Genesis 41 - Ing Mayap a Balita Biblia

Melinawan na lang Jose ding Apaninap na ning Ari

¹ Kalabas da ring aduang banua, meninap ya ing ari; makatalakad ya kanu king pampang ning Ilug ning Nilo.

² Kabud-abud linto la ding pitung bakang masanting at mataba ibat king ilug at mengan la deti king dikut.

³ Kaybat na nita, sinaka la naman ibat king ilug ding pitung aliwang bakang matsura at payat at mekiagape la karing masanting at matabang baka a atyu king pampang ning ilug.

⁴ Ding payat a baka pengan da la ring pitung masanting at matabang baka. Kanita ya migising ing ari.

⁵ Mipatudtud ne naman at meninap yang pasibayu. King metung a pun ning trigu pitu lang tinalage ding linsut; masanting la at mataba ding binutil da.

⁶ Kaybat na nita, linsut la ring pitung tinalage; payat la at meduluk uli na ning pali ning angin a ibat king aslagan.

⁷ Pengan da la ring payat a tinalage ding mataba. Migising ya ing ari, at meninap ya mu pala.

⁸ E ya mipaindatun itang kayabakan. Pepatubud ya at pepayaus na la ring sablang salamangkeru at ding taung mangabiasa ning Ehipto. Kinwentu na la ning ari karela ding apaninap na, oneng ala metung man karela ing mekaibie kabaldugan karing peninap na.

⁹ Kanita linapit ya ing talapangasiwa king alak na ning ari. Ngana, Ngeni ku pu aminan ing kasalanan ku.

¹⁰ Kanitang mimua kayu kanaku at king pamuntuk da ring panadero, pepasukul yu kami king bale na ning kapitan da ring guardia.

¹¹ Misan a bengi, meninap kami at atin yang sariling kabaldugan ing balang paninap mi.

¹² Atin keng kayabe metung a baintaung Hebreo; ipus ne ning kapitan da ring guardia. Kinwentu mi la keting ipus ding apaninap mi. Binie na la kabaldugan ding paninap na ning metung at metung kekami.

¹³ At nung makananu ing binie nang kabaldugan, makanyan ing milyari; binalik yu ku king kanakung katungkulan, oneng pepabite ye ing pamuntuk da ring panadero.

¹⁴ Kanita mitubud ya ing ari at pepayaus ne i Jose. Agad-agad deng liwal king sukulan. At kaybat nang mekapamalbas at mekapanaliling imalan, minta ya king arapan na ning ari.

¹⁵ Ngana ning ari kang Jose, Meninap ku, pero alang mekaibie king kabaldugan na ning peninap ku. Abalitan ku king biasa kang munie kabaldugan karing paninap.

¹⁶ Aliwa pu aku, nganang mekibat Jose, nune ing Dios ya ing munie masanting a kabaldugan king paninap yu.

¹⁷ Kanita ngana ning ari kang Jose, Apaninap ku king makatalakad ku king pampang ning Ilug ning Nilo.

¹⁸ Sinaka la king ilug ding pitung masanting at matabang baka at mengan lang dikut.

¹⁹ Kaybat na nita, sinaka la naman ding pitung matsura at payat a baka; peka matsura lang dili karing sablang bakang ikit ku keti Ehipto.

²⁰ At pengan da la reting matsura at payat a baka ding pitung mataba.

²¹ Kaybat da lang pengan ding matabang baka, antimong alang milyari nanuman uling menatili la pa mu ring payat. At migising ku.

²² Mipatudtud kung pasibayu at oyni naman ing apaninap ku. Menakit kung pitung tinalage a linsut king metung mung tinalage ning trigu; mataba la at masanting.

²³ Kaybat na nita, menakit ku namang pitung tinalage a linsut oneng lanat la; payat la at durulukan na la ning angin ibat king aslagan.

²⁴ At pengan da la reting payat a tinalage ding pitung matabang tinalage. Sinabi ku iti karing salamangkeru, oneng ala metung man karela ing mekaibie king kabaldugan na kanaku.

²⁵ Kanita nganang Jose king ari, Metung la mu pu kabaldugan ding adua yung paninap. Pabalu na ning Dios kekayu nung nanu ing malapit na nang daptan.

²⁶ Ding pitung matabang baka, antimu rin ding pitung matabang tinalage, pitu lang banua.

²⁷ Ding pitung payat at matsurang baka at ding pitung payat a tinalage a dilukan na ning angin ibat king aslagan pitu lang banua na ning danup.

²⁸ Antimo ing asabi ku na kekayu, pabalu na kekayu ning Dios ing malapit na nang daptan.

²⁹ Kilub ding pitung banua mika labis-labis a kabiayan king mabilug a Ehipto,

^30-31 pero kalabas da reti salisi la ring pitung banua na ning danup at makalinguan ing panaun na ning labis-labis a kabiayan, uling ing danup a salisi tutu yang maragul.

