Exodo 12 - Ing Mayap a Balita Biblia

Ing Pamaglagpus

¹ Migsalita ya ing Ginu kang Moises at kang Aaron karin king bansang Ehipto. Ngana karela,

² Iti ya ing sukat maging mumunang diling bulan na ning pabanua para kekayu.

³ Ipayabut yu la deting panabilin king mabilug a balen ning Israel: King kapulung aldo na niting bulan ing balang lalaki mamili yang metung a biserung tupa o biserung kambing para karing katubale na.

⁴ Nung tutu yang malati ing pamilya na at e ne agyung gisanan ing kabilugan a animal, ya ampon ing kasiping nang bale malyari reng pirakayan ing metung a animal, agpang king bilang da ring tau ampon king agyu nang kanan ning balang katau.

⁵ Malyari kayung mamiling metung a tupa o kaya metung a kambing, oneng kailangan king lalaki ya at pabanua tua, at ala yang kapansanan.

⁶ Kaybat sesen yu la angga king sisilim na ning kalabing apat a aldo ning bulan at paten na la ning mabilug a balen ning Israel deting mesabing animal.

⁷ Kailangan lang kumang ditak king daya at ikaskas da karing amba at babo da ring pasbul da ring bale nung nu la mapangan deting animal.

⁸ King benging ita sukat minangnang ing laman at mapangan a kayabe ding mapait a gule at ning tinape alang lebadura.

⁹ E ye kakanan sagiwa o linaga; kanan yeng melitsun kabilugan pati na ing buntuk, ding bitis, at ing laman lub.

¹⁰ Ala kayung tatagan kaniti angga itang kabukasan abak; nung ating nanumang mitagan, sukat silaban.

¹¹ Malagua yeng kanan. Miblas kayu para king makabang lakaran, makasulud na la ding sandalyas yu at talnan ye king metung yung gamat ing tukud yu. Iti ing pamagselebra king Pamaglagpus bilang parangal kanaku, ing Ginu.

¹² King benging ita, lumabas ku king mabilug a Ehipto; paten ku la ding sablang anak dang pangane lalaki ding tau at animal; pagpa ku ing parusa karing dios na ning Ehipto. Aku ing Ginu.

¹³ Maging palatandanan ya karing pibalebale yu ing daya karing amba da ring pasbul. Lagpusan da kayu potang akit ku ing daya, at e kayu midame potang pagpa ku ing parusa king bansang Ehipto.

¹⁴ Sukat yeng pagselebran ing aldong iti bilang piestang parangal king Ginu ban e yu kalinguan ing depatan ku, ing Ginu. Pagselebran ye king kapilan pa man.

Ing Piesta ning Tinape Alang Lebadura

¹⁵ Ngana ning Ginu, Kilub ding pitung aldo e kayu sukat mamangan tinape nune mu itang alang lebadura. King mumunang aldo ilako yu karing pibalebale yu ing sablang lebadura, uling ing ninumang mangan tinape ating lebadura kilub ding pitung aldo reta, mitiwalag ya king balen ning Israel.

¹⁶ Mitipun-tipun kayu king mumunang aldo at pasibayu king kapitung aldo ban samba. Alang darapat nanumang obra kareting aldo; ing makapaintulut mu kekayu ya ing pamisadia king pamangan a kailangan yu.

¹⁷ Sukat yeng gampanan iting Piesta ning Tinape Alang Lebadura uling king aldong iti kanita ku la ngan liwal ibat Ehipto ding tribu yu. Pagselebran ye iting aldo bilang metung a piesta karing panaun a datang pa.

¹⁸ E kayu mamangan tinape ating lebadura manibat king sisilim ning kalabing apat a aldo ning mumunang bulan angga king sisilim ning kaduang pulu't metung a aldo.

^19-20 Kilub ding pitung aldo alang lebadurang sukat mayakit kilub ding pibalebale yu, uling ing ninuman, dayuan ya man o tubu ya king kekayung lugal, a mangan tinape ating lebadura mitiwalag ya king balen ning Israel.

Ing Mumunang Pamaglagpus

²¹ Pepayaus na la ngan Moises ding sablang manimuna na ning Israel at ngana karela, Munta kayu karing kawan at mamili kayung biserung tupa o biserung kambing, at paten yu la ban apagselebran de ring pamilya yu ing Pamaglagpus.

²² Kuma kayu namang sangang hisopo at isoso ye king daya a makadatuk king palanggana, at kaskasanan ye ing babo at ding mingatbang amba da ring kekayung pasbul bale. Ala kayung palualan ninuman king bale angga itang abak.

²³ Potang lumabas ya ing Ginu king mabilug a Ehipto ban pamaten na la ding tau Ehipto, akit na ing daya babo at karing mingatba nang amba ning pasbul, lagpusan ne kanita ning Anghel ning Kamatayan ing bale yu at e na paintulut ning Ginu ing mate kayu.

²⁴ Ikayu at ding anak yu sukat yu lang tuparan deting tuntunan king kapilan pa man.

²⁵ Potang akua yu nang miras ketang lugal a pengaku nang ibie kekayu ning Ginu, tuparan ye pa mu rin at gampanan iting selebrasyun.

