Exodo 32 - Ing Mayap a Balita Biblia

Ing Gintung Toro

¹ Milupung la kang Aaron ding tau inyang apansinan dang e ya kukuldas king bunduk i Moises. Ngara, E tamu balu nung nanu na ing milyari kang Moises a milual kekatamu ibat Ehipto; inya gawa kang metung a dios a manimuna kekatamu.

² Nganang mekibat Aaron karela, Palukas yu la ding tinggang gintu a susulud da ring asawa yu, anak a lalaki at babai, at saka yu la idala deti kanaku.

³ Inya likas da la ngan ding tinggang gintu karing balugbug da at dela da la kang Aaron.

⁴ Tinggap na la ngan Aaron deti at linaso na la; tigtug na ing gintu king metung a moldi at ginawa yang metung a gintung toro. Ngarang sinabi ding tau, O Israel, oyan ing kekatamung dios a milual kekatamu king Ehipto!

⁵ Kaybat na nita, ginawa yang altar i Aaron king arap na ning gintung toro at nganang sinabi, Pagpiestan ta ya bukas ing Ginu.

⁶ Inyang kabukasan, maranun lang migdalang mapilan a animal ban dulukan da bilang ain-sakripisyu at mapilan a kanan da bilang ain-ning-pamisulusulu. Linukluk la ding tau; misulusulu lang mengan at mininum. Iti minuling metung a pamaglasing at pamagpasasa king pamitan na ning laman.

⁷ Kanita ngana ning Ginu kang Moises, Magmalagua ka at kuldas na ka, uling ding kabalen mu a liwal mu ibat Ehipto mikasala la at sikuil da ku.

⁸ Kalalagua da ne mang gilutan ing dalan a tildu kung tuntunan da; ginawa lang metung a toro king gintung linaso ra, simban de at dininan ain-sakripisyu. Sasabian da king ita kanu ing dios da a milual karela king Ehipto.

⁹ Balu ku nung nu la anti pangasias a buntuk ding taung deti.

¹⁰ Inya paburen mu ku ngeni. Mua ku karela at paten ku la. Pero ika at ding lahi mu gawan da kayung metung a marangal a bansa.

¹¹ Oneng menigapu ya i Moises king Ginung keyang Dios. Ngana, Ginu, obat mua ka kaniting sarili mung balen a liwal mu king Ehipto king kapamilatan na ning maragul mung sikanan at upaya?

¹² Obat dinan mu lang pamikatagun makasabi ding tau Ehipto king inya liwal mu la mu Ehipto ding memalen mu uling buri mu la palang paten at lubusan gisanan karing kabundukan? Kalinguan mu na ing mua mu; aplakan mu ing lub mu at e mu sa papagpa king balen mu ing anti kaniting kasiran.

¹³ Ganakan mu la ding talasuyu mung di Abraham, Isaac, at Jacob. Ganakan mu itang masusing pangakung binie mu karela king dinan mu lang lahing kasing dakal da ring batuin king banua, at king babie mu karing lahi da ing sablang gabun a pengaku mung pabandi karela king kapilan pa man.

¹⁴ Inya migbayu ya isip ing Ginu at e na na pepagpa karing memalen na ing kasiran a bela nang ipagpa karela.

¹⁵ Kinuldas ya at meko king bunduk i Moises; darala na la ding aduang tinabas a batu nung nu la makasulat misusumangid ding kautusan.

¹⁶ Gewa na la mismu ning Dios deting tinabas a batu; ya ing sinulat kareti at midukit la.

¹⁷ Inyang dimdam nang Josue ing inge da ring taung kukulisak, sinabi na kang Moises, Balamu ating labanan king kampu.

¹⁸ Nganang Moises, E kulisak ning tagumpe ing daramdaman ku o tangis ning pangasambut; king panamdam ku balamu kanta na ning kasayahan.

¹⁹ Inyang ikua ra nang milapit king kampu, ikit neng Moises ing gintung toro at ding taung terak-terak; mikasbu ya king mua na. Belabag na la karin king lele ning bunduk ding aduang tinabas a batu at mebalbal la.

²⁰ Kinua ne ing gintung toro a gewa ra at linaso ne iti king api. Kaybat, pindurug ne angga king meging mapinu yang mapinu at saka na sinamut iti king danum. Pepainum na iti karing memalen na ning Israel.

²¹ Kaybat, inarapan neng Moises i Aaron at kitang na, Aaron, nanu ing gewa ra keka ding taung deti? Obat sinubu mu la king anti kaniting mabayat a pamikasala?

²² Nganang mekibat Aaron, E ka sa mimimua kanaku, ika mismu balu mu king makayungyung la king e ustu ding taung deti.

²³ Ngara kanaku, E tamu balu nung nanu na ing milyari kang Moises a milual kekatamu ibat Ehipto; inya mayap pa ing gawa kang dios a manimuna kekatamu.

²⁴ Inya inawad ku naman karela king idala da la kanaku ding alahas dang gintu. Detang sablang atin likas da la at binie da la kanaku. Linaso ku la deti king api at ing linto ya ing torong yan!

²⁵ Ikit nang Moises king pepaburen na lang megulung Aaron ding tau, at pepaburen na lang menabu king kamarinayan king akakit da ring kalaban da.

²⁶ Inya tinalakad ya king lele nang pasbul dalan ning kampu at nganang migsalita, Ninu ding makapanig king Ginu? Lumapit la keni kanaku! Linapit la ding sablang Levita at migpadurut la kang Moises.

²⁷ Nganang migsalitang Moises karela, Ing Ginung Dios ning Israel yuyutus na king balang metung at metung kekayu king kuanan ne ing espada na, at laganasan yeng libutan ing kampu manibat king pasbul dalan a ini angga na king kasumangid a pasbul dalan, at paten yu la ngan ding kapatad yung lalaki, kakaluguran yu, at kasiping bale.

²⁸ Memintu la ding Levita at mekapate lang ating atlung libu katau king aldong ita.

²⁹ Kaybat nganang miniabing Moises karing Levita, King aldong iti telaga yu ing sarili yu bilang pari a susuyu king Ginu uli na ning pamakamate yu karing sarili yung anak a lalaki at kapatad a lalaki, inya kamtan yu naman king Ginu ing bendisyun na.

³⁰ Kabukasan, nganang Moises karing tau, Tutung maragul ing depatan yung pamikasala. Oneng ngeni mukiat kung pasibayu king bunduk at makikit king Ginu; pota apakisabi kung mayap ing patawaran na ing pamikasala yu.

³¹ Inya belikan neng Moises ing Ginu at ngana, Dinapat lang tutung maragul a pamikasala ding taung deti. Ginawa lang metung a dios king gintu at saka re simban.

³² Ipakisabi ku sanang mayap kekayu ing patawaran yu na ing pamikasala da; nung e malyari, masanting pa ing buran yu ne ing lagyu ku king librung pisulatanan yu karing lagyu da ring memalen yu.

³³ Nganang mekibat ning Ginu, Ding buran ku lagyu king libru ku ila ding taung mikasala kanaku.

³⁴ Sulung magbalik na ka at panimunan mu na la ding taung papunta ketang lugal a sinabi ku keka. Tandanan mu, ing anghel ku ya ing mantabe kekayu, oneng king aldo a buri ku lang parusan, parusan ku la uli na ning depat dang kasalanan.

³⁵ Makanyan yang peparalang sakit ing Ginu karing tau uli na ning pepagawan deng gintung toro i Aaron.