Ding Dalit 69 - Ing Mayap a Balita Biblia

Ing Pamaniawad Kasaupan king Dios

¹ O Dios ko, iligtas mu ku! Angga na king batal ku ing danum.

² Lalbug na ku kening malalam a burak; ala na kung apitukluan mang masias; atyu na ku king dake a malalam, at halus ilumud da na ku ding alun a maragul.

³ Mepayo na kung papiglo; melangi na ku akmulan. Mepula na lang kakung mata king pamanayang kasaupan keka.

⁴ Ding mua kaku agyang ala lang asangkan mas marakal la kesa king kakung buak. Ding kalaban kung malaram buri da kung paten, at tutu la ngan masikan. Pilit dang pasubli kaku ing pibandian a e ku naman penako.

⁵ O Dios, keka e la makalingad ding kakung kasalanan; ing meging kamulangan ku balu mu!

⁶ E mu la sa pakarinayan, agyang atin kung kakulangan, detang ika ing karelang panaligan. O Ginung Dios a tutung Mayupaya! O Dios ning Israel, e mu sa paintulut, king uli ku, mipakarine la ding lalapit keka.

⁷ King uli mu insultuan da ku, at tutu kung mengapakarine.

⁸ Mengari kung aliwang tau karing kapatad ku, anti kung dayuan karing kayabe ku king bale.

⁹ Tiktak karagul ing pamagmalasakit ku king bale mu, balamu api a mikakaluku king pusu ku; ing pamag-insultu da keka kaku digpa.

¹⁰ King mitmung kapakumbaban mig-ayunu ku, makanyan man pagsisti da ku ding tau.

¹¹ Inyang king magaspang a imalan mibablas ku pikayli-kayli da ku.

¹² Pisasabian da ku ding tau karing dalan, at pikanta-kanta ra ku ding malasing.

¹³ Oneng para kaku, keka ku manalangin, O Ginu, O Dios, king panaun a tula mu pakibatan mu ku, uli ning maragul a lugud mu ika pakibatan mu ku, uling tutuparan mu ing pangaku mung iligtas mu ku!

¹⁴ Iligtas mu ku at sagipan king burak, at king danum a malalam; karing kakung kalaban sagipan mu ku naman.

¹⁵ E mu paintulut ing itange na ku ning albug o malumud king malalam; e mu paintulut ing kuanan na ku ning kamatayan.

¹⁶ King uli ning mayap mung pilubluban at katapatan, O Ginu, uli ning maragul mung lunus kaku, saupan mu ku.

¹⁷ E me sana gugulutan ining kekang talasuyu; king maragul a kaguluan makapadurut ku; sana ibie mung agad ing kekang pakibat.

¹⁸ Lapitan mu ku; iligtas mu ku karing kakung kalaban!

¹⁹ Balu mu nung makananu da kung ininsultu, nung makananu da kung pilmuran, at leko dangalan; kakung kalaban balu mu la ngan.

²⁰ King pamaninsultu ra kaku mispak yang kakung salu; tutu kung ala nang akarapat, kalungkutan ing atyu kaku; manintun kung dumame kaku, oneng ala metung man; mamatula kaku ala kung atagpuan.

²¹ Inyang danupan ku lasun ing karelang dinuang; inyang mau ku, ing binie ra inuman a maslam.

²² Paintulut mung ing pamangan king lamesa ra maging dalan ne ning kasiran da, at sagradung pamisulusulu ra maging dalan ne ning pangabagsak da.

²³ Paintulut mung labug la at mabulag a mata ban e na la manakit pa; paburen mung mina la ding katawan da.

²⁴ Ibugnus mu karela ing mua mu, at iparamdam ing mua mung mikakaluku.

²⁵ Ala na sanang manuknangan karing lugal a pitutuknangan da, karing pibalebale ra ala na sanang taung mitagan.

²⁶ Uling liligaligan da la ring kekang perusan, at daragdagan da la pa ding kasakitan a binie mu karela.

²⁷ Tandanan mu ing sabla rang kasalanan; e mo dirinan kaligtasan.

²⁸ Kalisan mu la ding lagyu ra king libru ding mabie; king listahan ding taung makatuliran e mu la yayabe.

²⁹ Oneng tutu lang maplas ding sugat ku at misasakitan ku; O Dios ko, saupan mu ku at pakayapan.

³⁰ Ing lagyu ning Dios king kanta kaku yang purian; parangalan ke at pasalamatan.

³¹ Iti makaligaya king Dios maygit karing baka at toro a yayain da king Dios.

³² Panakit ding megipit kaniti tumula la, at ding king Dios sasamba mipasiknangan la.

³³ Uling ing Ginu pakiramdaman na ing saingsing ding atyu king pamangailangan, at e na la lakuan detang kaluguran na a atyu king sukulan.

³⁴ Banua at yatu, ing Dios kekayu yang purian; dagat at sablang atyu lelangan na, purian ye munaman.

³⁵ Iligtas ne ning Dios ing siudad ning Zion, at ding siudad ning Juda italakad na lang pasibayu; ding tau karela yang bandian at karin na manuknangan;

³⁶ ding anak da ring talasuyu na ilang magmana, at karin la manuknangan ding sablang malugud king Dios.