Exodo 34 - Ing Mayap a Balita Biblia

Ing Kaduang Kaparis a Tinabas a Batu

¹ Ngana ning Ginu kang Moises, Tumabas kang aduang batu a kalupa ra detang minuna at isulat ku la kareti detang amanung misulat karetang minunang tinabas a bilbal mu.

² Magsadia ka bukas abak at mukiat ka king Bunduk ning Sinai ban makikit kanaku karin king taluktuk na.

³ Ala kang tutuki; e ya sukat mayakit ing ninuman karin king bunduk; ala kang paburen a tupa o baka a manyibsiban king lele na ning bunduk.

⁴ Inya tinabas yang adua pang batu i Moises at itang kabukasan abak a maranun minukiat ya king Bunduk ning Sinai; bibitbitan na la ding tinabas a batu, antimo ing inutus na ning Ginu.

⁵ Tinipa ya ing Ginu king biga at tinalakad ya siping nang Moises at sinabi ne ing lagyu na: Ginu.

⁶ Linabas ya kanita ing Ginu king arapan nang Moises at kilait na, Aku, ing Ginu, metung kung Dios a mapaglunus ampon maganaka, e agad mimimua, at papakit kung maragul a lugud a e kukupas, at katapatan.

⁷ Tutupad ku king pangaku ku karing libu-libung lahi at patawaran ku ing e ustu at kasalanan, oneng siguradu ku lang parusan ding anak da at apu at pati na ding king katlu at kapat a lahi da uli na ning pamikasala ra ding pengari da.

⁸ Dinuku ya kanita i Moises king gabun at saka ya sinamba.

⁹ Nganang migsalita, Ginu, nung tutu ping tutula kayu kanaku, aduan ku ing mantabe kayu sa kekami agyang masias la buntuk ding taung deti. Patawaran yu ing e ustung gewa mi at kasalanan at tanggapan yu ke sana bilang sarili yung balen.

Ing Panga-ulit ning Kasunduan

¹⁰ Ngana ning Ginu kang Moises, Gawa ku ngening kasunduan karing memalen na ning Israel. King arapan da gawa kung miyayaliwang pagmumulalan a kapilan man e pa merapat nukarin man keti king yatu o king isanu pa mang bansa. Akit da kanita ding sablang taung makapadurut kekayu nung nanu ing agyu kung daptan, uling aku, ing Ginu, gawa kung makapangalgal a bage para kekayu.

¹¹ Pamintuan yu la ding utus a babie ku kekayu king aldo ngeni at itabi ku la ding taung darasan yu, ding Amoreo, ding Cananeo, ding Hiteo, ding Perezeo, ding Heveo, at ding Jebuseo.

¹² E kayu gagawang nanumang pamakikasundu karing manuknangan king lugal a malapit yu nang dasan, uling iti malyaring maging metung a bitag para kekayu.

¹³ Bagkus, paglasakan yu la ding altar da, itomba yu la ding sagradu rang asias a batu, at panguturan yu la ding sagradung simbulu ning diosang i Asera.

¹⁴ E kayu sasamba king isanu pa mang kikilalanan dang dios, uling aku, ing Ginu, Dios kung mapangalalu, at ing lagyu ku Mapangalalu.

¹⁵ E kayu gagawang nanumang kasunduan karing manuknangan king lugal a ita, uling potang sasamba la karing kikilalanan dang dios at babie ain-sakripisyu karela, kumbiran da kayung makiabe karela, at mayan kayung matuksung makisulung mangan king pamangan a yayain da karing kikilalanan dang dios.

¹⁶ E yu la paintulutan makiasawa ding anak yung lalaki karing karelang babai a manamuyut mu karela king pamanyamba karing kikilalanan dang dios, at uli na nita magtaksil la kanaku.

¹⁷ E kayu gagawang dios a bakal ban samban yu la.

