Genesis 3 - Ing Mayap a Balita Biblia

Ing Panganabu na ning Tau king Kasalanan

¹ Ngeni, ing ubingan ya ing mautak dili karing animal a lelangan na ning Ginung Dios. Nganang mengutang ning ubingan king babai, Tutu pin king binawal na kayung mangan ning Dios king isanu pa mang bungang tanaman king mulahan?

² Pekibat na ning babai king ubingan, Malyari keng mangan karing bunga da ring tanaman king mulahan;

³ subali mu king bunga na ning tanaman a atyu king libutad ning mulahan. Sinabi na ning Dios king e mi ya kakanan a bunga ni tatagkilan man. Kabud daptan yu ita, ngana, mate kayu.

⁴ Oneng ngana ning ubingan king babai, E tutu yan. E kayu mate!

⁵ Balu na ning Dios king kabud mangan kayu maging anti kayung Dios at mibuklat kayu mata, at abalu yu ing mayap at ing e mayap.

⁶ Ikit na ning babai king masanting yang lalawan ing tanaman at maniaman yang kanan a bunga at dapat yang pagnasan uling babie yang kabiasnan. Inya kinangwa ya karing bunga na at pengan ne; dininan nia naman ing asawa na at mengan ya.

⁷ Kanita mu rin mibuklat la mata at ikit da ing lubas la. Inya pitungi da la ring bulung higera ban takpan ing sarili da.

⁸ Inyang damdaman deng lalakad king mulahan ing Ginung Dios king marimla nang dake ning patingapun, sinalikut ya ing lalaki at ing asawa na king Ginung Dios libutad ding tanaman ning mulahan.

⁹ Kanita inaus ne ning Ginung Dios ing lalaki at kitnan ne, Nu ka karin?

¹⁰ Pekibat na, Dimdam da kayu king mulahan, oneng tatakut ku uling lubas ku. Inya sinalikut ku.

¹¹ Kanita kitang na ning Dios, Ninu waring sinabi kekang lubas ka? Mengan ka king bunga na ning tanaman a binawal kung kanan mo?

¹² Pekibat na ning lalaki, Ing babaing binie yung maging kayabe ku ya ing minie king bunga na ning tanaman kanaku at pengan ke.

¹³ Kanita kitang na ning Ginung Dios king babai, Obat gewa mu ing anti kanyan? Pekibat ning babai, Lininlang na ku ning ubingan, inya mengan ku.

Sildak na ning Dios ing Kaparusan

¹⁴ Kanita ngana ning Ginung Dios king ubingan, King gewa mung yan misumpa ka; karing heganaganang animal ika mung bukud ing misumpang anti kaniti: manibat ngeni gumapang ka king kapamilatan na ning kekang atian at alikabuk ing kekang kanan kabang mabie ka.

¹⁵ Mikasama kayu ning babai; milaban la ding anak na at ding anak mu. Lasawan de ring anak na ing buntuk mu, at tuktukan mu no man ding sakung da.

¹⁶ Ngana naman king babai, Dagdagan ku ing kasakitan mu king kekang pamanganak; king sakit ibait mu la ding anak mu. Makanyan man pagnasan me pa mu rin ing asawa mu at pailalam ka king upaya na.

¹⁷ Ngana namang sinabi king lalaki, Uling mekiramdam ka king asawa mu at mengan king bunga ning tanaman a binawal kung kanan mu, misumpa ya ing gabun uli mu. Kailangan kang magal ba mung apangan ing bunga na kabang mabie ka.

¹⁸ Palto yang dikut at tanaman a masuksuk at mangan kang tanaman gubat.

¹⁹ Mika pamangan ka kapamilatan na ning tulu ning pawas mu angga king magbalik ka king gabun nung nu ka ibat, uling king gabun ka ibat, king gabun ka naman mibalik.

²⁰ Pemalagyuan neng Eva ning lalaki ing asawa na uling ya ing meging ima na ning meto ketawan.

²¹ Ginawa yang imalan ing Ginung Dios a ibat king balat animal at piniblasan na la.

Mitabi la ri Adan at Eva king Mulahan

²² Kanita ngana ning Ginung Dios, Oyni ing tau; meging kalupa ta ne. Balu na na ing mayap at ing e mayap. Inya e ya sukat mipaintulutan kumang bunga king tanaman na ning bie at mangan kaniti at e mate kapilan man.

²³ Inya tinabi ne ning Ginung Dios ing tau king Mula ning Eden ban tamnan ne ing gabun a penibatan na.

²⁴ Tinabi ne king mulahan ing tau at dela ne king bandang aslagan na ning Mula ning Eden at mibili yang kerubin at metung a espadang milalablab mamarap nu man karin ban magbante king dalan papunta king tanaman na ning bie.