Exodo 15 - Ing Mayap a Balita Biblia

Ing Kanta nang Moises

¹ Kanita ne kintang Moises at ding Israelita iting kanta para king Ginu. Ngara: Pagkanta ke ing Ginu, uling king pamakilaban migkamit yang tagumpe; ding kabayu at ding karela pakasake king dagat na la inugse.

² Ing Ginu ya ing mayupaya kung talapaglualu, ya ing migligtas kaku. Ya ing kakung Dios, at kaku yang purian; ya ing Dios ding makatua ku, king degulan na pagkanta keng kapurian.

³ Mengari yang gerero ing Ginu, Ginu ing lagyu na.

⁴ Ding sundalus ning Ehipto at ding karung panggera na ampon ding mayap diling opisyal na melumud la inyang pepalbug na la ning Ginu king Dagat da ring Timbu.

⁵ Tikpan na la ning maragul a alun ning dagat; anting batu limbug lang agad king kalalalaman.

⁶ Ing gamat mung wanan, O Ginu, makasdan ing upaya na, sablang kalaban panaspakan na la.

⁷ King degulan mung alang kalupa kalaban keka lang digsa, kasbu mu karela kekang bignus, at silaban mu lang anting dikut.

⁸ Tiniupan me ing dagat, at ing danum mitas; anting pader matulid tinalakad; ing kalalalaman ning dagat meging masias.

⁹ Ngana ning kalaban, Tagalan ku la at dakpan, sablang karelang pibandian kakung samsaman, at sabla kung aburi kakung kuanan; kakung espada kaku yang bagutan, ba kung kuanan ing sabla rang pibandian.

¹⁰ Oneng, Ginu, king metung mung pangisnawa, dagat karela mitakup ya, at ding tau Ehipto melumud la; anting tinggaputi king danuman limbug la.

¹¹ Ginu, ninu karing aliwang dios ing anti ika? Ninung kekang kalupa king kabanalan mung alang kalupa? Ninu ing makarapat karing milagrung kekang daraptan a binang pagmumulalan?

¹² Inatiat me ing gamat mung wanan, at ing gabun kalaban inakmul na la ngan.

¹³ Kekang pengaku kekang tutuparan, inya ing balen a kekang segipan keka yang pitnubayan, at linub king bansa mung banal.

¹⁴ Inyang iti abalitan ding bansa, ginalgal la king takut da; mengatmu la king takut ding tau Filistia.

¹⁵ Mebalisa la ding manimuna ning Edom; pekapun ning Moab ginalgal la king takut, at meina la lub ding tau Canaan.

¹⁶ Ing takut at galgal karela ngan digpa. O Ginu, kekang sikanan ikit da, at e la makakimut king takut da; anggang ing balen mu e ra ikuang linabas king arapan da balen a kinabus mu king panga-ipus na.

¹⁷ Tiki mong linub at binili king kekang bunduk, king lugal, O Ginu, a pinili mung kekang tuknangan, king kabud Templong telakad da ring kekang gamat.

¹⁸ Ika, O Ginu, ing mag-ari king kapilan pa man.

Ing Kanta nang Miriam

¹⁹ Mekadalan la ding Israelita libutad na ning dagat, king gabun a malangi. Inyang ding karung panggera da ring tau Ehipto, at ding karelang kabayu at ding pakasake kareti, ilang dinulung king dagat, pepasakublian na ning Ginu ing danum at mitakup iti at mitambunan la.

²⁰ Ing propetang i Miriam a kapatad nang Aaron, kinua ne ing pandereta na at tikian de ring sablang babai; titigtig lang pandereta at teterak la.

²¹ Migkanta ya i Miriam para karela. Ngana: Pagkanta ye ing Ginu, uling mitmung dangal ing pamagtagumpe na; ding kabayu at ding karela pakasake king dagat na la inugse.

Ing Danum a Mapait

²² Kaybat na nita, penimunan na lang Moises ding memalen na ning Israel manibat ketang pampang na ning Dagat da ring Timbu, at minta la king disyerto na ning Shur. Kilub ding atlung aldo miglakad la libutad na ning disyerto, oneng e la menakit danum.

²³ Miras la king metung a lugal a meyaus Mara, oneng tutung mapait ing danum karin, inya e la mekainum kaniti. Iti ing sangkan nung inya meyaus yang Mara ing lugal a ita.

²⁴ Migreklamu la ding tau kang Moises at ngarang kinutang, Nanu ngeni ing inuman mi?

²⁵ Menalangin yang taimtim i Moises king Ginu, at tiru ne ning Ginu ing metung a kapirasung dutung. Inyang inatsa neng Moises king danum, milako pait ing danum. Karin na la binie ning Ginu ding utus a tuntunan da king pamibiebie ra at karin na la naman pinyubukan.

²⁶ Ngana karela, Nung mamintu kayung lubus kanaku at daptan yu itang karapatdapat at tuparan ding kautusan ku, e ra kayu paburen misakitan king isanu pa man karing sakit a pepagpa ku karing tau Ehipto. Aku, ing Ginu, ing babie kapaldanan kekayu.

²⁷ Kaybat, miras la Elim nung nu ating labing aduang sibul at pitung pulung pun a palma; migkampu la ketang lele na ning danum.