Genesis 30 - Ing Mayap a Balita Biblia

¹ Apansinan nang Raquel king e ya mikakayanak kang Jacob. Mengalalu ya king kapatad na. Kanita ngana kang Jacob, Dinan mu kung anak nung ali mate ku.

² Mimua ya i Jacob at ngana kang Raquel, Aku wari ing Dios a makiburi king e ka mikakayanak!

³ Kanita nganang Raquel, Oyni ing ipus kung i Bilha. Sipingnan me ban kanita mikayanak ku king kapamilatan na.

⁴ Binie ne i Bilha ban sipingnan neng Jacob bilang asawa na.

⁵ Mebuktut ya i Bilha at lalaki ya ing ayanak na kang Jacob.

⁶ Binie na ning Ginu ing inawad ku, nganang Raquel. Pekiramdaman na ing panalangin ku at dininan na kung anak a lalaki. Inya pemalagyuan neng Dan ing anak.

⁷ Mebuktut yang pasibayu i Bilha at lalaki ne naman ing ayanak na.

⁸ Nganang Raquel, Mekilaban kung masalese king kapatad ku at migtagumpe ku. Inya pemalagyuan neng Neftali ing anak.

⁹ Inyang akit nang Lea king e ne manganak, pepasiping ne kang Jacob ing ipus nang i Zilpa.

¹⁰ Sipingnan neng Jacob at mebuktut ya iti at mikayanak yang lalaki.

¹¹ Kasuerti ko, nganang Lea. Inya pemalagyuan neng Gad ing anak.

¹² Kanita i Zilpa a ipus nang Lea mikayanak ya pang metung kang Jacob.

¹³ Kasaya ko, nganang Lea. Ngeni ausan da kung masaya ding babai. Inya pemalagyuan neng Aser ing anak.

¹⁴ Misan a aldo, kabang papalutan da ing trigu, i Ruben a atyu king marangle menakit yang bungang mandragora. Dela na la kang ima nang i Lea. Nganang Raquel kang Lea, Dinan mu na ku mo kareng mandragorang kalap ning anak mo.

¹⁵ Pekibat nang Lea, E pa wari sapat keka ing kinua mu ne ing asawa ku at ngeni pati ding mandragora na ning anak ku kukuanan mo pa!? Nung bisa ka, nganang mekibat Raquel, bilang kalibe da ring mandragora na ning anak mu matudtud ya siping mu i Jacob ngening bengi.

¹⁶ Ketang benging ita, inyang pauli ya i Jacob ibat king marangle, seganan neng Lea. Kanaku ka sumiping ngening benging iti, ngana, uling ika ing kalibe da ring mandragora na ning anak ku. Inya ketang benging ita siniping ya i Jacob kang Lea.

¹⁷ Pekiramdaman ne ning Dios ing panalangin na; mebuktut ya at kalima ne ing anak na karing ayanak nang lalaki kang Jacob.

¹⁸ Nganang Lea, Inablasan na ku ning Dios uling binie ke king asawa ku ing kanakung ipus. Inya pemalagyuan neng Isacar ing anak.

¹⁹ Mebuktut yang pasibayu i Lea at kanam ne karing anak a lalaki ing beit na.

²⁰ Ngana, Tutu yang mal ing kalam a binie na ning Dios kanaku. Ngeni lubus na na kung luguran ning asawa ku uling anam na lang lalaki ding ayanak ku. Inya pemalagyuan neng Zebulun ing anak.

²¹ Katataulian mikayanak yang babai at pemalagyuan neng Dina.

²² Kanita melunus ya ing Dios kang Raquel. Pekiramdaman na ing panalangin na at leko ne pangabaug.

²³ Mebuktut ya at mikayanak yang lalaki. Ngana, Leko na ning Dios ing kamarinayan ku.

²⁴ Inya pemalagyuan neng Jose. Ngana wari, Dinan na ku pa sana ning Ginu metung pang anak a lalaki.

