Ecclesiastes 3 - Ing Mayap a Balita Biblia

Ating Panaun a Mitakda para king Sabla

¹ Ating mitakdang panaun para king sablang bage; ating oras ing sablang malilyari keti king yatu.

² Ating panaun ing mibait ka, at ating panaun ing mate ka; ating panaun ing tanam ka, at ating panaun a kekang pupulan ing kekang tenam.

³ Ating panaun ning pamakamate tau, at ating panaun ning pamanulu; ating panaun ning pamanlasak, at ating panaun ning pamanalakad king melasak.

⁴ Ating panaun ning pamangiak, at ating panaun ning pamangayli uli ning tula; ating panaun ning kalungkutan, at ating panaun ning pamanerak.

⁵ Ating panaun ing pamangalat batu, at ating panaun a tipunan lang pasibayu; ating panaun ning pamangaul, at ating panaun ning pamamigil king pamangaul.

⁶ Ating panaun ning pamanintun, at ating panaun ning pamamating; ating panaun ning pamanipun, at ating panaun ning pamanugse.

⁷ Ating panaun ning pamangisi, at ating panaun ning pamanulsi; ating panaun ning pamagtahimik, at ating panaun ning pamagsalita.

⁸ Ating panaun ning pamalsinta, at ating panaun ning pamimua; ating panaun ning pamakigera, at ating panaun a payapa.

⁹ Nanu mo ing kekatamung pakinabangnan king sablang kekatamung daraptan?

¹⁰ Balu ku ing bayat na ning papapusan ning Dios kekatamu.

¹¹ Dininan na ngang ustung panaun ing sablang bage. Dininan na katamung panaun ban abalu tamu ing daratang a panaun, oneng kapilan man e na katamu dininan sapat a beluan ban kekatamung aintindian ing daraptan na manibat na kanitang minunang panaun.

¹² Balu ku king ing masanting tamung daptan ya ing magsaya tamu, at daptan ing sablang mayap a kekatamung arapat kabang mabibie tamu.

¹³ Babie na anting regalu ning Dios king tau king ding sabla sukat lang mangan at minum ampon magkusuelu king sablang pegobran na.

¹⁴ Balu ku king ing nanumang daraptan na ning Dios manatili king kapilan pa man; e na sukat pang dagdagan o bawasan. Makanyan ing depatan na, at ding tau ya ing karelang galangan.

¹⁵ Itang mapalyari, milyari na keta pang minuna; itang milabasan ulit-ulitan nang papalyarian ning Dios.

Ing Alang Hustisia keti king Yatu

¹⁶ Subali pa kaniti, apansinan ku munaman king ing magbabo keti king yatu ya ing e mayap, at aliwa ing hustisia ampon ing katuliran.

¹⁷ Ngaku king lub ku, Parehu na lang atulan ning Dios ding taung mayap at ding e mayap, uling mitakda yang panaun para king sablang bage at king merapat.

¹⁸ Ngaku pa king lub ku, Susubukan na la ning Dios ding tau ban ipakit na karela king ala lang pangayaliwa karing animal.

¹⁹ Uling ing kararasan da ring tau at ding animal ya naman ing kamatayan. Parehu lang mangisnawa; ala yang pamiyaliwa ing tau king animal uling ala yang kabaldugan karela ing bie.

²⁰ Parehu lang muli king alikabuk uling parehu lang ibat king alikabuk.

²¹ Ninu mo ing makibalu nung ing espiritu na ning tau munta ya king babo at ing king animal munta ya king lalam?

²² Inya king palage ku ing masanting nang daptan ning tau ya ing sukat yang magkusuelu king pipagalan na uling iti ing mitakda king tau. Ninu mo ing makibalu king mapalyari potang mete ne?