Hosea 1 - Ing Mayap a Balita Biblia

¹ Iti ya ing mensahi a binie na ning Ginu kang Hosea a anak nang Beeri. Miyabie ya kanitang kapanaunan da ring Aring Uzzia, Jotam, Ahaz, at Hezekia ning Juda, at kanitang i Jeroboam a anak nang Jeoas ya naman ing ari ning Israel.

Ing Asawa na at ding Anak nang Hosea

² Ngana ning Ginu kang Hosea kanitang kapupurmeruan nang migsalita king Israel king kapamilatan na, Sulung, makiasawa ka; oneng pagtaksilan na ka ning maging asawa mu at mamuli la ding anak mu king ugali nang ima ra. Makanyan ing depat da kanaku ding taung pinili ku; gilutan da ku at pigtaksilan.

³ Makanyan yang mekapakiasawa i Hosea kang Gomer a anak nang Diblaim. Inyang beit na neng Gomer ing pangane rang anak a lalaki,

⁴ nganang sinabi ning Ginu kang Hosea, Pamalagyuan meng Jezreel, uling e lumuat parusan ku ne ing ari na ning Israel uli na ning pamakamate a depat ning makatua nang i Jehu karin king Jezreel. Dinan ku nang angganan ing pamamahala ra ding pamilya nang Jehu king Israel.

⁵ At king panaun a ita, ibagsak ku ing upaya nang militar ning Israel king Kapatagan ning Jezreel.

⁶ Menganak yang pasibayu i Gomer at babai ya ing anak na. Kanita ngana ning Ginu kang Hosea, Pamalagyuan meng E Liguran, uling e ku na la pakitanan pang lugud ding memalen na ning Israel at e ku na la patawaran.

⁷ Oneng atin kung lugud karing memalen na ning Juda. Aku, ing Ginung karelang Dios, iligtas ku la, oneng e king espada o pana o kabayu o karing sundalung pakasake kabayu.

⁸ Kaybat neng inawat Gomer i E Liguran, mebuktut yang pasibayu at menganak yang lalaki.

⁹ Kanita ngana ning Ginu kang Hosea, Pamalagyuan meng E Ra Kayu Memalen, uling e ku ne bansa ing Israel at aliwa na aku ing karelang Dios.

Maging Metung yang Pasibayu ing Israel

¹⁰ Maging anti la king balas ning dagat ding memalen na ning Israel; e la malyaring bilangan o sukdan man. Ngeni sasabian na ning Dios karela, E ra na kayu memalen, oneng datang ya ing aldo a sabian na karela, Ikayu ding anak na ning Dios a mabie!

¹¹ Misanmetung la ding memalen na ning Juda at ding memalen na ning Israel. Mamili lang metung a manimuna ra, at pasibayu lang dakal at lumabung king karelang bansa. Wa, maging aldo yang mapalad ing aldo nang Jezreel!