Hebreo 7 - Ing Mayap a Balita Biblia

Ing Paring i Melkisedek

¹ Iting Melkisedek ya ing ari na ning Salem at pari ne ning Kakataskatasan a Dios. Kanitang i Abraham pa-uli yang ibat king labanan nung nu na la apate ding ari, selubungan neng Melkisedek at saka ne binendisyunan.

² Binie nang Abraham kang Melkisedek ing kapulung dake na ning sablang ikua na king labanan. (Ing mumuna nang kabaldugan ning lagyung Melkisedek ya ini: Ari ning Katuliran. At uling ya ing ari na ning Salem ing lagyu na mangabaldugan ya munamang: Ari ning Kapayapan.)

³ Alang makibalu nung ninu i tata na o ima na o nung ninu ding makatua nang Melkisedek; alang piakitan tungkul king aldo nang beitan o ing aldo ning kematayan na. Kalupa na ning Anak ning Dios, manatili yang pari kapilan man.

⁴ Lawan yu nung nu ya anti karangal! Binie nang Abraham ing kapulung dake na ning ikua na king labanan. At metung yang patriarka i Abraham!

⁵ Ding mitulduan maging pari karing lahi nang Levi yuyutus na la ning Kautusan king mangolekta lang kapulung dake karing memalen na ning Israel, ngana wari, karing sarili dang kabalen, agyamang lahi na la namang Abraham.

⁶ E ya kabilang i Melkisedek karing lahi nang Levi, oneng tinanggap yang kapulung dake kang Abraham. At binendisyunan ne pa iting taung tinanggap king pangaku na ning Dios.

⁷ Alang pamagduda king ing mamendisyun maygit ya degulan kesa king bibendisyunan na.

⁸ Tau lang ating kamatayan ding Levita a kakuang kapulung dake, oneng mabie ya pa i Melkisedek angga ngeni antimo ing patutuan na ning Kasulatan.

⁹ Inya malyari munamang sabian king inyang minie yang kapulung dake i Abraham, i Levi a maki lahi karing mangolektang kapulung dake, minie ya namang kapulung dake king kapamilatan nang Abraham.

¹⁰ Uling e ya pa makabait kanita i Levi, inya malyari tamung asabi king atyu ya pa king katawan nang Abraham a makatua na, inyang iti selubungan neng Melkisedek.

¹¹ Ing pangaibie na ning Kautusan karing memalen na ning Israel menalakaran king panga-pari da ring lahi nang Levi. Ngeni, nung ing dapat da ring pari a ibat king lahi nang Levi tune maka-ibie genapan, e ne sana kailangan linto ing aliwa pang pari a e ketang panga-pari nang Aaron, nune ketang panga-pari nang Melkisedek.

¹² Uling kabud mipalitan ing panga-pari, kailangan ya namang alilan ing kautusan.

¹³ At ing Ginu tamu a amanuan na ning sablang mesabi, menibatan ya king aliwang lahi, at metung man king lahing ita alang migsilbi antimong pari.

¹⁴ Pikabaluan king mibait ya king lahi nang Juda at e ne bitasang binggitan Moises iting lahi inyang migsalita ya tungkul karing pari.

Ing Aliwang Pari a Kalupa nang Melkisedek

¹⁵ Iti lalung maging malino inyang linto ya ing aliwang pari a kalupa nang Melkisedek.

¹⁶ Meging pari ya e king kapamilatan na ning lahi na antimo ing yuyutus na ning kautusan, nune king kapamilatan na ning upaya na ning bie alang kapupusan.

¹⁷ Uling ing Kasulatan sasabian na: Pari ka kapilan man ketang panga-pari nang Melkisedek.

¹⁸ Inya linele re ing matuang tuntunan uling maina ya at alang ulaga.

¹⁹ Uling e na agawang ganap ning Kautusan nang Moises ing isanu mang bage. Ngeni mirinan tamung lalung mayap a kapanayan, at king kapamilatan na ning kapanayan a yan milalapit tamu king Dios.

²⁰ Maygit pa kaniti, sinumpa ya at mengaku ing Dios. E ya sinumpa ing Dios inyang gewa na lang pari ding lahi nang Levi.

²¹ Oneng inyang gewa neng pari i Jesus sinumpa ya at mengaku. Nganang sinabi, Ing Ginu sinumpa ya at e ya magbayung isip. Pari ka kapilan man.

²² Inya i Jesus ya naman ing garantia king makasiguru tamu king metung a lalung mayap a kasunduan.

²³ Bukud pa kanyan, ding pari a menibat king lahi nang Levi dakal lang misalasalisi uling mete la at e ra asundu ing karelang tungkulan.

²⁴ Oneng mabie ya i Jesus kapilan man at e ya miyalilan king panga-pari na.

²⁵ Inya agyu na lang iligtas ngeni at kapilan man ding sablang lalapit king Dios king kapamilatan na, uling mabie ya kapilan man ban mamilatan king arap ning Dios para karela.

²⁶ Uli na niti, matulid ing mika Pekapun tamung Pari a munie king kekatamung kailangan. Uling banal ya i Jesus; ala yang kamalian o kasalanan; mikawani ya karing taung makasalanan at mitas yang matas pa king banua.

²⁷ E re kalupa ding aliwang pekapun ding pari; e na kailangan Jesus ing miyain yang ain-sakripisyu king balang aldo para king sarili nang kasalanan at kaybat para karing kasalanan da ring tau. Miyain yang metung mung ain-sakripisyu, misan mu at para king kapilan pa man, kanitang binie na ing sarili na.

²⁸ Tutuldu yang taung maina ing Kautusan nang Moises ban maging pekapun lang pari; oneng ing pekapun ding paring pengaku na ning Dios a kayabe ning metung a sumpa a dinatang makatauli king Kautusan, ya kabud ing Anak a sakdal ganap angga man king kapilan pa man.