Genesis 12 - Ing Mayap a Balita Biblia

Inaus ne ning Dios i Abram

¹ Ngana ning Ginu kang Abram, Lakuan me ing balen mu, ding kamaganak mu, at ing pibalebale nang tata mu, at munta ka king bansang ituldu ku keka.

² Gawan da kang metung a maragul a bansa at bendisyunan da ka. Maging pikabaluan ka lagyu at manatad kang bendisyun.

³ Bendisyunan ku la ding mamendisyun keka, oneng isumpa ku la ding maniumpa keka. At kapamilatan mu bendisyunan ku la ding sablang bansa.

⁴ Meko ya i Abram antimo ing inutus na ning Ginu. Kayabe neng meko i Lot. Pitu yang pulu't limang banua i Abram inyang meko ya king Haran.

⁵ Tiki ne ing asawa nang i Sarai, ing pangunakan nang i Lot, ing heganaganang pibandian a atipun da at ding heganaganang ipus a meging bandi ra karin Haran. At miglakbe lang papunta king sakup ning Canaan. Karas da king sakup ning Canaan,

⁶ libutan neng Abram angga king miras ya king lele na ning sagradung tanaman ning More, ing banal a lugal karin Sikem. (Manuknangan la pa kanita karin ding Cananeo.)

⁷ Pepakit ya karin ing Ginu kang Abram at ngana, Ibie ke ing gabun a iti karing kekang maging lahi. Karin mitalakad yang altar para king Ginung pepakit kang Abram.

⁸ Ibat karin sinulung ya pa at miras king mabunduk a lugal king dane nang aslagan ning Betel. Telakad ne ing tolda na pilatan na ning Betel, king dane albugan at ning Ai king dane aslagan. Mitalakad yang altar karin para king Ginu at menalangin ya king lagyu na ning Ginu.

⁹ Kaybat na nita, sindu na ing pamaglakad na at miras ya banda nang mauli ning Canaan.

Ing Pamamunta nang Abram king Ehipto

¹⁰ Mika maragul a danup king sakup na ning Canaan. Minta ya i Abram king Ehipto ban karin manuknangan uling tutung maragul ing danup.

¹¹ Inyang malapit na la Ehipto ngana king asawa nang i Sarai, Balu kung malagu kang babai.

¹² Potang akit da ka ding tau Ehipto sabian da, Asawa neng Abram yan. Kaybat paten da ku, oneng ika e ra ka nanan a balang.

¹³ Ipakisabi ku keka king sabian mu sana ing kapatad mu ku ban uli mu e ra ku paten at pakiabayan da kung masalese.

¹⁴ Inyang miras la Ehipto, ikit da ring tau Ehipto king malagu yang babai i Sarai.

¹⁵ Panakit da ring panibalan na ning ari, belita re at pemuri arapan ning ari. Kaybat tiki da ne king palasyu na ning ari.

¹⁶ Uli nang Sarai mesalese ya kabilian i Abram. Dininan deng tupa, kambing, baka, asno, kamelyu, at ipus a lalaki at babai.

¹⁷ Oneng pepagpa yang mangabayat a parusa ing Ginu king ari at king pibalebale na uli na ning kinua ne i Sarai a asawa nang Abram.

¹⁸ Kanita pepayaus ne ning ari i Abram at ngana, Abram, nanu iting depat mu kanaku! Obat e mu sinabing asawa me?

¹⁹ Obat sinabi mung kapatad me? Kinua ke mo bilang asawa ku. Ngeni oyni ing asawa mo! Kuanan mu ne at mako na kayu!

²⁰ Inutus na ning ari karing tauan na ing paburen da na lang mako a darala ing heganaganang pibandian da.