Exodo 28 - Ing Mayap a Balita Biblia

Ing Imalan a Isulud da ring Pari

¹ Payaus me ing kapatad mung i Aaron at ding anak nang lalaki, i Nadab, Abihu, i Eleazar, at i Itamar. Ikalilua mu la karing memalen na ning Israel ban sumuyu la kanaku bilang pari.

² Ipagawa meng imalan pari i Aaron a kapatad mu; imalan a munie dangal at sintingan king obra na.

³ Payaus mu la ding sablang talapagobrang dininan kung mangasanting a pangamat king pamanayi, at sabian mu karela king ila ding gawa king imalan nang Aaron ban akua na nang mitalaga bilang pari a sumuyu kanaku.

⁴ Sabian mu karela king gawa lang metung a takap-salu, metung a efod, metung a barung makaba, metung a kamisang birdahan, metung a turban, at metung a paha. Gawan da la reting imalan pari para kang Aaron at para karing anak nang lalaki ban makasuyu na la kanaku bilang pari.

⁵ Kailangan king deting manayi gumamit lang lanang asul, muradu, at malutu, sinulad a gintu, at mapinung linen.

⁶ Kailangan yang magawa ing efod king lanang asul, muradu, at malutu, sinulad a gintu, mapinung linen, at palamutian deng burda.

⁷ Dinan deng aduang tiranti king mingatba ban malyari yang isakbit karing pago.

⁸ Dinan dia namang metung a sinturun a mapinu ing mesabing efod; ita sanang makataid ya at maging dake ne ning efod.

⁹ Kuma kang aduang batung onyx at idukit mu la kareti ding lagyu da ring labi nang aduang anak Israel,

¹⁰ agpang king pamidalan-dalan da king idad, anam king metung a onyx at anam king kadua.

¹¹ Ipadukit mu la deting lagyu ra king metung a magaling a platero at kaybat ipatampuk mu la karing engasteng gintu.

¹² Ikabit mu la deti karing tiranti na ning efod bilang e pamangalinguan karing labing aduang tribu na ning Israel. King anti kaniting paralan, darala na lang parating Aaron karing pago na ding lagyu ra ban kanita naman, aku, ing Ginu, e ku la kalinguan kapilan man bilang kanakung balen.

¹³ Pagawa ka namang aduang engasteng gintu

¹⁴ at aduang kwintas a gintung puru a linubid anting panali, at ikabit mu la reti karing aduang engaste.

Ing Takap-Salu

¹⁵ Pagawa ka namang metung a takap ning salu a isulud na ning Pekapun a Pari potang sabian na nung nanu ing kaburian ku, ing Ginu. Gamitan ing telang kalupa na ning megamit king efod, at palamutian ya naman ketang burdang kalupa na ning king efod.

¹⁶ Kailangan ing kuadradu ya at mitataklub ya; siam yang pulgada king kaba at siam yang pulgada king lapad.

¹⁷ Engastian meng apat a kahilerang mal a batu; king mumunang hilera, mikabit kang metung a rubi, metung a topasyo, at metung a garnet.

¹⁸ King kaduang hilera, mikabit kang metung a esmeralda, metung a safiro, at metung a diamante.

¹⁹ King katlung hilera, mikabit kang metung a turquoise, metung a agata, at metung a ametista.

²⁰ King kapat a hilera, mikabit kang metung a berilo, metung a onyx, at metung a haspe. Pawa la ngan sanang maka engasteng gintu deting batu.

²¹ Ing balang metung kareting mesabing batu sukat yang dukitanan metung karing lagyu da ring anak nang Jacob bilang kapigaganakan karing tribu na ning Israel.

²² Gawa ka namang aduang tali king gintung puru para kaniting takap-salu a linubid anting panali.

²³ Gawa ka namang aduang telasingsing a gintu at ibili mu la karing mingatba nang suluk babo ning takap-salu.

