniabat king taung maging biktima ra. Agyang king dalan papunta king banal a lugal ning Sikem darapat lang pamakamate tau. At sasarian dang daraptan iting e mayap!

¹⁰ Karumaldumal ing ikit ku king Israel; dinatan da ring taung kanakung pinili ing karelang sarili king kapamilatan na ning karelang pamanyambang idolo.

¹¹ At ikayu namang memalen na ning Juda, atin kung telagang panaun ban parusan da kayu king e mayap yung gagawan.