Ing Kasunduan da ri Jacob at Laban

²⁵ Kaybat neng beit Raquel i Jose, nganang Jacob kang Laban, Paintulutan yu kung muli king balen kung tibuan.

²⁶ Paintulut yu sana ing ituki ku la ding anak ku at asawa uling sinuyu na ku man kekayu para karela. E naman makalingad kekayu nung makananu ra kayung masalese siyuan.

²⁷ Pekibat nang Laban, Jacob, oyni ing asabi ku keka. Apibulebule ku king kakung sibukan king binendisyunan na ku ning Ginu king uli mu.

²⁸ Sabian mu ing upang buri mu at ita ing ibie ku keka.

²⁹ Pekibat nang Jacob, Balu yu nung makananu kung mekipagobra kekayu at nung nu anti karagul ing pamagmalasakit ku karing sese yung animal.

³⁰ Ditak mu kanita ing bandi yu, oneng dakal na ngeni. Binendisyunan na kayu ning Ginu manibat na kanitang akayabe yu ku. Kapilan ku pa manatagan para king sarili kung pamilya?

³¹ Nganang kinutang Laban, Nanu ngeni ing sukat kung iyupa keka? E kailangan ing bayaran yu ku; pastulan ku la mu rin at sesen ding kawan yu, nung mabisa kayu king ipakisabi ku kekayu, nganang Jacob.

³² Puntalan ku la ngeni ding tupa yu at ikawani ke ing balang tupang maki pultik a matuling at balang tupang matuling at ing balang kambing a maki tagpi at pultik-pultikan karing kanakung kambing. Ila deti ring maging kanakung upa.

³³ King daratang a panaun, potang lawan yu la deting upa ku, abalu yu nung tapat ku kekayu o ali. Nung ala yang tagpi o pultikan ya ing kambing at nung e ya matuling ing tupa iti penako ya!

³⁴ Mekibat ya i Laban, Wa, buri ku ing sinabi mu! Iti ya ing gawan ta.

³⁵ Keta mu ring aldong ita kelilua na lang Laban ding maki tagpi at pultik-pultikan karing kambing, potru ya man o gaindu, antimu rin ding matuling a tupa at saka na la pepasese karing anak na.

³⁶ Linaut ya kang Jacob; ing laut na kalupa na ning dasnan na ning taung maglakad atlung aldo. At pistulan na lang Jacob ding mitagan karing kawan nang Laban.

³⁷ Kanita memakli yang sagiwang sanga i Jacob karing tanaman a ausan dang alamo, almendro, at kastanyo; belatan na la angga king linto ing gulis-gulisan a maputi.

³⁸ Binili na la deting sangang belatan na king lugal nung nu la miminum ding animal ban potang miminum la akit da la reti. Binili na la karin uling mipangasta la karin ding animal

³⁹ potang daratang la ban minum. Inya akaglian da la ring sanga at meging gulis-gulisan la, pultik-pultikan, at tagpi-tagpi.

⁴⁰ Kelilua na lang Jacob ding tupa ampon ding kambing at binili na la king metung a lugal; ita sanang akakit da la ring maki tagpi at matuling a animal a sese nang Laban. Makanyan yang mika sariling kawan i Jacob, at e na la pekiabe deti karing kawan nang Laban.

⁴¹ Antimu rin, potang mipangasta la ring mangasikan a animal, bibili na lang Jacob ding sanga king arapan da reting animal ba lang miyayasawa lele da reting sanga.

⁴² Oneng e ya mibiling sanga arapan da ring maina. Makanyan lang miras kang Laban ding animal a mangaina, samantalang miras la ngan kang Jacob ding animal a mangasikan.

⁴³ Makanyan yang mibandi i Jacob; merakal la ding kawan na at merakal la naman ding ipus nang lalaki at babai, kamelyu, at asno.