Ezra 7 - Ing Mayap a Balita Biblia

Dinatang Ya i Ezra king Jerusalem

¹ Kaybat na ning mapilan a panaun, inyang i Artaxerxes ya ing ari ning Persia, ating metung a lalaking milagyuan Ezra; anak neng Seraia a anak nang Azaria. I Azaria anak neng Hilkia at

² i Hilkia anak neng Sallum. I Sallum naman anak neng Zadok a anak nang Ahitub.

³ I Ahitub naman anak neng Amaria a anak nang Azaria. I Azaria anak neng Meraiot

⁴ a anak nang Zerahia a anak nang Uzzi a anak nang Buki.

⁵ I Buki naman anak neng Abisua a anak nang Fineas. I Fineas anak neng Eleazar a anak nang Aaron, ing pekapun da ring pari.

⁶ Dinatang ya iting i Ezra ibat Babilonia. Talasulat ya at tune biasa king Kautusan nang Moises a binie na ning Ginu, ing Dios ning Israel. Babie na ning ari ing nanumang aduan nang Ezra uling patnubayan ne ning Ginung Dios na.

⁷ Dinatang ya ibat Babilonia i Ezra kanitang kapitung banua nang panga-aring Artaxerxes. Kayabe na lang dinatang ding mapilan a Israelita, ding pari, at Levita, at ding talapagkanta ning Templo, at ding guardia karing pasbul dalan ning Templo, at ding kasaup king Templo.

⁸ Meko la Babilonia kanitang mumunang aldo ning mumunang bulan,

⁹ at king saup ning Dios miras la Jerusalem king mumuna nang aldo ning kalimang bulan, king kapitung banua nang panga-aring Artaxerxes.

¹⁰ Telaga nang Ezra ing mabilug nang pangatau king pamagaral king Kautusan ning Ginu, king tuparan ya iti at ituru karing Israelita.

Ding Dokumento a Binie nang Aring Artaxerxes kang Ezra

¹¹ Iti ya ing kopia king sulat a binie nang Aring Artaxerxes kang Ezra a pari, ing talasulat, at ing biasa karing Kautusan ning Dios a binie na king Israel:

¹² Ibat ya iting sulat king Aring Artaxerxes, ing ari da ring ari, at miparala ya kang Ezra, ing pari, ing talasulat at biasa king Kautusan ning Dios ning Banua.

¹³ Iyutus ku king malyari yang tuki keka king Jerusalem ing ninumang bisa karing Israelita o pari o Levita ning kakung kayarian.

¹⁴ Aku at ding pitu kung tagapayu tutubud da ka ban lawan ing kabilian na ning Juda at ning Jerusalem agpang king Kautusan ning Dios mu a mipaniwala keka.

¹⁵ Idala mu la ding pilak at gintu a babie mi king Dios ning Israel king Templo nang tuknangan a atyu Jerusalem.

¹⁶ Idala mu munaman karin ing sablang pilak at gintu a akit mu king mabilug nang probinsia ning Babilonia, at ing kusang lub a ain da ring Israelita at pari a matula rang babie para king Templo ning karelang Dios karin king Jerusalem.

¹⁷ King mitmung kaingatan gamitan mu la deting salapi king pamanialing biserung toro, lalaking tupa, biserung tupa, binutil ampon alak at kaybat iyain mu la king altar na ning Templo ning kekang Dios karin Jerusalem.

¹⁸ Malyari mu lang gamitan ding mitagan a pilak at gintu para king nanumang isipan mung mayap, at ding kabalen mu, agpang king kaburian ning kekayung Dios.

¹⁹ Idala mu la naman king Templo ning kekayung Dios ding kasangkapan a miyabie kekayu para gamitan karing kasuyuan king Templo.

²⁰ At nung atin pang aliwang kailangan ning Templo ning Dios, malyari mung kuanan king talaingat-bandi na ning ari.

²¹ Karing talaingat-bandi na ning probinsia dane Albugan ning Ilug ning Eufrates, iyutus ku king ibie ra king malaguang panaun ing sablang aduan nang Ezra, ing pari, ing talasulat, at ing biasa king Kautusan ning Dios ning Banua.

²² Dinan yeng anggang pitung libu at limang dalan a librang pilak, limang dalan a takal a trigu, limang dalan at limang pulung galun a alak, limang dalan at limang pulung galun a larung olibo, at asin anggang bisa ya.

²³ Pamintuan yu king mitmung kataimtiman ing sablang iyutus na ning Dios ning Banua ban e ya mimua kanaku at karing anak kung lalaki.

²⁴ Buri ku namang ipabalu kekayu king bawal ing singil nanumang buis karing pari, karing Levita, karing talapagkanta, karing guardia karing pasbul dalan, at karing kasaup king Templo o king ninumang magobra king Templo ning Dios.

²⁵ At ika, Ezra, anti na ning dininan na kang kabiasnan ning kekang Dios, tuldu kang ukum a mamahala at matul karing sablang taung manuknangan king probinsia dane Albugan ning Ilug ning Eufrates. Sukat lang biasa deting ukum a mapili king Kautusan ning Dios, at ituru mu la detang e biasa.

²⁶ Ing ninumang e mamintu king utus ning kekang Dios at king utus ning ari agad ipatupad ing parusa, maging kamatayan o kaya iyugse ya king aliwang lugal o kuanan a pibandian o isukul.

Pinuri neng Ezra ing Dios

²⁷ Nganang mekibat Ezra, Purian ya ing Ginu, ing Dios da ring makatua tamu, uling gewa neng maganaka ing ari ban gawan neng masanting ing Templo ning Ginu karin king Jerusalem.

²⁸ Sinaupan na ku ning Ginung kakung Dios ban maging malapit ya lub kanaku ing ari, at ding tagapayu na ampon ding aliwa na pang pamuntuk. Mesikan ku lub king uli na at ikua ku lang atipun ampon apanimunan mibalik ding pamuntuk da ring pamilya nang Israel.