³² Metung la mu pu kabaldugan ding adua yung apaninap at buri nang sabian king malapit na nang gawan ning Dios iti.

³³ Kailangan pu ing mamili kayung metung a taung biasa ampon mayagyu, at saka ye ipanibala king pinili yung tau ing Ehipto.

³⁴ Tuldu kayu pang aliwang taung mangasiwa at kuanan yu ing kalimang dake na ning pupul keti king Ehipto kilub ding pitung banuang labis-labis ing kabiayan.

³⁵ Patipun yu karela ing sablang pupul kabang labis-labis ing kabiayan, at dinan yu lang upayang tumipun king pupul at ikamalig karing siudad at saka ra ingatan.

³⁶ Iting pamangan a metipun ya ing gamitan na ning bansa kilub ding pitung banua na ning danup a miras keti Ehipto. King makanyan a paralan lang e mate king danup ding tau.

Gewa reng Talapanibala i Jose king Mabilug a Ehipto

³⁷ Aburi na ning ari at ding opisyal na iting munikala nang Jose.

³⁸ Ngana ning ari karing opisyal na, Manakit ta pa waring taung kalupa nang Jose nung kaninu ya matnube ing espiritu ning Dios?

³⁹ Kanita ngana ning ari kang Jose, Pepabalu na ning Dios keka ing sablang iti, inya mayayakit ing maygit kang biasa at magaling kesa king kenu man.

⁴⁰ Ika ing panibalan ku king bansa at pamintuan da ring sablang memalen ing balang utus mu. Bukud mung aku ing matas a upaya keka.

⁴¹ Ngeni keka ke panibala ing mabilug a Ehipto.

⁴² Kaybat na nita, likas ne ning ari ing singsing nang panatak at pepasulud ne kang Jose, at pepapiblasan neng imalan a mangamal at pepasuluran neng gintung kwintas king batal na.

⁴³ Pepagamit ne pa ing kadua nang karwahe at dininan neng guardia ban potang daratang ya mumuna ya at ikulisak na: Dinan yeng dalan, lumele kayu! Makanyan neng penibala ning ari kang Jose ing mabilug a bansa ning Ehipto.

⁴⁴ Ngana pa ning ari kang Jose, Aku ing ari; alang ninumang makatas king gamat na o bitis king mabilug a bansa ning Ehipto nung e mu paintulut.

⁴⁵ Inalilan ne lagyu ning ari i Jose; Zafenat-Panea ing pemalagyu na. Binie ne ban maging asawa na i Asenat a anak nang Potifera a pari karin Heliopolis. Makanyan yang miglakbe i Jose king mabilug a Ehipto.

⁴⁶ Atlu yang pulung banua i Jose inyang sinuyu ya king ari na ning Ehipto. Meko ya king arapan na ning ari ban libutan ne ing mabilug a Ehipto.

⁴⁷ Labis-labis ing linto pupul kilub ding pitung banua;

⁴⁸ pepatipun nang Jose iti at pepakamalig na karing siudad. Pepakamalig na king balang siudad ing pamangan a pupul da karing marangle a makapadurut kareti.

⁴⁹ Tutung dakal ing pepakamalig nang binutil, kasing dakal na ning balas ning dagat. E na na pepatakal uling binang dakal iti.

⁵⁰ Bayu dinatang ing panaun na ning danup, mika adua yang anak a lalaki i Jose kang Asenat a anak nang Potifera a pari karin Heliopolis.

⁵¹ Manase ing lagyung binie na king pangane uling ngana, Pepakalinguan na kanaku ning Dios ing sablang kasakitan ku at ding pamilya nang tata ku.

⁵² Inaus na ne mang Efraim ing kadua, uling ngana, Binendisyunan na ku ning Dios king bansa ning kanakung kasakitan.

⁵³ Mepupus la ding pitung banua na ning labis-labis a kabiayan,

⁵⁴ at kanita na la man megumpisa ding pitung banua na ning danup, antimo ing sinabi nang Jose. Dinatang ing panaun na ning danup karing sablang bansa, pero ating pamangan king mabilug a Ehipto.

⁵⁵ Sinaingsing la king ari ding tau Ehipto inyang ala na lang apangan. Sinabi na ning ari karing sablang tau Ehipto king puntalan de i Jose. Gawan yu ing nanumang sabian na kekayu, ngana karela.

⁵⁶ Inyang laganap na ing danup king mabilug a Ehipto pepabuklat na lang Jose ding kamalig, at pepasaliwan na lang pamangan ding tau Ehipto. Tutu yang mabagsik ing danup a miras king bansang Ehipto.

⁵⁷ Pigsarian de Ehipto ring memalen king mabilug a yatu i Jose ban makasali lang pamangan uling laganap ing danup.