Exodo 19 - Ing Mayap a Balita Biblia

Ding Israelita king Bunduk ning Sinai

¹ Miras la ding Israelita king disyerto ning Sinai kaybat ning atlung bulan ning paglako ra king Ehipto.

² Meko la king Refidim at migkampu la king lele na ning Bunduk ning Sinai.

³ Minukiat ya king bunduk i Moises ban makikit king Dios. Minaus ya kang Moises ing Ginu ibat king bunduk, at sinabi na king sabian na karing Israelita, ding lahi nang Jacob, ing anti kaniti:

⁴ Ikit yu nung nanu ing depat ku karing tau Ehipto at nung makananu da kayung dela keti, antimo nung makananu na lang darala ning agila karing bagius na ding malutub na, at inuli ra kayu keti kanaku.

⁵ Ngeni, nung makiramdam kayu kanaku at tupad king kanakung kasunduan, ikayu ing maging sarili kung balen. Kanaku ya ing mabilug a yatu, oneng ikayu mung bukud ding taung pinili ku,

⁶ ing balen a mitalaga mung bukud kanaku at sumuyu kanaku bilang pari.

⁷ Inya kinuldas ya i Moises king bunduk at pepayaus na lang mitipun ding manimuna da ring tau, at sinabi na ngan karela itang yuyutus na ning Ginu.

⁸ Kaybat na nita, ngarang agnan-agnan mekibat ding tau, Tuparan mi ngan ing inutus na ning Ginu. Migbalik ya i Moises king bunduk at binie na king Ginu ing pakibat da ring Israelita.

⁹ Ngana ning Ginu kang Moises, Datang ku keka libutad na ning makapal a biga ban damdaman da ring tau ing pamakipagsalita ku keka, at maniwala na la keka manibat ngeni. Sinabi nang Moises king Ginu itang pekibat da ring tau,

¹⁰ at ngana ning Ginu, Moises, puntalan mu la ding tau at sabian mu karela king gamitan de ing aldong iti ampon ing bukas king pamagsadia para king pamanyamba. Sukat dang pipian ing imalan da,

¹¹ at magsadia la king aldo kaybat ning bukas. King aldo a ita kuldas ku king Bunduk ning Sinai ban malyari da kung akit ding sablang tau.

¹² Mibili kang angganan king makapadurut king bunduk a e ra sukat lagpusan ding tau, at sabian mu karela king e la mumukiat king bunduk o lumapit man karin. Paten ya ing ninumang munta king bunduk;

¹³ sukat yang basibasan batu o kaya panaan; ala sanang tatagkil king bunduk, tau ya man o animal sukat yang mate. Kabud tiniup yang makaba ing trumpeta sukat na lang mukiat ding tau king bunduk.

¹⁴ Kaybat na nita, kinuldas ya i Moises king bunduk, at sinabi na karing tau king magsadia na la para king pamanyamba. Inya pinipi ra ing imalan da.

¹⁵ Ngana pang Moises karing Israelita, Magsadia kayu king aldo makadua, at e kayu pa sisiping king ninumang babai.

¹⁶ Kanitang abak ning katlung aldo menuldul at mengildap, at linto ya ing makapal a biga king bunduk. Meramdam ya ing matning tiup na ning trumpeta! Ginalgal la king takut ding sablang tau king kampu.

¹⁷ Penimunan na lang linual Moises king kampu ding tau ban makikit king Dios. Tinuknang la king angganan na ning bunduk.

¹⁸ Mitakpan ya king asuk ing kabilugan a Bunduk ning Sinai, uling kinuldas ya karin ing Ginu libutad na ning api. Minta babo ing asuk kalupa na ning asuk ning metung a ornu, at ginalgal lang e mu nanu ding tau.

¹⁹ Mesikan neng mesikan ing tiup na ning trumpeta. Migsalita ya i Moises, at pekibatan ne ning Dios king kapamilatan ning duldul!

²⁰ Tinipa ya ing Ginu babo na ning Bunduk ning Sinai, at inaus ne i Moises ban mukiat king taluktuk na ning bunduk. Minukiat ya i Moises

²¹ at ngana ning Ginu, Moises, kuldas ka at sabian mu karing tau king e la sa lalagpus king angganan ban lumapit at lawan da ku; nung lagpus la, dakal la ding mate karela.

²² Agyang ding pari a lalapit kanaku sukat lang maglinis king sarili da, nung ali la parusan ku la.

²³ Nganang Moises king Ginu, E la malyaring mukiat keti ding tau uling penabilin yu kekami king ibilang mi yang sagradu iting bunduk, at mibili kaming angganan king makapadurut keti.

²⁴ Nganang mekibat ning Ginu, Kuldas na ka at dakitan me i Aaron at ituki keti. Oneng e la sukat lalagpus ding pari at ding tau king angganan ban lumapit la kanaku, nung ali parusan ku la.

²⁵ Kinuldas ya i Moises king bunduk at pintalan na la ding tau, at belita na karela ing sablang sinabi na ning Ginu.