Exodo 1 - Ing Mayap a Balita Biblia

Ing Pangayalipusta da ring Israelita karing Tau Ehipto

¹ Oreti ding lagyu da ring anak nang lalaking Jacob a minta karin Ehipto a kayabe na at ding pamilya ra:

² i Ruben, Simeon, Levi, Juda,

³ Isacar, Zebulun, Benjamin,

⁴ Dan, Neftali, Gad ampon i Aser.

⁵ Pitu lang pulu kabilangan ding heganaganang lahi nang Jacob. Atyu ne kanita i Jose karin Ehipto.

⁶ Kaybat na nita, mete ya i Jose at ding sabla nang kapatad ampon ding anak da ring anak da.

⁷ Oneng menganak la ding Israelita a lahi da at merakal na lang merakal; mabilis lang merakal at tutung masikan angga king milaganapan ya karela ing Ehipto.

⁸ Linabas ing panaun at ing Ehipto mika bayu yang ari a ala nang bitasang balu tungkul kang Jose.

⁹ Nganang sinabi karing sasakupan na, Lawan yu, mas dakal la at masikan kesa kekatamu deting Israelita.

¹⁰ Nung sakaling lusuban da katamu ding kalaban pota makikampi la pa karela at kaybat takasan de ing bansa tamu. Inya kailangan tamung lumawe paralan ban e na la dakal pa.

¹¹ Inya mibili lang kapatas karing Israelita ban pasakitan da la king kapamilatan na ning mabayat a obra. Makanyan lang mengapuersa ding Israelita king pamitalakad karing siudad ning Pitom at Rameses a pipagponduan nang kabiayan at kagamitan ning ari.

¹² Oneng kabang pasakitan da la ring Israelita kanita la lalung merakal at mikalat. Makanyan lang mitakutan ding tau Ehipto karing Israelita.

¹³ Inya lalu da la pang inalipusta.

¹⁴ At alang lunus da lang pepagawan laryu at binie da karela ing sablang mabayat a obra king marangle.

¹⁵ Misan a aldo, pekisabian na la ning ari na ning Ehipto di Sipra at Pua, ding aduang ilut a papanganak karing babaing Hebreo.

¹⁶ Ngana karela, Potang papanganak kayu, kabud akit yu king ing anak a mibait lalaki ya, paten ye. Nung babai ya paburen yeng mie.

¹⁷ Oneng ding ilut, uli na ning takut da king Dios, e ra pemintuan ing utus na ning ari. E da la pete ding anak a lalaking mibait.

¹⁸ Inya pepayaus na la ning ari ning Ehipto at ngana karela, Obat makanyan ing depat yu? Obat pepaburen yu lang mebie ding anak a lalaki?

¹⁹ Ngarang mekibat ding ilut king ari, Kasi pu deng babaing Hebreo e ra la pu kalupa ding babai tamu keti Ehipto; e la pu magkasakit manganak at akakua rang makapanganak bayu na akuang datang ning ninuman kekami.

²⁰ Metula ya ing Dios karing ilut at lalu lang merakal ampon mesikan ding Israelita.

²¹ Uling atin lang takut ding ilut king Dios, binendisyunan na la ning Dios at dininan sarasariling pamilya.

²² Kanita minie yang utus ing ari karing sasakupan na. Ngana karela, Iyugse ya king Ilug ning Nilo ing balang anak a lalaking mibait karing Hebreo, oneng paburen yu lang mie ding anak a babai.