Exodo 13 - Ing Mayap a Balita Biblia

Ing Pangatalaga da ring Pangane

¹ Ngana ning Ginu kang Moises,

² Italaga mu la ngan kanaku ding anak a pangane lalaki. Bandi ke ing balang anak a lalaking Israelitang pangane at ing balang pangane karing animal a lalaki.

Ing Piesta ning Tinape Alang Lebadura

³ Nganang sinabing Moises karing tau, Tandanan ye ing aldong iti, ing aldo pamaglako yu Ehipto, ing lugal nung nukarin kayu me-ipus. Iti ya ing aldo a liwal na kayu ning Ginu king kapamilatan na ning maragul nang upaya. Alang mapangan tinape ating lebadura.

⁴ Mamako kayu keti Ehipto king aldong iti ning mumunang bulan, ing bulan na ning Abib.

⁵ Tapat nang pengaku ning Ginu karing makatua yu king ibie ne kekayu ing bansa da ring Cananeo, Hiteo, Amoreo, Heveo, at Jebuseo. Gabun yang masanting at mataba. Potang ikua na na kayung adala king lugal a ita, sukat yeng pagselebran iting piesta king mumuna nang bulan ning balang banua.

⁶ Mangan kayung tinape alang lebadura kilub ding pitung aldo, at king kapitung aldo sukat mika pamagpiesta bilang parangal king Ginu.

⁷ E kayu mamangan tinape ating lebadura kilub ding pitung aldo; e sukat mika lebadura o tinape ating lebadura nukarin man king lugal yu.

⁸ Potang magumpisa na ing pamagpiesta, malinawan yu karing anak yu king iti ngan daraptan yu uli na nitang depatan na ning Ginu kekayu kanitang meko kayu Ehipto.

⁹ Maging kapigaganakan ya iting selebrasyun; mangari ya king metung a bage tinali yu king gamat yu o kaya king kanuan yu, at ipaganaka na kekayu king alang patugut yeng kikilalanan at pagaralan ing Batas ning Ginu, uling liwal na kayu ning Ginu ibat king Ehipto king kapamilatan na ning maragul nang upaya.

¹⁰ Pagselebran ye balang banua iting piesta king mitakdang panaun.

Ding Pangane

¹¹ Idala na kayu ning Ginu king bansa da ring Cananeo a tapat nang pengakung ibie kekayu at karing makatua yu. Potang ibie na ne kekayu,

¹² sukat yeng iyain king Ginu ing balang pangane anak yung lalaki. Mangaintulid ya naman king Ginu ing balang pangane lalaki karing sese yung animal,

¹³ oneng sukat yeng atbusan king Ginu ing balang pangane asnong lalaki king kapamilatan na ning pamiyain yung biserung tupa bilang kapalit na. Nung sakaling e yu ne buring atbusan ing asno, paklian ye batal. Sukat ya namang atbusan ing balang anak yung lalaking pangane.

¹⁴ King daratang a panaun, potang ikutang na ning anak yung lalaki nung nanu kabaldugan iting daraptan yu, ipakibat yu, King pamangamit na king maragul nang upaya, liwal na katamu ning Ginu king Ehipto, ing lugal nung nukarin tamu meging ipus.

¹⁵ Kanitang pepakit yang kesiasan a pusu ing ari ning Ehipto at e ya mebisang palakuan na katamu, pete na la ning Ginu ding balang pangane lalaki king kayarian na ning Ehiptotau at animal. Ita ing sangkan nung inya yayain ta ya ing balang anak a pangane lalaki para king Ginu, oneng atbusan lang pasibayu ding anak a lalaking pangane.

¹⁶ Metung yang pamigaganaka iting panugali; mengari ya king metung a bage tinali tamu king kekatamung gamat o kaya karing kanuan tamu ban ipaganaka na kekatamu king liwal na katamu ning Ginu king Ehipto uli na ning maragul nang upaya.

Ing Asias a Biga at ing Asias a Api

¹⁷ Kanitang pepaburen na na lang meko ning ari na ning Ehipto ding Israelita, e na la dinalan ning Dios ketang dalan a papunta Filistia, agyamang iti ya ing makuyad diling dalanan. Ngana ning Dios, E ku buring magbayu la isip ding Israelita at magbalik pa Ehipto potang akit da na ing kailangan lang makilaban.

¹⁸ Inya, dinalan na la king makaba at durut-durut a dalan libutad na ning disyerto papunta king Dagat da ring Timbu. Pakasandata la at makasadiang makilaban ding Israelita.

¹⁹ Dela na lang Moises ding butul nang Jose bilang kapamintuan king kapagnasan nang Jose karing Israelita ing idala da la ring butul na potang mako na la Ehipto. Nganang Jose kanitang panaun a ita, Potang iligtas na na kayu ning Dios, kailangan ing idala yu la ding butul ku king paglako yu.

²⁰ Meko la Sucot at migkampu la king Etam karin king gilid na ning disyerto.

²¹ Penimunan na la ning Ginu kabang dalan: neng aldo, king kapamilatan na ning metung a asias a biga ba neng ituru karela ing dalan; neng bengi naman king kapamilatan na ning metung a asias a api ba na lang dinan sala. King anti kanitang paralan da milyaring sindu ing pamaglakbe da neng aldo at bengi.

²² E ya mekong bitasa king arap da ing asias a biga neng aldo at ing asias a api neng bengi.