Ecclesiastes 12 - Ing Mayap a Balita Biblia

¹ Kayanakan, e me kakalinguan king kekang pangakayanakan ing Dios a linalang keka ban potang datang la ding aldo at banuang magdalang kaguluan e mu asabing: E ku matula king bie.

² Ganakan me kabang e ya lalbug ing aldo, bayu ya dalumdum ing bulan at ding batuin, at kabang e la daratang ding biga a magdalang uran.

³ Ganakan me kabang masikan ka katawan; kabang e la mangaina ding gamat mu at tud. Ganakan me kabang ating ka pang ipan ampon e pa mapula mata.

⁴ Ganakan me kabang e ka maklak; kabang daramdaman mu ing inge ning gilingan, ing pasyuk da ring ayup, at ing malagung musika.

⁵ Ganakan me kabang e ka tatakut mukiat king eran a matas; kabang e ka tatakut lalakad dili-dili king dalan, kabang e ka maputi buak, at kabang ing sablang buri mu atyu pa keka. Uling muli tamu ngan ketang alang anggang tuknangan at lumual la ding tau karing dalan ban ilibing da katamu.

⁶ Ganakan me bayu ya mapatlud ing kwintas a pilak o mabaldug at maspak ing gintung silyo o mabalbal ing datukanan danum o mapatlud ing lubid king talaga.

⁷ Ganakan me kabang e ya magbalik ing katawan mu king gabun a penibatan na at bayu ya mibalik ing kaladua mu king Dios a minie kaniti.

⁸ Ala, alang kabaldugan ing sabla-sabla, ngana ning Talapanaral. Wa, ala ping kabaldugan.

Ing Pangasampulun ning Pisasabian

⁹ Uling biasa ya ing Talapanaral, tiglus na ing pamanuru na karing tau tungkul king beluan na. Pekapagaralan na la ding kasebian at tinimbang na ampon sinubuk ing katutuan da.

¹⁰ Migkapilit ya iting Talapanaral a manintun amanung makapasno king tau, at mitmu lang katapatan ding amanung sinulat na.

¹¹ Mengari la ding kasebian na ning taung biasa karing tulus a matilus a gagamitan na ning pastul ban maingat la ding papastulan na; anti lang paku ding kasebian na a makakutkut king kaisipan. Ing Dios, ing bukud mung kekatamung Pastul, ya ing minie kareti.

¹² Anak ko, subali pa kareti mingat ka karing aliwa pang bage. Alang kapupusan ing pamanyulat dakal a libru at pagalan na ka mu ning sobrang pamagaral.

¹³ King kataya mung amanu, oyni ing asabi ku: Pitakutan me ing Dios at pamintuan la ding utus na, uling iti ing katungkulan na ning balang tau.

¹⁴ Atulan na ning Dios ing sablang kekatamung daraptan king hayagan o king lihim, mayap o e mayap.