Exodo 21 - Ing Mayap a Balita Biblia

Ding Batas tungkul karing Ipus

¹ Ibie mu la karing Israelita deting tuntunan:

² Nung sali kang ipus a lalaking Hebreo, suyuan na ka niti king anam a banua. Malyari na na kang lakuan king kapitung banua; dinan meng kalayaan at ala yang bayaran nanuman.

³ Nung e ya talasawa kanitang miras ya keka bilang ipus, mako ya namang alang asawa; nung dinatang ya keka a talasawa na, tuki ya ing asawa na potang malaya ne.

⁴ Nung kabang ipus ya iting lalaki, pekiasawa ne ning panginuan na at mikayanak ya king ayasawa na, ing asawa na at ding anak maging bandi na la ning panginuan; mako yang dili na ing lalaking ipus.

⁵ Nung sabian na ning ipus king kaluguran ne ing panginuan na, ing asawa na, ding anak na, at e ya bisang maging malaya,

⁶ ituki ne kanita ning panginuan ing ipus king lugal a pisasamban king Dios. Karas da karin tairan ne king pasbul o kaya king amba na ning pasbul, at karin ne busbusan a balugbug. Maging ipus na ne kanita kabang bie.

⁷ Nung pisali ne bilang ipus ning metung a tata ing anak nang babai, e ne malyaring dinan kalayaan anti ding ipus a lalaki.

⁸ Nung ing sinali buri neng maging asawa na at kaybat e ne kaluguran, malyari neng payatbus king tata na ning babai. E ne malyaring pisali karing dayuan, uling e ya meging tapat ing sinali.

⁹ Nung telaga na ne man ning sinali ban ayasawa ne ning anak nang lalaki, ituring neng sarili nang anak.

¹⁰ Nung makiasawa yang kadua ing lalaki, e ne sukat babawasan a sustentu ing minuna nang ayasawa, maging king pamangan, imalan o ing katuliran bilang asawa na.

¹¹ Kabud pigkait na la king minuna nang ayasawa deting katungkulan na, ing asawa nang iti malaya yang mako; ala yang bayaran nanuman para king kalayaan na king panginuan na.

Ding Batas tungkul king Katampalasanan

¹² Ninuman ing dugpa gamat king metung a tau at kemate na iti, sukat yang paten ing mekamate.

¹³ Nung e na sasarian at e ne seriang apate, malyari yang salikut ing mekapate ketang lugal a ituldu ku keka at e re ananu balang karin.

¹⁴ Nung ing ninuman, king mua na seria neng pete ing kalupa nang tau, sukat yang paten agyang pang mulayi yang salikut king kakung altar.

¹⁵ Paten ya ing ninumang dugpa gamat kang tata na o kang ima na.

¹⁶ Paten ya ing ninumang dumukut tau ban pisali ne o kaya gawan neng sarili nang ipus.

¹⁷ Paten ya ing ninumang lapastangan kang tata na o kang ima na.

¹⁸ Nung ating mipapate at ing metung apanasakit ne king metung a batu o king tumbuk, oneng e na ne man apate, ala yang pakibatan ing mekapanasakit. Nung ing taung menasakit e ya makalakad,

¹⁹ kaybat makabangun ya at makalakad makatukud, sukat neng bayaranan nitang mekapanasakit ketang panaun nang mesira at kailangan neng paulu angga king kumayap ya.

²⁰ Nung pelupalu ne ning panginuan ing ipus na, lalaki ya man o babai, at mete ya ing ipus, sukat yang parusan ing mekapate.

²¹ Nung ing ipus ikua na pang mebie metung o aduang aldo, ala yang pakibatan ing panginuan. Ing pangamate na ning ipus sapat nang kaparusan king panginuan.

²² Nung apanasakit de king pamipate ra ding lalaki ing metung a babaing mabuktut at mekikuan ya uli na nita, pero e ne man mepinsala king makananu mang paralan, sukat yang mamayaran ing taung mekatud king aduan ning asawa na ning babai at mamayaran ya agpang king desisyun da ring ukum.

²³ Nung mepinsala ya ing babai, bayaran bie ing bie,

²⁴ ing mata king mata, ing ipan king ipan, ing gamat king gamat, ing bitis king bitis,

²⁵ ing mepali king mepali, ing sugat king sugat, at ing galus king galus.

²⁶ Nung tiran ne mata ning ninuman ing ipus nang lalaki o babai at mebulag ya, sukat neng dinan kalayaan bilang kabayaran para king mata.

²⁷ Nung atanggal ne ipan ing ipus nang lalaki o babai, sukat neng dinan kalayaan ing ipus bilang kabayaran king ipan na.

Ing Pakibatan da ring Makibandi

²⁸ Nung asagu ne ning toro ing metung a tau at mete ya, sukat yang paten ing toro king basibas at e sukat kanan ing karni na; ala neng pakibatan ing makibandi king toro.

²⁹ Nung king milabas dakal ne segu at nung mirinan neng abiso ing makibandi at e ne pa kilung iti, nung wari't mekapate yang tau iting toro, paten ya king basibas at paten ya naman ing makibandi.

³⁰ Makanyan man, nung papamayaran dia mung multa ing makibandi bilang panatbus king bie na, bayaran na ing alaga a aduan da.

³¹ Nung mekasagu ya ing toro at mekapate anak a lalaki o babai, ing mesabing tuntunan ya mu rin ing tukian.

³² Nung ing segu na ning toro metung yang ipus a lalaki o babai, mamayaran yang atlung pulung pirasung pilak ing makibandi king makibandi king ipus at basibasan yang batu ing toro angga king mate ya.

³³ Nung lakuan neng alang takap ning ninuman ing talaga na o nung kaybat nang ginawang talaga e ne tikpan at mipaintagun ing metung a baka o kaya asno menabu ya karin,

³⁴ sukat yang mamayaran ing makibandi king talaga; bayaranan ne ing makibandi king animal at miyabie ya king maki bandi king talaga ing mete animal.

³⁵ Nung pete ne ning baka na ning metung a tau ing baka na ning aliwang tau, pisali de ring makibandi ing baka a mabie at pipitnan da la ring abli; pipitnan dia naman ing mete baka.

³⁶ Nung pikabaluan king dakal ne segu king milabas at e ne pa kilung ning makibandi, mamayaran yang mabie baka king apate na, pero miyabie ya ing bakang mete king makibandi.