Ester 1 - Ing Mayap a Balita Biblia

Ing E na Pamamintung Reyna Vasti kang Aring Asueru

¹ Ing sasakupan nang lugal Aring Asueru ning Persia inyang kapanaunan na magumpisa ya king India at angga ya king Etiopia. Bibilugan de ring dinalan aduang pulu't pitung probinsia.

² Atyu king siudad ning Susa ing sentru na ning kayarian na.

³ King katlung banua na ning pamag-ari na, minie yang bangketi para karing sabla nang opisyal at talapamahala. Atyu la ding dakal a sundalus na ning Persia at Media at ding gobernador ampon ding taung kagalang-galang karing probinsia.

⁴ Kilub ding dinalan walung pulung aldo pepakit na karela ing pibandian na ning kayarian na at ing labis-labis a kabiayan na.

⁵ Kalabas da retang aldong deta, minie ne mang bangketi para karing sablang taung manuknangan king Susa, mabandi la man o kalulu. Merapat iting bangketi kilub ding pitung aldo karin king patyu ning palasyu.

⁶ Makagayak ya ing patyu king asul at maputing kurtinang linen a pakatali king mapinung lubid at argoliang pilak at makasabit la karing asias a marmol. Megawa la king gintu at pilak ding luklukan a ating sandalan. Mosaik ya ing patyu a megawa king porfido, maputing marmol; atin yang maragul at makintab a perlas at mangamal a batu.

⁷ Mininum lang alak karing kopang gintu a miyayaliwa tabas. Labis-labis ing mangamal a alak a sidia na ning ari.

⁸ Makainum ka anggang bisa ka uling minie yang utus ing ari karing talapagsilbi ning palasyu king dinan da lang alak ding bisita anggang bisa la.

⁹ Kilub ning palasyu, minie ya namang bangketi i Reyna Vasti para karing babai.

¹⁰ King kapitung aldo na ning bangketi makainum ya at masaya ing ari inyang pepayaus na la ding pitu nang kapun a talapagsilbi nai Mehuman, Bizta, Harbona, Bigta, Abagta, Zetar, at i Carkas.

¹¹ Inutus na karela ing idala de i Reyna Vasti; sukat yang makaputung king buntuk na ning reyna ing korona na. Buri neng ipagmaragul ning ari karing bisita na uling tune yang malagu ing reyna.

¹² Oneng e ya mebisang tinuki ing reyna karing kapun a lalaking tubud ning ari. Inya mikalabkab ing mua na ning ari.

¹³ Ugali na ning ari ing mangutang ya at maniawad payu karing tauan nang biasa king kautusan at kayatulan.

¹⁴ Ding kutnanan na ila di Carsena, Setar, Admata, Tarsis, Meres, Marsena, at i Memucan. Ila ding pitung pikabaluan a opisyal na ning Persia at Media; malapit la king ari.

¹⁵ Ngana ning ari karela, Agpang king kautusan, nanu ing sukat daptan kang Reyna Vasti uling e ya memintu king utus ku inyang peparakit ke karing tubud kung kapun?

¹⁶ Nganang mekibat Memucan king daramdaman da ring abe na, Makamal a Ari, e mu kekayu ya dinapat e ustu i Reyna Vasti, nune karing sablang pamuntuk at memalen na ning kayarian yu.

¹⁷ Siguradung abalu da ring sablang babai iting milyari. Inya, mika matulid lang lumaban karing karelang asawa. Sabian da, E ya memintu i Reyna Vasti kang Aring Asueru inyang papapuntan ne arapan na.

¹⁸ King aldong iti asisiguru ku nang balu da na ding babai na ning Persia at Media ing depat ning reyna king ari at ibalita ra iti karing asawa ra. Inya mika problema la ding lalaki karing asawa rang e bisang pailalam king kaburian da.

¹⁹ Nung burian yu pu, Makamal a Ari, gawa kayung metung a utus king e ne malyaring makikit pa kekayu i Reyna Vasti at alilan yeng aliwa a maygit kesa kang Reyna Vasti. Iyabe ya iting utus karing kautusan na ning Persia at Media at e sukat mauman.

²⁰ Potang mipabalu ne iting utus king mabilug yung kayarian, siguradung galangan ne ning balang babaing talasawa ing asawa na, mabandi ya man o ali ya.

²¹ Metula ya ing ari at ding tagapayu na kaniting munikala nang Memucan.

²² Inya peparala yang sulat karing sablang probinsiang sakup na agpang king karelang sariling pamanyulat at salita ban ing asawang lalaki ya ing malyari buri king pamilya na at kautusan la ding amanu na.