Exodo 20 - Ing Mayap a Balita Biblia

Ding Apulung Utus

¹ Migsalita ya ing Dios at ila deti ring amanu na:

² Aku ing Ginung kekayung Dios a milual kekayu ibat Ehipto nung nukarin kayu meging ipus.

³ E kayu mikaka aliwang dios subali kanaku.

⁴ E kayu gagawang larawan para kekayu o nanumang kawangis ning nanumang atyu king banua, keti king yatu o king danuman king lalam ning yatu.

⁵ E kayu duruku karing idolo o sasamba kareti, uling aku, ing Ginung kekayung Dios, Dios kung mapangalalu. Parusan ku la detang masama kanaku, at pati na ding lahi ra angga na karing apu ra at apu king tud.

⁶ Oneng papakit ku ing lugud ku karing libu-libung lahi ra a malugud kanaku at mamintu karing utus ku.

⁷ E ye gagamitan ing lagyu ku king e mayap a kapagnasan, uling aku, ing Ginung kekayung Dios, parusan ke ing ninumang gagamit e ustu king lagyu ku.

⁸ Igalang ye ing Aldo ning Sabbath at ipangiling ye.

⁹ Atin kayung anam a aldo ban daptan ing obra yu,

¹⁰ oneng ing kapitung aldo metung yang aldo ning pamagpaynawa a makatalaga para kanaku. Ala metung man a malyaring magobra king aldong iti; e mu ikayu, nune pati na ding anak yu, ding ipus yu, ding sese yung animal o kaya ding dayuan a makipamalen kekayu.

¹¹ Kilub ding anam a aldo, aku, ing Ginung kekayung Dios, lelangan ke ing yatu, ing banua, ding dagat, at ing sablang atyu kareti, oneng pepaynawa ku king kapitung aldo. Iti ing sangkan nung inya aku, ing Ginu, binendisyunan ke ing Aldo ning Sabbath at gewa keng banal.

¹² Igalang ye i tata yu at i ima yu ban kumaba ing bie yu king gabun a babie ku kekayu.

¹³ E kayu makamate kalupang tau.

¹⁴ E kayu makipangalugud.

¹⁵ E kayu manako.

¹⁶ E kayu sasaksi king e katutuan laban king kenu man.

¹⁷ E ye angkaminan ing bale na ning kalupa yung tau. E ye angkaminan ing asawa na, ding ipus na, ding baka na, ding asno na o ing nanumang bandi na.

Ing Pangatakutan da ring Tau

¹⁸ Ginalgal la king takut inyang dimdam da ring tau ing duldul, ing tiup na ning trumpeta, at ikit ing kildap ampon ing bunduk a mamasuk, at linaut la king bunduk.

¹⁹ Ngara kang Moises, Makiramdam kami nung ika ing magsalita kekami, oneng e ne sana magsalita kekami ing Dios, pota mate kami.

²⁰ Nganang Moises, E kayu tatakut; dinatang ya ing Dios ba na kayu mung subukan, at ban kanita e mako kapilan man king kaisipan yu ing pamamintu, at ban e kayu mikasala.

²¹ Menatili lang makatalakad king marayu ding tau at bukud mung i Moises ya ing linapit king makapal a biga nung nu ya atyu ing Dios.

Ding Kautusan tungkul karing Altar

²² Ngana pa ning Ginu kang Moises, Sabian mu iti karing memalen na ning Israel: Ikayu mismu ikit yu nung makananung aku, ing Ginu, migsalita ku kekayu ibat banua.

²³ E kayu gagawang dios a pilak o gintu a pakipante yu kanaku at para samban subali kanaku.

²⁴ Igawa yu kung altar a gabun at babo na niti iyain yu la kanaku bilang ain ding tupa yu ampon baka. Iyain yu la bilang ain-a-durulukan at ain-a-pisulusuluan. Datangan da kayu, at bendisyunan king balang lugal a ituldu ku para king pamanyamba yu kanaku.

²⁵ Nung sakaling igawa yu kung altar a batu, e kayu gagamit batung tinabas, uling e ne maging karapatdapat kanaku kabud gemitanan yeng pataram.

²⁶ E kayu naman mumukiat king altar a atin eran a matas, pota king pamanuklu yu karing balitang, mayakit king ala kayung salol.