Ding Tagulele 3 - Ing Mayap a Balita Biblia

Ing Parusa, Kapanisian, at Kapanayan

¹ Aku ing taung makibalu nung nu anti kabayat ing tanggap parusa king Dios.

² Sibung na ku king kalalalaman ning karalumduman,

³ at king alang lunus ulit-ulit na kung bitbat.

⁴ Likuan neng daraya at makabuklat ing kakung laman at sugat; pemakli na pati kakung butul.

⁵ Kilung na ku king sukulan ning kasakitan at kalungkutan.

⁶ Pinilit na kung manuknangan nung nukarin manatili ing dalumdum ning kamatayan.

⁷ Tinali na ku karing tanikala, bihag ku at alang kapanayan makatakas.

⁸ Mamaus kung masikan; maniad kasaupan, oneng ing Dios e na ku pakiramdaman.

⁹ Mangasakab ku king kakung paglakad; nu ku man marap batu lang maragul ding kaku makasabat.

¹⁰ Kalupa ne ning animal a oso king pamanaya na kaku; mengari ya king metung a leon, abutan na ku.

¹¹ King dalan penagal na ku ampon piglapak; at saka na ku likuan.

¹² Inigut ne ing pana na, at gewa na kung peka puntiria para karing paslu na.

¹³ Malalam ing disnan da ring paslu king katawan ku digpa.

¹⁴ Patitingapun kaylian da ku; insultuan da ku ding sablang tau.

¹⁵ Ing kaku binie nang pamangan at inuman ya pin ing alang kalupang kasakitan.

¹⁶ Sibsub ne ing lupa ku king gabun, karing batu tinggal na lang kakung ipan.

¹⁷ Akalinguan ku na nung nanu ing kabilian ning masanting a pamikakatawan, ing kapayapan at ing kaligayan.

¹⁸ E na kumaba pa ing bie ku; mewala na ing kapanayan ku king Ginu.

¹⁹ Anti waring mapait a lasun neng agaganaka ku ing kakung kasakitan, at ing ala kung tuknangan.

²⁰ Iti parati kung agaganaka, at malulumud ya ing kakung kaladua.

²¹ Makanyan man ing kapanayan ku sasagiwa potang iting bage kaku yang agaganaka:

²² Ing lugud at lunus nang e kukupas ning Ginu kapilan man e magbayu.

²³ Sasagiwa ya balang abak, at siguradu yang sunlag anti ing aldo neng abak.

²⁴ Ing bukud mung bandi ku ya ing Ginu, bibili ku king Ginu ing kapanayan ku.

²⁵ Maganaka ya ing Ginu king ninumang manalig at manintun king keyang kaburian.

²⁶ Inya ing mayap tamung daptan ya ing manaya king mitmung kapibabatan; manaya king Ginu ban iligtas na kata ngan.

²⁷ At mayap munaman ing abalu tamu ing makanyan a kapibabatan king panaun ning kekatamung kayanakan.

²⁸ Potang daralan tamung kasakitan lukluk tamu ngan; at king katahimikan at kapibabatan dili-diling isip-isipan.

²⁹ Sukat ing duku at pailalam, uling siguru atin pang kapanayan.

³⁰ Agyang mesambut tamu at melapastangan, kailangan king iti tanggapan tamu ngan.

³¹ Ing Ginu mitmu ya king lunus, at e na katamu paburen kapilan man.

³² Siguru dinan na katamung kalungkutan, oneng ing lugud na para kekata ngan maragul at kekatamung ayasahan.

³³ E na tula ing palungkutan na katamu o dinan kasakitan ing ninumang tau.

³⁴ Balu na ning Ginu ngening ing espiritu tamu madadakurak ya king pangasukul tamu.

³⁵ Balu na potang kekatamu pagkaimut da ing katuliran a kekatamu binie na.

³⁶ Potang mibaluktut ing katuliran karing husgadu, iti balu na naman.

³⁷ Bukud mung ing keyang kaburian ya ing parating mipamintuan.

³⁸ Ing kayapan at ing e mayap parehung atyu makapailalam king keyang kayupayan.

³⁹ Baket sasaingsing tamu't magreklamu ngening miparusan tamu king depat tamung kasalanan?

⁴⁰ Surian tamu ing sarili tamu, at magbalik lub king Ginu!

⁴¹ Pusu tamu ibuklat la king Dios ning banua, at manalangin tamu king Ginu:

⁴² Mikasala kami at keka sinalangsang at ika, Ginu, e mu ke pepatawaran.

⁴³ Penagal mu kami at pete, uli ning mua mu kekami ing kekang lunus milele.

⁴⁴ Sinalikut ka king makapal a biga ning kekang mua, at e na agyung taglusan ning kekeng panalangin.

⁴⁵ Gewa mu kaming piyugsianan basura da ring sablang tau.

⁴⁶ Insultuan da kami at gagawan pikaylian ding sabla ming kalaban.

⁴⁷ Delanan mi na ngan ing takut at ing kasakitan, ing manuknangan libutad ning panganib at ning kasiran.

⁴⁸ Ing lua karing mata ku mamagus anti ing danum ning ilug, uli ning miras a kasiran karing kakung memalen.

⁴⁹ Ing lua ku magus anting batis a alang tuknang

⁵⁰ angga king ing Ginu lumawe yang manibat babo, at akit na katamu.

⁵¹ Malungkut ya ing kakung pusu ngening akakit ku ing milyari karing babai ning siudad ku.

⁵² Mengari kung ayup a merakap king bitag ding kalaban a ala namang sangkan ban karelang pikasaman.

⁵³ Inugse da kung mabie king kulkul; kaybat tikpan de king batung maragul.

⁵⁴ Ing danum dinatang at buri na kung takpan; bala ku ita na ing kakung kawakasan.

⁵⁵ Ibat king kalalaman ning kulkul, O Ginu, minaus ku keka.

⁵⁶ At inyang linapit kung pasaup, aus ku pekiramdaman mu.

⁵⁷ Pekibatan mu ku; E ka tatakut, ngamu kanaku.

⁵⁸ Dinatang ka, Ginu, at linigtas mu ku; segipan me ing bie ku.

⁵⁹ Matul kang makapanig kaku; balu mu la ding depat dang kamalian laban kaku.

⁶⁰ Ikit mo ding kakung kalaban a masama at magtangka laban kaku.

⁶¹ Dimdam mu, O Ginu, ing pamag-insultu da kaku; balu mu la ding sabla rang planu.

⁶² Patitingapun aku ing pisasabian da, at laban kaku ing tatangka ra.

⁶³ Ibat king kayabakan angga na king kabengian, aku ing karelang insultuan.

⁶⁴ O Ginu, parusan mu la, uli ning depat da.

⁶⁵ Isumpa mu la, at ing kapanayan ilako mu karela!

⁶⁶ Panagalan mu la, at keti king masala gisanan mong lahi ra!