Genesis 2 - Ing Mayap a Balita Biblia

¹ Makanyan na lang inari ning Dios ding banua at ing yatu ampon ing heganaganang atyu kareti.

² Ayari na ning Dios ing dapat na kilub ding anam a aldo, at kaybat pepaynawa ya king kapitung aldo king sablang bage depat na.

³ Binendisyunan ne ing kapitung aldo at gewa neng banal, uling king aldong ita ya pepaynawa king heganaganang dapat na king pamaglalang.

⁴ Ita ya ing istoria na ning pangalalang ning banua at yatu. Kanitang lalangan ne ning Ginung Dios ing yatu at ing banua,

Ing Kaduang Istoria na ning Pamaglalang

⁵ alang nanu pa mang tanaman king yatu at ala pang dikut a tutubu king marangle, uling e ya pa pepauran ing Ginung Dios king yatu at ala pang taung manasik king gabun.

⁶ Oneng atin namang sibul a manibatan king gabun at peparanuman na ing gabun.

⁷ Inubug ne ning Ginung Dios ing tau ibat king alikabuk at pengisnawanan ne arung king pangisnawa ning bie, at mika bie ya ing tau.

⁸ Kanita mibili yang metung a mulahan ing Ginung Dios karin king Eden, king aslagan, at binili ne karin ing taung inubug na.

⁹ Pepatubuan na la ning Ginung Dios king gabun ding miyayaliwang tanaman a makayamang lalawan at maniaman kakanan at ing tanaman ning bie a atyu libutad na ning mulahan, at ing tanaman ning beluan tungkul king mayap at e mayap.

¹⁰ Ating metung a ilug king Eden a paranum king mulahan; ibat karin meging apat yang sanga ing ilug.

¹¹ Pison ing lagyu na ning mumuna; mamagus ya king mabilug nang gabun ning Havila nung nu ating gintu.

¹² Tutung masanting ing gintu ning lugal a ita; atin munamang bedelio at mal a batung onyx karin.

¹³ Gihon ing lagyu na ning kaduang ilug; mamagus ya king gabun ning Cus.

¹⁴ Tigris ing lagyu na ning katlu; mamagus ya banda nang aslagan ning Asiria. At ing kapat a ilug ya ing Eufrates.

¹⁵ Binili ne karin ning Ginung Dios ing tau at pepatuknangan ne king mula na ning Eden ban gambulan ne at ingatan.

¹⁶ Nganang minutus ning Ginung Dios king tau, Malyari kang mangan king isanu pa mang tanaman king mulahan,

¹⁷ subali mu ing tanaman na ning beluan tungkul king mayap at e mayap. E ka mamangan king bunga na ning tanaman a ita. Mate ka kabud mengan ka king bunga na.

¹⁸ Kanita ngana ning Ginung Dios, E mayap ing magdili-dili ya ing lalaki. Lalang kung karapatdapat a akayabe na.

¹⁹ Inya ibat king gabun ing Ginung Dios miyubug yang miyayaliwang animal at miyayaliwang ayup. Dela na la king lalaki ban lawan na nung nanung iyaus na kareti. Ing lagyung binie na king balang metung kareti ya ing meging lagyu na.

²⁰ Dininan na lang lagyu ning lalaki ding heganaganang animal at ding ayup; oneng metung man kareti alang meging karapatdapat maging akayabe na.

²¹ Inya pepatudturan neng maniaman ning Ginung Dios ing lalaki, at kabang matudtud ya kinua ne ing metung karing tagyang na at sera ne laman ing lugal a pibatan na.

²² Kanita gewa neng babai ning Ginung Dios ing tagyang a kinua na king lalaki. Dela ne king lalaki at

²³ ngana ning lalaki, Iti kabud ing butul ning kakung butul, at laman ning kakung laman; mayaus yang babai, uling ibat ya king lalaki.

²⁴ Iti ing sangkan nung inya ing lalaki lakuan ne i tata na at ima na at makiabe ya king asawa na, at ilang adua maging metung na la mung katawan.

²⁵ Lubas ya ing lalaki at ing asawa na, oneng e ra pikarine iti.