Efeso 3 - Ing Mayap a Balita Biblia

Ing Obra nang Pablo karing Paganu

¹ Uli na niti, aku, i Pablo a preso nang Cristo Jesus, king uli yu, ikayung paganu, manalangin ku king Dios.

² Abalitan yu na siguru king ing Dios, agpang king grasya na, peniwala na kanaku iting katungkulan para king ikakayap yu.

³ Pisiag na kanaku ning Dios ing lihim nang parasan, (antimo ing abanggit ku nang minuna.

⁴ At kabang babasan ye iting sulat ku, abalu yu nung nanu ing aintindian ku king misteryo tungkul kang Cristo.)

⁵ E mipasiag iting misteryo karing tau king milabas a panaun, oneng ngeni pepabalu na ning Dios king kapamilatan na ning Espiritu karing banal nang apostol at propeta.

⁶ Ing lihim ya iti: king kapamilatan na ning Mayap a Balita, atin lang dake ding paganu, nung makananung atin lang dake ding Judio, king bendisyun na ning Dios; dake na la naman ning metung mung katawan at karake la king pangaku na ning Dios king uli nang Cristo Jesus.

⁷ King uli na ning regalu na ning grasya ning Dios, gewa na kung talasuyu ning Mayap a Balita king kapamilatan na ning kayupayan na.

⁸ Aku ing mababang dili uri karing pinili na ning Dios. Makanyan man, binie na ning Dios kanaku ing obrang iti: ing ipanaral ku karing paganu ing Mayap a Balita tungkul king alang angga nang bendisyun a malyaring atagpuan kang Cristo,

⁹ at ipalino ing sablang bage nung makananu nang daptan ning Dios ing lihim nang kapagnasan. Maluat na na mu ring lilihim iti ning Dios a miglalang king sablang bage

¹⁰ ban king kapamilatan na ning iglesia mipakilala ngeni karing pamuntuk at karing kayupayan karin banua ing alang anggang kabiasnan na ning Dios a mipabalu king miyayaliwa nang aske.

¹¹ Makayagpang iti king alang angga nang parasan a keya namang tiparan kang Cristo Jesus a kekatamung Ginu.

¹² Uli na ning pangayabe tamu at pamagtiwala keya, malaya tamu at panatag a lub makalapit king Dios.

¹³ Ipakisabi kung mayap kekayu king e yu sa painan ing lub yu uling misasakitan ku alang-alang kekayu; iti ngan para king ikakayap yu.

Ing Lugud nang Cristo

¹⁴ Uli na niting sangkan, sisiklaud ku arap ning Ibpa

¹⁵ a panibatan ning lagyung Ibpa king balang pamilya king banua at yatu.

¹⁶ Ipanalangin ku king Dios, agpang king mabandi nang ligaya, king pasiknangan na ing bie yung espiritual king kapamilatan na ning Espiritu na.

¹⁷ Manuknangan ya sa i Cristo karing kekayung pusu king kapamilatan na ning kekayung pamanialpantaya keya ban king pamagyamut yu, at pamanalumpakan king matibe lugud

¹⁸ malyari yung aintindian, kayabe da ring pinili na ning Dios, nung nu anti karagul ing lugud nang Cristo.

¹⁹ At akilala yu sana ing lugud a e na abut ipamasala ning kaisipan, ban mikatmuan kayung lubus king sablang ganap a atyu king Dios.

²⁰ King Dios a makarapat maygit king sablang malyaring aduan tamu o isipan, king kapamilatan na ning kayupayan nang magobra kekatamu:

²¹ keya miyabie sa ing kapurian king kapamilatan na ning iglesia at king kapamilatan nang Cristo Jesus, king sablang panaun at king kapilan pa man! Amen.