Exodo 23 - Ing Mayap a Balita Biblia

Ing Hustisia at ing Sukat Daptan karing Kasalanan

¹ E yu kakalat ing e tutung balita. E ye kakampian ing taung mikasala king kapamilatan ning pamagtestigu yung alang katutuan.

² E yu pakiapusan ing gagawan da ring dakal potang gagawa lang e ustu o potang papanig la king pisasabian a e makatuliran.

³ E kayu mangabiran potang miyarap ya ing kalulu king piukuman.

⁴ Nung melili ya ing baka na o asno na ning kalaban yu at ikit ye, ibalik ye king kalaban yu.

⁵ Nung akit yeng misakab ing asno na uli na ning beyatan ning daralan na, e ye lalagpusan, nune saupan ye ba neng abangun pasibayu ing asno na.

⁶ E ye pagkaitan ing ninumang pakakalulu king katuliran na arapan na ning ukuman.

⁷ E kayu gagawang maling paratang ni paburen miyatulan kamatayan ing taung alang kasalanan. Parusan ke ing ninumang darapat king anti kaniting e ustung dapat.

⁸ E kayu tatanggap nanumang suhul, uling bubulagan na la ning suhul ding tau ban e ra akit ing katuliran, at iti ing makapahamak king kasu na ning taung alang kasalanan.

⁹ E ye lulupigan ing ninumang dayuan; balu yu nung nanu ing panamdaman na ning metung a dayuan, uling meging dayuan kayu naman karin king Ehipto.

Ing Kapitung Banua at ing Kapitung Aldo

¹⁰ Kilub ding anam a banua tamnanan yu't pupulanan ing gabun yu,

¹¹ pero e ye tatamnanan karas ning kapitung banua. E yu naman pupupulan ing nanumang tumubu karin. Paburen yung ding pakakalulu ilang makinabang kaniti at paburen na karing animal itang e ra agisan. Makanyan munaman ing daptan yu karing tamnanan yung ubas at olibo.

¹² Daptan yu kilub ding anam a aldo ing obra yu, oneng tuknang kayung magobra king kapitung aldo ban mipaynawa kayu, at ban mibawi la sikanan ding ipus yu, ding dayuan a magobra para kekayu, at pati na ding animal a sese yu.

¹³ Pakatandanan yu ngan sana iting sinabi ku kekayu. E kayu manalangin karing aliwang dios o banggitan man a lagyu.

Ding Atlung Maulagang Piesta

¹⁴ Magpiesta kayu makatatlung besis kilub ning pabanua bilang parangal kanaku.

¹⁵ King bulan ning Abib, ing bulan nung kapilan kayu linual Ehipto, pagselebran ye ing Piesta ning Tinape Alang Lebadura, antimo ing inutus ku na kekayu. E kayu mamangan tinape ating lebadura kilub ding pitung aldo a makatuldu para kaniting piesta. E ya mamarap king pamanyamba kanaku ing ninuman a ala yang daralang ain.

¹⁶ Pagselebran ye ing Piesta ning Pamamupul potang pagumpisan yu nang palutan ing tenam yu. Pagselebran ye ing Piesta da ring Dalungdung potang malapit na ing panaun ning dimla, potang agtalan yu na la ding bunga yung ubas at aliwa pang bungang tanaman.

¹⁷ Makatatlu kilub ning pabanua, king panaun da reting atlung piesta, sukat lang makiarap ding sabla yung lalaki ban samba kanaku, ing Ginung kekayung Dios.

¹⁸ E yu la abayanan karing tinape ating lebadura ding animal a iyain yu kanaku. E yu naman paburen mikakabukasan ing taba ra ding animal a inain yu kanaku kareting atlung selebrasyun.

¹⁹ Sukat yu lang idala balang banua king bale ning Ginung kekayung Dios ding mumunang diling bunga na ning pupul yu. E ye lulutu ing biserung kambing o biserung tupa king gatas na ning gaindu na.

Ding Pangaku at Panabilin

²⁰ Itubud keng makauna kekayu ing metung a anghel ban ingatan na kayu king pamaglakbe yu, at isadsad ketang lugal a sidia ku para kekayu.

²¹ Pakiramdaman ye at tuparan ing sablang sabian na kekayu. E ye lalabanan uling aku ing mitubud keting anghel, at e na ipanupaya ing nanumang kapaglabanan.

²² Nung mamintu kayu king tubud kung anghel at daptan ing sablang utus ku, maging kalaban da ku ring kalaban yu.

²³ Muna ya kekayu ing kanakung anghel, at idala na kayu king gabun da ring Amoreo, Hiteo, Perezeo, Cananeo, Heveo, at Jebuseo a pawa kung paglipulan.

²⁴ E kayu duruku karing kikilalanan dang dios at e kayu sasamba karela, at e kayu makiapus king daraptan da. Lasakan yu lang lubus ding kikilalanan dang dios at durugan ding asias a batu a sasamban da.

²⁵ Nung samban yu ku, aku, ing Ginung kekayung Dios, bendisyunan da kayu; dinan da kayung pamangan, inuman, at ilako ku ing nanumang sakit libutad yu.

²⁶ E mika babaing baug king lugal yu at alang makikuan. Pakaban ku ing bie yu.

²⁷ Papagalgalan ku la ring taung lumaban kekayu, at mabalisa la ring sablang balen king paniatang yu; paurungan ku la at papulayan ding kalaban yu.

²⁸ Parala kung putakti at misambulat la ding kalaban yu; itabi ku la ding Heveo, Cananeo, at ding Hiteo.

²⁹ E ku la pa itabi kilub ning pabanua pota king pangalako na tau ning lugal, dakal na la man ding animal a mabagsik.

³⁰ Itabi ku lang tunggal ditak king paniatang yu angga king dakal kayu para sakupan ye, at bandian lubus ing lugal da.

³¹ Ing maging angganan na ning kekayung lugalan magumpisa ya king Dagat da ring Timbu angga king Ilug ning Eufrates, at magumpisa ya king Dagat ning Mediteraneo angga king disyerto. Paburen ku lang manabu karing gamat yu ding manuknangan king lugal a yan, at itabi yu la ding taung darasan yu.

³² E kayu mitatatag nanumang kasunduan karela o makisanmetung king pamanyamba ra karing kikilalanan dang dios.

³³ E yu la paintulutan manuknangan king sasakupan yu, pota ila pa ding mitake kekayu king pamikasala yu kanaku. Kabud samba kayu karing kikilalanan dang dios, king e yu kamalayan manabu kayu karing bitag da.