Ecclesiastes 5 - Ing Mayap a Balita Biblia

E Ka Mamalaguang Gagawang Pangaku

¹ Mimingat ka sana neng lulub ka king bale na ning Dios. Mas mayap ing munta ka karin ban makiramdam kesa king balamu mangmang kang babie ain-sakripisyu, uling e na balu ning mangmang ing ustu ila ning e ustu.

² E ka agad mangaku king Dios; misip kang banayad bayu ka gawang pangaku king Dios. Atyu banua ing Dios at ika atyu ka king yatu, inya e mu sasabian itang e mu agyung daptan.

³ Ing ikagugulu na ning isip ya ing pasari king makatakut a paninap. Dakal ya balung sabian ing taung mangmang.

⁴ Tuparan mung agad itang pengaku mu king Dios uling e ya tutula karing mangmang. Tuparan mu itang pengaku mu.

⁵ Mas mayap ing e ka gagawang pangaku kesa king mangaku ka at kaybat e mu naman tuparan.

⁶ Pigilan me ing dila mu ban e ka mikasala at e mu sana sasabian king talasuyu ning Dios king migkamali ka pala. Obat buri mung mimua ya keka ing Dios? Obat paintulut mung siran na ing kekang pegobran?

⁷ Agyang maralas kang maninap at dakal a pamaniabian, makanyan man, e mu sana kakalinguan ing kagalangan king Dios.

Ala yang Kabaldugan ing Bie

⁸ E ka sa mabibigla nung akit mu king metung a probinsia ing pamanabusu karing kalulu at ing alang hustisia ampon katuliran. Uling ing matas a pamuntuk pagdipensa ne ning mas matas a katungkulan keting tau, at ating mas matas a katungkulan a magdipensa karela.

⁹ Makakayap king ari ing ating makatanam king marangle na.

¹⁰ E ya kakabsi ing sakim king salapi at e ya tutula ing magpakabandi king tubu na. Iti munaman alang kabaldugan.

¹¹ Nung kapilan darakal ing pibandian kanita no man darakal ding kekang pakanan at ing bukud mung kekang ligaya ya ing beluan a ika mibandi ka.

¹² Maniaman ya tudtud ing taung mapagal king obra, mabsi ya o ali ya. Oneng e ya man mipapaiglip ing taung mabandi uli na ning kaiisip na king pibandian na.

¹³ Ikit ku ing karumaldumal a e mayap king yatu: titipun lang pibandian ding tau ban gamitan king oras ning karelang pamangailangan,

¹⁴ at kaybat iting pibandian mawala mu king e ustung paralan, at ala lang manan ding anak da.

¹⁵ Nung makananu tamung alang darala inyang linto tamu keti king yatu, makanyan ta ya munamang lakuan a alang darala. Ala tamung bitasang idala ketang pipagalan tamu.

¹⁶ Ini munaman e mayap: nung makananu tamung dinatang, makanyan tamu munamang mako. Magobra tamung alang patugut, oneng ala palang pakinabang;

¹⁷ pakigisanan tamu ing bie tamu king karalumduman at kalungkutan, magugulu tamu isip, sasakit tamu, at mimimua.

¹⁸ Ing ikit kung masanting at karapatdapat ya ing mangan, minum, at magsaya king bunga na ning kekang pipagalan kilub ning makuyad a bie a binie na keka ning Dios. Iti ing telaga na keka.

¹⁹ Ing balang taung dininan nang pibandian ning Dios at oportunidad gamitan na king kusuelu na, magpasalamat ya at ita ing sukat nang daptan king bunga na ning kapagalan na. Iti regalu na ning Dios at telaga na.

²⁰ E na pinsinan ing kuyad ning bie na uling dirinan neng tula ning Dios.