Hosea 12 - Ing Mayap a Balita Biblia

¹ Pawang alang ulaga at makasira ing sablang daraptan da ring memalen na ning Israel manibat king abak anggang bengi. Merakal ing kataksilan at ing katampalasanan. Gagawa lang kasunduan king Asiria, at makipagkalakalan lang laru king Ehipto.

² Atin yang sumbung ing Ginu laban karing memalen na ning Juda; parusan nia naman ing Israel uli na ning e ustung ugali da ring memalen na. Papamayaran na la king depat da.

³ Mekilaban ya ing makatua dang i Jacob king kakambal nang i Esau kabang atyu la pa kilub nang atian ning ima ra; inyang meragul ne i Jacob, lebanan ne ing Dios.

⁴ Mekibatbatan ya king metung a anghel at miniambut ya. Menangis ya i Jacob at meniawad yang bendisyun. Dinatang ya ing Dios karin king Betel, at migsalita ya kang Jacob.

⁵ Ya ing Ginu, ing Dios a Mayupaya; Ginu ing lagyung iyaus da king Dios king oras ning pamanyamba.

⁶ Inya ngeni, ikayung lahi nang Jacob, manalig kayu at magbalik king kekayung Dios. Maging tapat kayu at patupad yu ing hustisia, at isundu ing pamanaya king kekayung Dios.

Karagdagan a Amanu tungkul king Kayatulan

⁷ Ngana ning Ginu, Mapamirait la ding memalen na ning Israel; anti la karing taung Cananeo. Maburi la karing e ustung timbangan ban piraitnan da la ring maniali karela.

⁸ Oneng sasabian da, Mabandi kami! Misuerti kami! At ala ninuman a makasabi king mibandi kami king e ustung paralan.

⁹ Aku ing Ginung kekayung Dios a milual kekayu ibat karin Ehipto. Papanuknanganan da kayung pasibayu karing tolda a antimo ing kabilian yu kanitang detangan da kayu karin king disyerto.

¹⁰ Migsalita ku karing propeta at dininan ku lang dakal a vision, at minie kung babala king balen ku king kapamilatan da ring propeta.

¹¹ Makanyan man, atin pang sasambang idolo karin king Gilead; mate la detang sasamba kareti. Miyayain la ding baka bilang ain-sakripisyu karin Gilgal, inya maging buntun lang batu ding altar karin king libutad ning marangle.

¹² Tinakas yang minta king bansang Aram ing kekatamung makatuang i Jacob, at pistulan na la karin ding tupa na ning aliwang tau ban makapakiasawa ya.

¹³ Mitubud yang propeta ing Ginu ban ilako ne ing balen ning Israel king panga-ipus na karin Ehipto, at ban ingatan ne.

¹⁴ Pepamuan deng e mu makanyan-kanyan ding memalen na ning Israel ing Ginu; mangaintulid kamatayan ing depat da at e na la patawaran ning Dios. Parusan na la uli na ning kalapastanganan a depat da king Dios.