Ding Dalit 98 - Ing Mayap a Balita Biblia

Ing Dios, ing Ari ning Meto Yatu

¹ Pagkanta yeng bayung kanta ing Ginu, uli ning makapagmulala nang depatan! King sarili nang kayupayan at banal nang gamat ing tagumpe ikua na.

² Pisiag ning Ginu ing tagumpe na; ing pamagligtas na karing bansa pepakilala na.

³ Ing pengaku na king balen ning Israel e na kelinguan; karela mitmu yang lugud at katapatan. Ing tagumpe ning Dios ikit ding sablang tau ning yatu.

⁴ Gawa kang masayang inge king Ginu, O mabilug a yatu, purian yang kayabe ding kanta, at kulisak ning tula.

⁵ Magkanta kayung kapurian king Ginu! Manigtigan kayung lira!

⁶ Tiupan yo ding trumpeta at tambuli, at kulisak kayung mitmung tula king Ginung ari tamu.

⁷ Magkainge ka, O dagat, pati na ing sablang atyu keka! Magkanta ka, O yatu, at sablang manuknangan keka.

⁸ Ikong sablang ilug makpak kayu ngan; ikong sablang kabundukan miyabe-abe kayung matulang magkanta

⁹ king arap ning Ginu, uling daratang ya ban yatu ya'ng pamahalan na, at ukuman ding tau ketang katuliran at alang pamangabiran.