¹⁸ Pagselebran ye ing Piesta ning Tinape Alang Lebadura. Antimo ing inutus ku na kekayu, tinape alang lebadura ing kanan yu karing pitung aldo a makatuldu king bulan ning Abib, uling king bulan a ita kanita kayu meko king Ehipto.

¹⁹ Mangaintulid ya kanaku ing balang anak a lalaking pangane at ing balang pangane lalaki karing animal a sese yu,

²⁰ oneng malyari yeng atbusan ing pangane da ring asno king pamiyain yung metung a biserung tupa. Nung e ye buring atbusan, sukat yeng paklian a batal. Kailangan yu la namang atbusan ding sablang anak yung lalaking pangane. E ya sukat lumapit kanaku ing ninuman a alang daralang ain.

²¹ Daptan yu kilub ding anam a aldo ing obra yu; paynawa kayu king kapitung aldo, agyang pang panaun na ning pamaniarul o panaun na ning pamamalut.

²² Pagselebran ye ing Piesta ning Pamamupul, potang pagumpisan yu nang palutan ing mumunang bunga na ning kekayung trigu, at pagselebran ya naman ing Piesta da ring Dalungdung king kapupusan na ning balang banua, potang pupulan yu la ding bunga yung tanaman.

²³ Sukat lang makiarap makatatlu kanaku, kilub ning pabanua ding sablang lalaki ban samba kanaku, ing Ginu, ing Dios ning Israel.

²⁴ Potang ikua ku na lang atabi ding taung darasan yu, at ikua yu neng aparagul ing bansa yu, ala nang mangangas pang salake king bansa yu king panaun da reting atlung pamagselebra.

²⁵ E kayu mamain tinape a ating lebadura neng miyayain kayung animal kanaku. E ye paburen miras mikabukasan ing isanu pa mang dake na ning animal a miyain king Piesta ning Pamaglagpus.

²⁶ Idala yu la balang banua king bale ning Ginu ing mumunang bunga na ning pupul yu. E ye lulutu ing biserung tupa o kambing king gatas ning gaindu na.

²⁷ Ngana pa ning Ginu kang Moises, Isulat mu la deting amanu king metung a kasulatan, uling kareting amanu ya makabasi ing kasunduan a tatatag ku king kayabe mu at ning Israel.

²⁸ Menatili ya karin i Moises a kayabe ning Ginu kilub ding apat apulung aldo at apat apulung bengi; e ya bitasang mengan at minum. Sinulat na la karing tinabas a batu ding amanu na ning kasunduan, ding Apulung Utus.

Ing Pamanguldas nang Moises king Bunduk ning Sinai

²⁹ Kinuldas ya king Bunduk ning Sinai i Moises; darala na la ding aduang tinabas a batu nung nu la makasulat ding kautusan. Meging maslag ya ing lupa na uli na ning pamakipagsalita na king Ginu; oneng e na balu iti.

³⁰ Inyang akit de ri Aaron at ding sablang tau, ikit da king maslag ya ing lupa na at e re buring lapitan uling tatakut la.

³¹ Oneng inaus na lang lumapit Moises, inya linapit ya i Aaron at ding sablang makatuang manimuna na ning balen at mekipagsalita ya karela i Moises.

³² Kaybat na nita, linapit lang migpadurut kang Moises ding sablang memalen na ning Israel, at sinabi na la ngang Moises karela ding sablang kautusan a binie na ning Ginu keta king Bunduk ning Sinai.

³³ Inyang meyari neng mekipagsalita karela, tikpan neng belu ing lupa na.

³⁴ Lalako neng Moises iting belu neng lulub ya king Toldang tuknangan ning Ginu ban makipagsalita king Ginu. King paglual na ibat king Tolda, sabian na karing memalen na ning Israel ing sablang pasabi na ning Ginu karela.

³⁵ Akit da kanita ding tau king maslag ya ing lupa nang Moises, inya pasibayu neng takpan king belu ing lupa na. E ne lalako iti anggang e ya pasibayung lungub king Tolda ban makipagsalita king Ginu.