Genesis 33 - Ing Mayap a Balita Biblia

Ing Pamikit da ri Jacob at Esau

¹ Minatna ya ampon miglalawe i Jacob at ikit neng daratang i Esau; kayabe na la ding apat a ralan a tauan na. Inya pirakerakayan na la ring anak kari Lea, Raquel, at ding aduang babaing kasese na.

² Pepaunan na la ding babaing kasese na at ding anak da; kaybat da i Lea ampon ding anak na, at keta lang tauli di Raquel at Jose.

³ Ya naman migpauna ya karela; dinuku yang makatapitu king gabun angga king milapit ya king kapatad na.

⁴ Milayi yang sinalubung i Esau; pengaul ne at inuma kabang tatangis lang parehu.

⁵ Inyang minatna ya i Esau ikit na la ding babai at ding anak. Ninu deting kayabe mu? nganang mengutang. Pekibat nang Jacob, Ila deti ring anak a malugud nang binie ning Dios king kekang talasuyu.

⁶ Kanita linapit la ding babaing kasese nang Jacob at ding anak da at dinuku la arapan na.

⁷ Linapit ya naman i Lea at ding anak na at dinuku; katataulian linapit ya i Raquel at i Jose at dinuku la naman.

⁸ Kanita kitang nang Esau, Para nanu no man ding grupung asaganan ku? Nganang mekibat Jacob, Regalu ku la keka ban milako ing mua mu kanaku.

⁹ Dakal na ku pibandian, nganang Esau, keka na mu ing pibandian mu.

¹⁰ Nganang Jacob, Nung talagang e ka mua kanaku tanggapan mu sana iting babie ku keka. Ngening tinggap mu ku balamu akakit ku ne keka ing lupa na ning Dios.

¹¹ Tanggapan mu na sana iting babie ku keka anti na ning dininan na ku ning Dios king heganaganang kailangan ku at dakal na ku pibandian. Pemilit ne angga king mebisa ya.

¹² Kanita nganang Esau, Lumakad ta na at magpauna na ku kekayu.

¹³ Pekibat nang Jacob, Balu mu, kapatad ku, maina la pamikakatawan ding anak at kailangan lang ingatan ding tupa at baka ampon ding biseru dang sususu. Pota mangamate la nung sakaling mipalalu lang lumakad kilub ning patingapun.

¹⁴ Muna na ka at tuki ku kagulutan mu. Mabagal kung lumakad; antabayanan ku la ring bakang atyu arapan ku at ding anak. Mikit ta na mu karin Seir.

¹⁵ Kanita nganang Esau, Lakuan ku la keka ding mapilan a kataung kayabe ku. Nganang Jacob, E na kailangan. Labis-labis na ing ganaka mu kanaku!

¹⁶ Kanita mu ring aldong ita tiglus nang Esau ing pamagbalik na Seir.

¹⁷ Tinaglus ya Sucot i Jacob at mitalakad yang bale na karin. Ginawa ya namang kural para karing kawan na. Iti ing sangkan nung inya ausan deng Sucot ing lugal a ita.

¹⁸ King pamagbalik na manibat Padan-aram masalese yang miras i Jacob king siudad ning Sikem a atyu king sakup ning Canaan. Telakad na la ding tolda na e binang malaut king siudad.

¹⁹ Asali ne ing gabun a pitalakaran nang tolda karing anak nang Hamor a tata nang Sikem king alagang dinalan a kapirasung pilak.

²⁰ Karin ya ginawang altar at inaus neng El, ing Dios ning Israel.