Ezra 5 - Ing Mayap a Balita Biblia

Mipagumpisan Pasibayu ing Obra king Templo

¹ King panaun a ita, ating aduang propeta; ila di Hageo at Zacarias a anak nang Iddo. King lagyu na ning Dios ning Israel sinabi da ing kaburian ning Dios karing Judio a manuknangan king Juda at Jerusalem.

² Inya i Zerubabel a anak nang Sealtiel, at i Jesua a anak nang Jozadak, penimunan dang pasibayu ing pangatalakad na ning Templo a atyu Jerusalem. Kayabe da la at kasaup deting aduang propeta na ning Dios.

³ Kanita mu rin minta ya Jerusalem i Tatenai, ing gobernador ning probinsia dane Albugan ning Ilug ning Eufrates, i Setar Bozenai at ding kayabe ra at ngarang kinutang, Ninu ing minie paintulut kekayu ban italakad yang pasibayu at arian ing Templong iti?

⁴ Pekiduang da la naman a lagyu ding sablang lalaking sasaup king pangatalakad na ning Templo.

⁵ Oneng makalawe ya ing Dios karing manimuna da ring Judio, inya ding tau Persiang pamuntuk e ra la pepatuknangan magobra anggang alang utus a manibat king Aring Dario.

⁶ Iti ya ing ulat a peparala da ri gobernador Tetanai, Setar Bozenai, at ding kayabe ra king ari:

⁷ Kang Aring Dario, dasan na kayu pu sana niting sulat king mitmung kapayapan.

⁸ Buri mi pung abalu yu, Kagalang-galang a Ari, king minta kami king probinsia na ning Juda, king Templo ning mayupayang Dios. Tatalakad da ne pu ngening salukuyan. Mangaragul lang tinabas a batu ding gagamitan da at tabla lang mangakapal ding gagamitan da para king dingding na. E la tutuknang magobra ding tau, inya e magluat mayari ya.

⁹ Kitang mi pu karing pamuntuk da ring tau karin nung ninu ing minie paintulut ban pagobran ya at arian ing Templo.

¹⁰ Pekiduang mi la naman karela ding lagyu da ring manimuna karela ban apabalu mi la kekayu.

¹¹ Oneng ing pakibat da pu anti ya kaniti: Talasuyu na kami ning Dios ning banua at yatu, at tatalakad mi yang pasibayu ing Templo na king sadia nang lugal nung nu ne pepatalakad karing dakal nang banuang milabas ning mayupayang ari ning Israel.

¹² Oneng pepamua re ding makatua mi ing Dios ning Banua, inya peintulut na ing mabihag la kang Aring Nebucadenesar ning Babilonia, ing Caldeo a linasak keting Templo, at dela na la ding memalen karin king Babilonia.

¹³ Makanyan man, king mumuna nang banuang pamaniakup Aring Ciro ning Persia, minie yang metung a utus ban iting Templo ning Dios mitalakad yang pasibayu.

¹⁴ At ding sablang gintu at pilak a kasangkapan ning Templo ning Jerusalem a kinua nang Nebucadenesar at dela na king templo na Babilonia sibli na lang Aring Ciro at inintriga king lalaking milagyuan Sesbazar, ing tilduan nang gobernador ning Juda.

¹⁵ Sinabi na ning ari king kuanan na la ding kasangkapan at isubli king Templo karin Jerusalem, at italakad yang pasibayu ing Templo ketang sadia nang lugal.

¹⁶ Inya minta ya i Sesbazar king Jerusalem at pepagawa na la ding pundasyun na ning Templo ning Dios, at manibat na kanita tatalakad da ne; angga man ngeni e pa meyari.

¹⁷ Inya Kagalang-galang a Ari, nung malyari pu sana, papaintun ye ing dokumento king pisisinupan ning kayarian ken king Babilonia ban abalu yu nung tutu o ali ing minie ya ping utus ing Aring Ciro tungkul king pangatalakad nang pasibayu ning Templo ning Dios karin Jerusalem. Kaybat, pabaluan yu kami pu king nanumang pasya yu tungkul kaniting pisasabian.