²⁶ At potang ikutang da kekayu ding anak yu, Nanu ing buri nang sabian niting selebrasyun?

²⁷ Ipakibat yu karela, Iti ya ing ain-sakripisyu ning Pamaglagpus; parangal ya king Ginu, uling ligpusan na la ding bale da ring Israelita karin king Ehipto. Pete na la ding tau Ehipto, oneng ali na katamu. Siniklaud la ding Israelita at sinamba la.

²⁸ Kaybat na nita, minuli na la at tiparan da itang inutus na ning Ginu kari Moises at Aaron.

Ing Pangamate da ring Pangane

²⁹ Inyang kapitangan nang bengi, pete na la ngan ning Ginu ding lalaking pangane king Ehipto, manibat king pangane talapagmana na ning ari angga na king pangane ning taung makasukul king bartolina at pati ding pangane da ring sablang animal.

³⁰ Ketang benging ita, mipagising ya ing ari, ding tauan na ampon ding sablang aliwang tau Ehipto, at mika masikan a tangisan king mabilug a Ehipto, uling alang pibalebale a e mo sa kematen anak a pangane lalaki.

³¹ Kanita mu ring benging ita, pepayaus na la ning ari di Moises at Aaron at ngana karela, Mabating na kayu, ikayu at ding kabalen yung Israelita! Lakuan ye ing kayarian ku; sulung munta na kayung samba king Ginu, antimo ing inawad yu.

³² Idala yu la pati na ding tupa yu, kambing, at baka. Mabating na kayu! Pakipaniawad yu na ku mung bendisyun king Dios yu.

³³ Pekisabi rang mayap ding tau Ehipto karing Israelita ing magmalagua la sanang mako king Ehipto. Ngara, Mangamate ke ngan nung e kayu pa mako!

³⁴ Inya lilan da ring Israelita karing datukanan ing masang alang lebadura; binalut da karing balabal da at saka ra na pisanan.

³⁵ Tiparan da ring Israelita itang inutus nang Moises karela, inya memaniawad lang alahas a gintu, pilak ampon baru karing tau Ehipto.

³⁶ At birian na naman ning Ginu ing maging maganaka la karela at binie da karela itang karelang aduan. Makanyan dang ikua ding Israelita ing pibandian da ring tau Ehipto.

Ing Paglako da ring Israelita king Ehipto

³⁷ Miglakbe la ding Israelita ibat Rameses papunta Sucot. Anam a ralan a libu la ding lalaki subali pa karing babai at ding anak da.

³⁸ Kayabe da la namang meko ding dakal pang aliwang tau at tupa at kambing ampon baka.

³⁹ Miglutu lang tinape ketang masa a alang lebadura a darala dang linual Ehipto. Tutung piragli ing pangatabi ra king Ehipto, inya e la mika panaun pang magsadiang bakalan da o makapaglutung tinape ating lebadura.

⁴⁰ Menuknangan la karin Ehipto ding Israelita king kekaban da ring apat a ralan at atlung pulung banua.

⁴¹ Meko la Ehipto ding sablang memalen na ning Ginu king aldo a miyangganan la deting apat a ralan at atlung pulung banua.

⁴² Metung yang pamaglame na ning Ginu itang kabengian a ita ban ilual na la king sakup na ning Ehipto. Inya tatalaga de ring Israelita king Ginu ing anti kanitang kabengian king panaun pang daratang bilang metung a kabengian na ning pamaglame ra.

Ding Tuntunan para king Pamaglagpus

⁴³ Ngana ning Ginu kang Moises at Aaron, Oreni ding tuntunan para king Pamaglagpus. E ya malyaring makisulu kaniti ing ninumang dayuan,

⁴⁴ pero ing ninumang ipus a seli yu malyari yang makisulu kaniti, nung sirkunsisyunan ye pa.

⁴⁵ E ya naman malyaring makiabe kaniti ing aliwang taung makipanilas mu kekayu o kaya ing metung a talapagobrang upahan yu.

⁴⁶ Sukat yang mapangan ing kabilugan ning pamangan ning Pamaglagpus kilub ning pibalebale nung nu ya karin misadia at alang sukat milual agyang kagili mu man king pibalebaleng ita. Ala kayung paburen mapapakli agyang metung mu karing butul na.

⁴⁷ Sukat yang magselebra kaniting Pamaglagpus ing mabilug a balen ning Israel.

⁴⁸ Alang taung e mesirkunsisyun a malyaring makiabe kaniti. Nung ing metung a taung dayuan a mekipamalen kekayu bisa yang magselebra king Pamaglagpus ban parangalan ne ing Ginu, kailangan ing masirkunsisyun ya pa mu at ding sablang lalaking katubale na. Kanita ya pa mu dapat pakiutusan bilang metung a tubu Israel, at kaybat malyari neng makiabe mangan king Pamaglagpus.

⁴⁹ Ila mu rin deti ding tuntunan a sukat mipatupad karing Israelita a tubu libutad yu at karing dayuan a mekipamalen na kekayu.

⁵⁰ Memintu la ding sablang Israelita at depat da itang inutus na ning Ginu kari Moises at Aaron.

⁵¹ King aldong ita liwal na la Ehipto ning Ginu ding tribu na ning Israel.