Filemon 1 - Ing Mayap a Balita Biblia

¹ Ibat ya iting sulat kang Pablo a ngeni makasukul uli nang Cristo Jesus, at ibat ya naman king kapatad tamung i Timoteo. Miparala ya kang Filemon a pakamalan ming kakaluguran at kalupang talapagobra,

² at king iglesiang mipupulung king bale na ampon kang Apia a kaluguran ming kapatad a babai, at kang Arkipo a sundalung kalupa mi.

³ Dinan na kayu sanang grasya at kapayapan ning Dios a Ibpa tamu at ning Ginung Jesu-Cristo.

Ing Lugud na at Kasalpantayanan Filemon

⁴ Kapatad a Filemon, balang manalangin ku, babanggitan da ka at pasalamat ku king kanakung Dios

⁵ uling ababalitan ku ing lugud a papakit mu karing taung pinili na ning Dios, at ing kasalpantayanan mu king Ginung Jesus.

⁶ Ipanalangin ku king kabang darake mu karing aliwa ing kasalpantayanan mu akilala ra sa ing sablang mayap a atyu kekatamu a bunga na ning pangayabe tamu kang Cristo.

⁷ Kaluguran kung kapatad, dirinan na kung maragul a tula at sikanan lub ning lugud mu kanaku! Peligayan mu la ding sablang pinili na ning Dios.

Metung a Kayaduanan para kang Onesimo

⁸ Uli na niti, agyamang katuliran ku bilang kapatad mu kang Cristo, ing utusan da kang dapat king sukat mung daptan,

⁹ makanyan man, aku, i Pablo a ngeni matua na, at king kasalukuyan makasukul uli nang Cristo Jesus, pakisabian da kang mayap king lagyu na ning pamikalugud.

¹⁰ Makisabi kung mayap keka para kang Onesimo a ayagkat ku king kasalpantayanan kang Cristo kabang atyu ku keni king sukulan.

¹¹ Kanitang milabas ala yang meging kasilbian keka, oneng ngeni mika kasilbian ya keka antimo nung makananu keng pekinabangnan keni.

¹² Babalik ke keka at kayabe na ya ing mismung pusu ku.

¹³ Buri ke sanang manatiling kayabe ku keni, kabang makasukul ku uli na ning Mayap a Balita, bilang kayalili mu a sumaup kanaku.

¹⁴ Makanyan man, e ku buri ing anti da kang pamilitan sumaup kanaku. Nung saupan mu ku, buri ku ing kusang lub a manibatan keka. Inya e ku daptan ing nanuman nung e mu kaburian.

¹⁵ Balu ku king mewala ya keka i Onesimo king mapilan a panaun. E bala ita nung mewala ya man sinaguli, uling ngeni magbalik ya keka at e na mawala kapilan man.

¹⁶ Magbalik ya keka e mu anting ipus, nune maygit pa king ipus uling metung ya ngening kapatad a pakamalan. Mal ya kanaku; oneng sukat yang lalung maging mal keka bilang kalupa mung tau at kapatad king Ginu!

¹⁷ Inya, nung tuturing mu kung kapatad, tanggapan me sa antimo nung makananu mu kung tatanggapan.

¹⁸ Nung atin ya mang pinerhuisyu keka o atin yang utang keka, aku na ing mamayad.

¹⁹ Oyni, susulat ku king sarili kung gamat: Aku, i Pablo, bayaran da ka. (E ku na kailangan pang ipaganaka keka king ing kabud bie mu pikakautangan mung lub kanaku.)

²⁰ Uli na nita, kapatad ku, daptanan mu ku sanang mayap kaniti alang-alang king Ginu. E mu ku sa bibiguan bilang kapatad mu kang Cristo!

²¹ Paniwalan ku, kabang susulat ku iti, ing e mu pagkaymut daptan ing aduan ku keka; mapalyaring maygit pa king aduan ku ing daptan mu.

²² Isadia mu ku naman sanang apituknanganan ku uling panaligan ku king dinan na kung panaun ning Dios makapagbalik ken antimo ing ipanalangin yu.

Paniarang Pamagmananu

²³ Pakomusta na kayung Epafras a kayabe kung makasukul king uli nang Cristo Jesus;

²⁴ antimu rin, di Marcos, Aristarco, Demas, at i Lucas a kayabe kung talapagobra.

²⁵ Ing grasya na ning Ginung Jesu-Cristo manatili kekayu ngan.