²⁴ Isulud mu la kareting telasingsing ding aduang taling gintu.

²⁵ Ikabit mu la ding mingatba rang danggut ding taling gintu karing aduang engasteng gintu ban mitaid la karing tiranti na ning efod banda king arap.

²⁶ Gawa kang aduang telasingsing a gintu at ikabit mu la karing adua nang suluk lalam ning takap-salu king lilip nang makalub a malapit king efod.

²⁷ Gawa ka pang aduang telasingsing a gintu at ikabit mu la king lalam king tulid da ring aduang tiranti na ning efod, malapit king pisuglungan a atyu babo ning sinturun a mapinu pangayabal a makatuglung king efod.

²⁸ Itali mu la ding telasingsing ning takap-salu karing telasingsing na ning efod king kapamilatan na ning taling asul ban manatili ya ing takap-salu babo na ning binurdahan a sinturun ning efod, at e na akuang mikawani king efod.

²⁹ Potang lulub ya i Aaron king Banal a Lugal, isulud ne iting takap-salu a midukitanan karing lagyu da ring tribu na ning Israel ban kanita, aku, ing Ginu, aganaka ke ing kanakung balen.

³⁰ Ibili mu ne man ing Urim at ing Tumim king takap-salu ban darala na lang Aaron potang lulub ya king banal kung arapan. Karing penandit a anti kareti sukat neng parating susulud iting takap-salu ban siguradu nang abalu nung nanu ing kaburian ku para karing memalen na ning Israel.

Ding Aliwa pang Imalan a Isulud da ring Pari

³¹ Kailangan yang magawa king asul a lana ing barung makaba a susulud babo ning efod.

³² Dinan yang busbus para pisuluran king buntuk, at sukat yang dinan uriang inabal iting busbus a kalupa na ning talab ban e ya magisi.

^33-34 Makapadurut king lele nang laylayan lalam, paburda meng granadang asul, muradu, at malutung lana; ibangkilas mu la karing kampaniliang gintu.

³⁵ Isulud neng Aaron iting barung makaba potang gagampanan na ing katungkulan na bilang pari. Potang lulub ya king Banal a Lugal o kaya potang lulual ya maramdam la ding kampanilia. E ya mate king anti kaniting paralan.

³⁶ Gawa kang metung a palamuting tsapang gintung puru at idukit mu kaniti ing: Makatalaga king Ginu.

³⁷ Itali me iti king arap ning turban king kapamilatan na ning metung a lasung asul.

³⁸ Isulud neng Aaron iti king kanuan na ban aku, ing Ginu, kaku la ngan tanggapan ding ain a yayain da kanaku ding Israelita, agyang pang makarapat lang kamalian ding tau king pamiyain da kareti.

³⁹ Gawan ye king mapinung linen ing kamisa nang Aaron at gawa kayu namang turban king mapinung linen, at antimu rin metung a pahang mipalamutian burda.

⁴⁰ Pagawa ka namang kamisa, paha, at turban para karing anak nang Aaron ban mika dangal la at masanting lalawan.

⁴¹ Ipasulud mu la deting imalan kang Aaron a kapatad mu at karing anak nang lalaki. Kaybat, ordinan mu la at italaga king kapamilatan na ning pamitugtug mung larung olibo karela ban kanita makasuyu la kanaku bilang pari.

⁴² Ipagawa mu la naman salol a makuyad, linen munaman ing gamitan mu; ita sanang mitakpan la katawan manibat king awakan angga karing puad da.

⁴³ Kailangan ing isulud na lang Aaron deti at ding anak nang lalaki neng mamarap la kanaku kilub na ning Toldang tuknangan ku o neng lalapit la king altar ban gampanan da ing karelang pangapari kilub ning Banal a Lugal, at ban e la mangamate uli na ning kalubasan da. Maging metung ya iting tuntunan king kapilan pa man para kang Aaron at karing maging lahi na.